Erindið sem ég setti saman fyrir fundinn í dag

Hvað hefur Paul Ramses gert til að réttlæta að honum sé vísað úr landi án þess að útlendingaeftirlitið geri sér svo lítið fyrir og fjalli um mál hans?

Ekkert annað en að voga sér að sækja um hæli á Íslandi sem er þekkt fyrir að taka nánast ekki á móti neinum flóttamönnum. Paul er fórnalamb ómennskrar stjórnsýslu, þar sem ónothæfum lagabókstöfum er brugðiðfyrir sig fimlega og án tilfinninga. Það er auðvitað ótækt að hægt sé að senda hann til Ítalíu vegna þess að það eru engin bein flug til Íslands frá Afríku og hann gerði þau mistök að taka tengiflug á Ítalíu. Ítalía er þekkt fyrir sínaómannúðlegu geymslustaði fyrir flóttamenn og er þeim nánast öllum vísað til baka til landsins sem þeir flúðu. Það er mikilvægt að leiðrétta þann misskilning að Paul eigi einhverjar rætur á Ítalíu. Hans viðvera þar var eingöngu út af tengiflugi.

Það vekur furðu og reiði að maðurinn fær ekki einu sinni umfjöllun um mál sitt hjá útlendingastofnun og er rifinn úr faðmi fjölskyldu sinnar og komið fram við hann sem um glæpamann væri að ræða. Hans eini glæpur er að hafa sótt um hæli hérlendis og tengjast landi og þjóð með því að starfa fyrir hjálparsamtökin ABC barnaþorp. Já slíka glæpamenn verður að geyma í fangelsi og senda í lögreglufylgd til annarra landa. Kona slíks glæpamanns á ekki skilið að fá upplýsingar um hvert er verið að brottnema hann, eða hvað?

Ætlum við að sætta okkur við að komið sé fram við fólk af slíkri mannvonsku og kulda? Nei, við krefjumst þess að Paul Ramses verði tafarlaust sendur aftur til Íslands og um mál hans verði fjallað þar sem fjölskylda hans býr. Við sættum okkur ekki við að lausnin á þessu heimagerða vandamáli Björns og Hauks sé að senda bara konuna og ungabarnið líka úr landi.

Við skorum á Björn Bjarnason að sýna mannúð í verki, það er allt í lagi að viðurkenna að um mistök hafi verið að ræða og sýna manndóm og leiðrétta þessi mistök nú þegar, áður en það verður of seint.

Ég vil vekja athygli á undirskrifarlista þar sem þessar kröfur eru settar fram á skýran hátt og verður undirskriftarlistinn færður Birni og Hauk eftir helgi.

 

 

 

 

Fyrir þá sem ekki hafa aðgang að netinu

Ég veit að það kann að hljóma furðulega á netmiðli, en fólk hefur haft samband við mig og átt í vandræðum að skrifa á undirskriftarlistann - ég ætla því að búa til hefðbundinn pappírslista sem verður dreift á mótmælum sem boðuð hafa verið á morgunn fyrir utan Dómsmálaráðuneytið klukkan 12.

Hann vonandi fara sem víðast, ef fólk hefur áhuga getur það haft samband við mig og fengið slíkan lista sendan til útprentunar og beðið aðra um undirskriftir eða lagt hann fram á viðeigandi stöðum. Ég skal svo sjá um að halda um samantektinga á þessu. Sendið mér endilega póst á [e-mail] ef þið viljið að ég seti nöfnin ykkar á handskrifaða listann eða get sent ykkur lista á pdf. Við verðum að gera eitthvað núna áður en það verður of seint. Þá er mikilvægt að þrýsta á ráðamenn að konan hans Ramses verði ekki send af landi brott.  

Undirskriftarlisti til stuðnings Ramses

Undirskriftarlisti fyrir Paul Ramses

Ég er búin að smíða undirskriftarlista fyrir Paul Ramses. Hér er slóðin í hann:http://www.thepetitionsite.com/1/PaulRamses

Áskorunin er eftirfarandi og vona ég að sem flestir muni skrifa undir hann STRAX. Undirskriftarlistinn verður afhendur Birni og Hauki eftir helgi. 

 Við skorum á Björn Bjarnason, dómsmálaráðherra og Hauk Guðmundsson, forstöðumann útlendingastofnunar að snúa Paul Ramses heim til Íslands nú þegar og að um mál hans verði fjallað hér á landi, þar sem fjölskylda hans dvelur.

Við skorum jafnframt á Björn og Hauk að sýna mannúð í verki, en Paul á fjölskyldu hérlendis og var hrifsaður á brott frá 3 vikna gömlu barni sínu og eiginkonu aðfaranótt 3. júlí. 

Minni svo á mótmæli í dag fyrir utan Dómsmálaráðuneytið á milli 12 og 13. Tek það fram að ég stend ekki fyrir mótmælunum, er bara að leggja mitt á vogarskálarnar við að hjálpa við þau:) 

Fjölskyldu fleygt úr landi

Mótmæli fyrir utan dómsmálaráðuneytið

Á morgunn 4. júlí á milli 12 og 13 verða mótmæli fyrir utan dómsmálaráðuneytið. Við skorum á Björn Bjarnason og Hauk Guðmundsson að snúa Paul Ramses heim og fjalla um mál hans hérlendis þar sem fjölskylda hans er. Við krefjumst þess að Paul fái hér pólitískt hæli og að vinnubrögð  eins og í máli hans muni ekki endurtaka sig.

Síðastliðinn desember tók Paul þátt í borgarstjórnarkosningum í Naíróbí, en flokkur hans náði ekki kosningu. Eftir kosningarnar urðu margir stjórnarandstæðingar fyrir ofsóknum. Vegna ótta um líf sitt kom Paul hingað til lands í janúar og sótti um pólitískt hæli. Honum barst aldrei svar við beiðni sinni, jafnvel þó Katrín Theodórsdóttir héraðsdómslögmaður hafií mars ítrekað beiðni um að mál Pauls væri tekið upp. 

Í gær komu lögregluþjónar fyrirvaralaust á heimi Pauls og handtóku hann fyrir framan konu hans og þriggja vikna sonar þeirra. Hann var færður á lögreglustöðina á Hverfisgötu þar sem hann eyddi nóttinni. Í morgun var hann svo sendur til Ítalíu og mál hans sett í hendur stjórnvalda þar í landi, en samkvæmt Dyflinnarsamningnum hafa íslensk stjórnvöld leyfi til þess að senda hann til Ítalíu, 
vegna þess að Paul millilenti þar á leið sinni til Íslands.

Það er engin ástæða til þess að efast um trúverðugleika Pauls og auðveldlega hefði verið hægt að veita honum pólitískt hæli hér á landi. En Útlendingastofnun og Dómsmálaráðuneytið ákváðu samt að hunsa mál hans, einungis vegna þess að þau geta það. 

Hér á landi er sífellt hamrað á því að íslensk samfélag sé samfélag friðar, frelsis og jafnréttis, en brottvísun Pauls sannar að svo er ekki. Margfalt fleiri sækja um pólitískt hæli á Ítalíu en á Íslandi og því miklar líkur á því að hann verði einfaldlega sendur aftur til Kenía, þar sem bíða hans ofsóknir og hætta á því að hann verði drepinn. Fjölskylda hefur verið slitin í sundur og lífi manns stefnt í hættu; allt í boði íslenskra stjórnvalda.

Aðspurð sagði Ingibjörg Sólrún Gísladóttir, utanríkisráðherra að Utanríkisráðuneytið hafi ekkert með málið að gera en sagðist krefjast þess að Útlendingastofnun og Dómsmálaráðuneytið rökstyðji ákvörðun sína. Það er ekki nóg! Það þarf ekki að rökstyðja þess ákvörðun, heldur draga hana til baka og hleypa Paul aftur inn í landið og koma í veg fyrir að þetta gerist aftur.

Hittumst öll fyrir utan Dómsmálaráðuneytið á morgun, milli kl. 12:00 og 13:00 og krefjumst þess að Paul verði snúið aftur til Íslands. Sýnum íslenskum stjórnvöldum reiði okkar og andstöðu gegn þessari óafsakanlegri hegðun! 

Komið með trommur, hljóðfæri eða annað til þess að skapa hávaða, ef þið hafið áhuga á því. Það verður dagskrá og er verið að finna snjalla ræðumenn. Síðan má búast við örleikriti og ýmsu öðru.

Við verðum að sýna Birni í verki að okkur finnst þessi vinnubrögð forkastanleg og hvetjum hann til að sýna mannúð í verki. Hvet ykkur til að lesa mjög fræðandi og góða grein um mál Paul Ramses sem ég fann inn á blogginu hans Sigurðar Þórs Guðjónssonar. Smellið hér til að lesa hana.

Ég er að undirbúa undirskrifarlista fyrir þá sem komast ekki á mótmælin en það er lang sterkast að gera eitthvað eins og skrifa eða hringja í dómsmálaráðuneytið og útlendingastofnum. Sendið þeim bréf, föx, biðjið um viðtal við kappana. Sýnið að við sem þjóð samþykkjum ekki svona mannvonsku, mætum á mótmælin á morgunn, öll sem eitt. 

 

Smánarlegt af íslenskum stjórnvöldum

Ég á bara ekki til orð yfir íslenskum stjórnvöldum þessa dagana. Ég hvet fólk til að kynna sér þetta mál og styð heilshugar aðgerðir aðgerðasinna í morgunn til að vekja athygli á þessu og það væri ekkert nema hneisa ef hneppa á þá í sex ára fangelsi fyrir þessa aðgerð. Þarna eru stjórnvöld okkar að senda manninn í vísan dauðann og rífa hann úr faðmi fjölskyldu sinnar en hann á 3 vikna gamalt barn hérlendis og eiginkonu sem honum er stíað frá. Hvað er í gangi í samfélaginu okkar að við látum svona mála renna í gegnum kerfið án þess að gera nokkuð. Ég vissi ekki af þessu máli fyrr en nú og er brugðið að við séum á svo lágu plani varðandi mannréttindi. 

fann eftirfarandi inn á visir.is og ruv.is:

"Stefán Thordersen flugvallarstjóri staðfesti í samtali við Vísi að tveir menn hefðu hlaupið inn á flugverndarsvæðið þar sem þeir voru síðan handteknir.

Samkvæmt heimildum Vísis voru mennirnir að mótmæla brottför Keníamannsins, Paul Ramses, sem fluttur var til Ítalíu í morgun. Mál hans hefur verið nokkuð í umræðunni undanfarið en hann sótti um pólitískt hæli.

Paul var ofsóttur í heimalandi sínu og sótti því um hæli. íslensk stjórnvöld ákváðu hinsvegar að vísa honum úr landi án þess að taka umsókn hans til meðferðar.

Eyjólfur Kristjánsson fulltrúi lögreglustjórans á suðurnesjum sagði í samtali við Vísi að öryggisverðir flugvallarstjóra hafi óskað eftir aðstoð við handtöku mannanna í morgun. Þeir hafi síðan verið handteknir og settir í fangaklefa."

Skammarleg vinnubrögð hjá íslenskum stjórnvöldum varðandi mál Paul. Samkvæmt RÚV er honum stíað frá fjölskyldu sinni hérlendis, 

"Kenískum flóttamanni vísað úr landiStjórnvöld hafa ákveðið að vísa flóttamanni frá Kenía úr landi án þess að taka fyrir umsókn hans um pólitískt hæli. Maðurinn starfaði um tíma við hjálparstarf Í Kenía sem íslensk stjórnvöld komu að.

Einn þeirra sem tók þátt í borgarstjórnarkosningum í Naíróbí í Kenía í desember í fyrra er Paul Ramses. Hann náði ekki kosningu heldur andstæðingur hans í stjórnarflokki landsins. Eftir kosningar urðu margir stjórnarandstæðingar fyrir ofsóknum, Paul óttaðist um líf sitt og flúði því land í janúar síðastliðinn. Hann kom til Íslands og sótti um hæli sem pólitískur flóttamaður. Ástæðan er að hann dvaldi hér um tíma árið 2005 og starfaði í framhaldi fyrir ABC barnahjálp í Kenía.

Paul tók þátt í að stofna skóla í Naíróbí með Íslendingum, en það verkefni er meðal annars stutt af utanríkisráðuneytinu. Í mars var farið fram á að stjórnvöld tækju málið fyrir. Fram að þessu hefur ekkert svar borist.

Katrín Theódórsdóttir héraðsdómslögmaður segir aðí dag hafi lögreglan komið inn á heimili Pauls og tekið hann í fangelsi. Þar eigi hann að sitja í nótt og svo verði hann sendur út í fyrramálið. 

Ástæðan er að Paul millilenti á Ítalíu á leið sinni til landsins, og stjórnvöldum er því heimilt að senda hann þangað og láta ítölsk stjórnvöld fjalla um málið. Katrín segir að Paul eigi konu og 3 vikna son sem séu hér á landi líka og með þessari ákvörðun verði fjölskyldunni stíað í sundur."

Hlupu út á flugbrautina á Keflavíkurflugvelli

Lögregla segir morðin á frönsku nemendunum standi yfir!

Jahérna hér, standa morðin enn yfir - er lögreglan að myrða þá aftur eða stendur rannsókn morðanna enn yfir? Hvernig væri að blaðamenn á mbl.is  færu nú að vanda sig aðeins betur þegar þeir setja inn fréttir. Það er ágætt ráð að lesa textann upphátt, áður en maður skellir honum út á netið fyrir alla að lesa. Ég kalla eftir metnaðarfyllri vinnubrögðum. 

Hér er setning úr fréttinni: 

"Lögregla segir morðin á frönsku nemendunum standi yfir en líkin fundust á sunnudag eftir að slökkviliðsmenn voru kallaðir út til þess að slökkva eld nærri íbúðinni."

Tveir franskir nemar stungnir til bana í London

Vinir Tíbets sýna kvikmyndina Kundun

Fimmtudaginn 3.júlí n.k. klukkan 20:00 mun félagið Vinir Tíbets sýna stórmyndinni Kundun í Kaffi Hljómalind frá árinu 1997. Leikstjóri myndarinnar er hinn margrómaði Martin Scorsese en tónlistin er úr smiðju Philip Glass. Myndin var tilnefnd til fjögurra óskarsverðlauna árið 1998. Myndin er 134 mínútur og eftirá verður mögulegt að fræðast um ástandið í Tíbet í dag sem og menningu landsins.

Um myndina: Árið 1937 í afskektu héraði nálægt landamærum Kína var lítill tveggja ára drengur útnefndur hinn fjórtándi Dalai Lama eða Kundun, sem merkir “Nærveran” á tíbetsku. Tveimur árum síðar var hann fluttur til Lhasa, höfuðborgar Tíbet, þar sem hann fær þjálfun og er undir það búinn að taka við hlutverki þjóðhöfðingja. Scorsese gerir umbyltingarsömum tímum fyrir Tíbetsku þjóðina skil í þessari mynd en kínversks yfirvöld gerðu innrás í Tíbet árið 1950 þegar Dalai Lama var aðeins 14 ára gamall.

 

 

 

 

Slóð í dóminn

Held að þau muni fremur sitja dóminn af sér heldur en að greiða þetta. Spurning um hvort að þau fái ekki bara að fara í lúxusfangelsið fyrir vestan:)

Þessi dómur er í sjálfu sér fyrirséður. Gengið er harðar á mótmælendur en til dæmis kynferðisafbrotamenn. Veit að sama dag og nokkur þeirra sátu í 24 tíma í gæsluvarðhaldi skokkaði einn slíkur glæpamaður út eftir nokkurra klukkustunda vist. Það verður áhugavert að sjá hvað vörubílstjórar fái í sektir, en þeirra mótmæli voru mun viðameiri og höfðu mun víðtækari áhrif á allt samfélagið. 

Ég frábið mér athugasemdir frá fólki sem lítur á aðgerðasinna SI sem skítuga lopapeysuhippa og vil minna á að með aðgerðum sínum hafa þau rutt veginn fyrir "mainstream" flíspeysuaðgerðasinna:)

Hér er úttekt úr bréfi sem kom inn á póstlista sem ég er á sem einn af aðgerðasinnunum sendi áðan: "Þess má geta að Orkuveitan krafðist skaðabóta upp á 741.933 krónur en kröfunni var vísað frá. Enn einu sinni voru meðlimir Saving Iceland aðeins dæmdir fyrir að óhlýðnast lögreglu; ál- og orkufyrirtækin hafa mér vitandi aldrei hlotið neinar skaðabætur frá hópnum. Svo má einnig geta þess að 50.000 króna sekt til ríkisins má greiða með því að sitja fjóra litla daga í fangelsi. Aumingja ríkissjóður græðir því að öllum líkindum ekkert..."

Hér má lesa dóminn. Það er áhugavert að fara í gegnum svona skjal, t.d. þetta: 
"Haukur Hilmarsson gaf skýrslu við aðalmeðferð málsins. Aðspurður kvaðst ákærði hafa tekið þátt í mótmælum Saving Iceland þann 26. júlí 2007. Kvaðst ákærði hafa verið fjölmiðlafulltrúi og hefði átt að ræða við fjölmiðla ef þeir hefðu mætt á svæðið og aðra þá sem kynnu að vilja ræða við ákærða eða ræða við hópinn. Ákærði kvaðst ekki hafa getað tekið ákvörðun fyrir aðra á staðnum en hann hefði getað svarað spurningum sem lutu að fréttatilkynningunni og aðgerðinni eins og hún hafði verið skipulögð. Ákærði neitaði að hafa tekið þátt í því að hindra umferð um veginn að vinnusvæðinu. Aðspurður hver nákvæmlega hans þáttur hefði þá verið sagði ákærði að hann hefði staðið á svæðinu, verið rækilega merktur að hann minnti með vesti og hann hefði haft fréttatilkynninguna undir höndum og verið reiðubúinn að svara spurningum. Ákærði kvaðst einnig hafa verið tilbúinn til að vera í samskiptum við fólkið sem var undir bílunum. Ákærði kvaðst ekki hafa fengið fyrirmæli frá lögreglu um að yfirgefa vettvang. Ákærði kvaðst hafa komið með öðrum meðákærðu á svæðið og hann hefði farið af staðnum í lögreglubifreið til Reykjavíkur og hefði verið í handjárnum. Ákærði Haukur gaf aftur skýrslu við framhald aðalmeðferðar málsins. Aðspurður um að vitnið Haukur Páll Ægisson hefði borið að hann hefði óskað eftir því að ákærði og meðákærða Eva þýddu lögreglufyrirmæli fyrir mótmælendur sem ekki voru íslenskumælandi sagðist ákærði ekki kannast við að hafa þýtt fyrirmæli lögreglumannsins fyrir fólkið."

Dæmd til að greiða sekt fyrir mótmæli við Hellisheiðarvirkjun

Þetta verður að kæfa í fæðingu

Ég vona að þjóðir heims hafi fengið nóg af þeim voðaverkum sem USA hefur staðið fyrir, sér í lagi í Írak. Stríð sem verður aldrei hægt að réttlæta. Ef það er réttlætanlegt af hverju er ekki búið að ryðja sér leið og taka út Mugabe úr sinni holu eða forseta alþýðulýðveldisins Kína?

Hér er afar sláandi myndband um frægðarverk USA í Írak. Ég missti eiginlega trúna á mannkynið eftir að sjá það, en við verðum að vita hvað er í gangi í okkar nafni. Við samþykktum þetta stríð og ég vona að við höfnum stríði gagnvart Íran án umhugsunar. Þetta stríð má aldrei gerast. Er ekki komið nóg af voðaverkum í heiminum okkar? Er hægt að réttlæta hvað sem er fyrir meiri hagvöxt? 

Ég vara við þessu myndbandi - það er ekki fyrir viðkvæmar sálir. 

Hernaður gegn Íran í undirbúningi?

Allt er þegar þrennt er:)

Ég vona svo sannarlega að þetta takist í þetta sinn hjá honum Benedikt. Falleg hugsun á bak við þetta hjá honum. Ef veðurguðirnir setja sig ekki á móti honum eins og í hin skiptin, þá held ég að hann nái að framkvæma þetta afrek léttilega.

Benedikt er einn af þessum sérkennilegu kvistum sem ég hef kynnst á lífsleiðinni, einstaklega hlý manneskja með drauma sem stundum er nokkrum númerum of stórir. En hann má eiga það að hann leggur allt sitt í að hrinda sínum draumum í framkvæmd. Mikið held ég að heimurinn okkar væri fátæklegri ef ekki væri til svona fólk eins og Benedikt. 

Benedikt lagður af stað

Ógleymanlegir tónleikar

Ég var svo heppin að standa beint fyrir framan hátalarna og tónlistinn nötraði á tíðum eins og alvöru jarðskjálfti í gegnum mig. Það er mikill frumkraftur í Björk og mér finnst hún alltaf frábær á sviði. Það var gaman að sjá svona mikið margmenni og ég vona að alla vega stórt hlutfalla þeirra sem mættu gerðu það fyrir náttúruna okkar sem á svo sannarlega undir högg að sækja. 

Ég kíkti á vefinn nattura.info og hann er mjög fróðlegur og alveg ótrúlega mikið af fallegum myndum af náttúrunni sem fórna á. Ég hvet fólk til að skoða vefinn og njóta þeirrar fræðslu sem þar er að finna.

Ég náði ekki að upplifa þrjú síðustu lögin, yngri sonurinn orðinn svo þreyttur að við laumuðumst heim áður en lagið sem ég var að bíða eftir alla tónleikana var spilað... Declare independence .... sá reyndar brot af því í beinni á national geographic webcastinu.... 

 

Óður til náttúrunnar í Laugardal

Til hvers að styðja Tíbet?

Yfirleitt fæ ég afar jákvæð viðbrögð við baráttu minni um að upplýsa þjóðina mína um ástand mála í Tíbet. Stundum fæ ég þau viðbrögð að það sé áþekkar hörmungar í gangi um heimsbyggð alla. Það séu aðrar þjóðir sem þjást jafnvel enn meira en Tíbetar eða af hverju beini ég ekki kröftum mínum að mannréttindabrotum sem eiga sér stað hérlendis?

Auðvitað væri það frábært ef ég væri til í mörgum eintökum og gæti aðstoðað við sem flest málefni. En málið er það að allir sem finna hjá sér þörf á að kvarta yfir einhverjum málefnum ættu endilega að gera eitthvað í því. Allir geta haft einhver áhrif á gang mála í okkar stóra heimi. Upplýsingar eru til dæmis eitthvað sem krefst ekki mikils en þörf er á betra aðgengi að upplýsingum um flest málefni sem brenna á fólki.

Ég lít á aðgerðir mínar leynt og ljóst þannig að ég sé að sá fræjum. Ég trúi því að einstaklingar geti breytt heiminum, svo framarlega sem við hættum að láta undan hinni fremur algildu sjálfshyggju. Það er þessi sjálfshyggja sem er að ganga frá heiminum okkar. Því hún blindar okkur fyrir því að við erum öll saman í þessu, að allt er tengt á einn eða annan máta. 

Ég styð Tíbet vegna þess að enginn var að gera nokkurn skapaðan hlut hérlendis til að skapa vettvang eða umræðu um ástandið í Tíbet þegar ég byrjaði á mínum einkamótmælum fyrir utan kínverska sendiráðið. Á þessum fremur stutta tíma síðan ég byrjaði að gera eitthvað hefur mjög margt jákvætt gerst og félagið Vinir Tíbets orðið að veruleika. Ég hélt satt best að segja að slíkt félag væri starfandi hérlendis áður en við stofnuðum það.

Mér finnst það mikill heiður að fá að leiða saman þessi lönd. Bæði eiga þau sér ríka menningararfleifð sem hefur haft mikil áhrif á þjóðarsálina. Við vorum bara svo einstaklega lánsöm að fá okkar sjálfstæði án þess að þurfa að líða mikið fyrir það á meðan allir tilburðir Tíbeta til að öðlast sitt frelsi hefur aðeins þýtt meiri eyðileggingu og meira niðurbrot.  Það sem gefur mér ef til vill mest af öllu er að finna það þakklæti sem mér hefur verið sýnt frá þessum sárafáu Tíbetum sem búa hér. Það hlýtur að vera afar erfitt að sjá þjóð sína brotna á bak aftur af slíku offorsi eins og gerðist eftir mótmælin í mars í Tíbet. Það hlýtur að vera erfitt að heyra stöðugt um blóðsúthellingar og geta ekkert gert. Því er það þeim kærkominn léttir að fá tækifæri á að sýna sínum samlöndum stuðning með því að mæta fyrir utan kínverska sendiráðið á laugardögum. Ég er ekki síst að sýna þeim minn stuðning með því að búa til þennan vettvang, í staðinn hef ég fengið að kynnast fólki sem ég get lært svo mikið af. 

Ef eitthvað fólk á einskonar rétt á gremju og reiði, þá er það fólk sem hefur þurft að upplifa að horfa upp á menningarlegt þjóðarmorð á þjóð sinni, fólk sem fær ekki að kalla sig Tíbeta í vegabréfum sínum, þau verða að vera skráð sem Kínverjar. Þjóð sem fær ekki að segja að þau séu flóttamenn frá Tíbet heldur Kína. Þjóð sem verið er leynt og ljóst að stela þjóðerninu frá. En þau eru ekki reið eða stýrast áfram að þörf til hefnda. Ég hef aldrei heyrt þau krefjast hefnda eða hallmæla kínversku stjórninni. Þau líta á kínversku þjóðina sem þjáninga bræður og systur sem búa undir sama járnhæl ómennskrar stjórnar. 

Nú hef ég verið að lesa merkilega bók sem heitir "The search for Panchen Lama". Mæli eindregið með þessari bók fyrir þá sem hafa áhuga á að kynna sér sögu landsins og þeirra pólitísku afla sem hafa komið landinu í svona mikið óefni. 

Ég mun mæta fyrir utan kínverska sendiráðið uns ég sé einhvern árangur af þessum aðgerðum. En þær skila sér í það minnsta alltaf inn á borð hjá kínverskum stjórnvöldum sem hin vikulega staða fyrir utan sendiráðið, því sendiherranum ber skilda að tilkynna öll mótmæli til yfirmanna sinna.

Ég veit að sumir hræðast mótmæli og finnst þau til óþurftar. Mótmælin okkar gætu allt eins verið kölluð samstöðufundur eða PROTEST eða Pro Tibet aðgerð. Hvað við köllum þetta skiptir litlu máli. Það sem skiptir öllu máli er að við komum saman og sýnum Tíbetum að okkur stendur ekki sama um örlög þeirra og við erum að taka þátt í alþjóða vitundarvakningu um málefni Tíbets.

Alvöru vitundarvakning

Með því að sameina krafta sína hefur þeim tekist það sem ráðamenn vilja síst af öllu: að beina augum heimsins að þeirri eyðileggingu sem á sér stað hérlendis. Þetta er tvíeggja sverð fyrir ráðamenn. Samkvæmt skýrslu sem forsætisráðherra lét gera fyrir sig og ber yfirskriftina Ímynd Íslands á að gera út á náttúru, kraft þjóðarinnar og frið. Við getum varla gert út á náttúru sem á sífellt meira undir högg að sækja og varla getum við gert út á kraft sem fer allur í að halda uppi alþjóða risafyrirtækjum sem þekkt eru fyrir glæpsamlega hegðun gagnvart fólki og náttúru. Ber þar helst að nefna Rio Tinto Alcan og Alcoa. 

Það að SÞ hafi ákveðið að hefja samtarf við Björk og Sigur Rós er mikil og góð tíðindi fyrir þá sem hafa hve mest barist til að vekja almenning til vitundar um ástand mála hérlendis. Því það þýðir einfaldlega það að auðveldara verður að miðla upplýsingum til almennings. En augljóst er á því sem maður les að fólk er illa upplýst og án efa mun verða fyrir alvöru vitundarvakningu um mikilvægi þessa að axla ábyrgð gagnvart umhverfi sínu ef það fær réttar upplýsingar til að melta. Ég hef alltaf haldið því fram að besta leiðin til að breyta ástandi mála er að réttar upplýsingar séu til taks. Það hefur verið afar erfitt fyrir grasrótina að keppa að því, vegna þess að flest erum við að gera þetta í frítíma okkar og borga með þessu starfi og fæst okkar eiga mikla peninga til að leggja í púkkið.

Ríkisfyrirtækið Landsvirkjun hefur haft greiðan aðgang að peningum til að búa til sitt áróðursefni og haft fólk í fullu starfi við að miðla upplýsingum sem oftast eru afar vafasamar og einhliða. Þá hefur ríkisstjórnin sjálf eytt töluverðum fjármunum í að búa til ímyndarskýrslur um hvernig megi selja land og þjóð á sem ódýrastan máta til alþjóða álrisa. Ég hef mikla trú á því að fólk muni geta tekið betur upplýstar ákvarðanir ef við getum komið réttum upplýsingum í neytendavændar umbúðir. 

Þessi vika sem er að líða er annars hálf furðuleg. Álverið á Bakka fékk sína mikilvægu undirskrift frá Össuri á meðan mörg af hans flokkssystkinum eru meira en lítið súr yfir því. Enda stangast það verulega á við Fagra Ísland og það sem var kynnt fyrir þjóðinni sem framtíðarsýn og stefna flokksins. Ég styð umhverfisráðherra sem og Dofra ásamt ungliðahreyfingunni í þeirra baráttu að hindra að af þessu verði. Ef almenningur fengi að vita nákvæmlega hvað er í húfi, held ég að þetta háa hlutfall sem nú þegar er á móti frekari stóriðju muni vaxa enn frekar.  

SÞ, Björk og Sigur Rós taka upp samstarf

Er Ólafur danskur eða íslenskur?

Sá frétt um þetta á BBC þar sem hann er sagður Dani, en hér er talað um hann sem Íslending. Það hljóta að hafa verið sendar út tilkynningar í USA þar sem hann er sagður Dani, því erum við þá alltaf að tala um hann sem Íslending? Varla eru sendar út tilkynningar um verk eftir manninn sem hann veit ekkert um?

Mér finnst Ólafur frábær listamaður, en finnst svolítið gróft að stela þjóðerni hans, bara til að blása upp þjóðarstolt okkar. 

 

Fossar falla í Austurá

Þar sem sólin skín

Ég verð alltaf jafn hissa þegar ég vakna og það er svokölluð Bongóblíða í höfuðborginni, dag eftir dag. Ég fyllist jafnan miklu eirðarleysi í slíku veðri og finnst það jaðra við helgispjöll að vera inni í svona veðri, það hefur yfirleitt verið þannig að svona dagar koma ekki í pörum, hvað þá vikupörum hérlendis. 

Allt fær á sig einhvern framandi blæ þegar sólin skín í borginni. Grámyglan sem hefur tekið á sig fasta mynd á gráum húsveggjum vestur í bæ sem búið er að friða og má ekki mála, er horfin inn í trjágróður sem skyndilega er þakinn litríkum og ilmsterkum blómum. 

Ég var úti í allan gærdag, í allskonar aðgerðum, fyrst fyrir utan kínverska sendiráðið, meðal Vina Tíbets, síðan tók ég þátt í menningarhátíðinni RÚST á Lækjartorgi. Þar skemmti ég mér við að hlusta á það hvernig fjöldi fræðimanna og kvenna sá fyrir sér ímynd Íslands, í boði forsætisráðuneytisins. Samkvæmt þessari skýrslu erum við varla til sem þjóð, nema að eiga sterka ímynd og vera þekkt stærð erlendis. Því er um að gera að dæla miklum fjármunum í ímyndarsköpun, enda ekki vanþörf á að bjarga þessum íslensku útrásarfyrirtækjum sem fóru í útrás án þess að eiga gott ímyndarbakland. Hvet fólk til að kynna sér þessa skýrslu á vef forsætisráðuneytisins. Þar kemur fram að við erum villt náttúrbörn sem jafnframt erum full af óbeisluðum krafti sem líkja mætti við hver, best í heimi og getum nýtt okkur börn frá stríðshrjáðum löndum til að efla ímynd okkar sem friðarþjóð. Fá þessa krakka til að koma og njóta friðar á Íslandi í viku og senda þau svo aftur heim í stríðshrjáða landið sitt, sem friðarsendiherra Íslands... 

Ég og yngri sonur minn sátum í góðum félagskap eftir lesturinn en ég fékk að lesa niðurlag ímyndarskýrslunnar fyrir vegfarendur sem sumir hverjir stöldruðu við. Elísabet Jökuls las sinn þátt eins og henni er einni lagið - náði að fanga þessi paník sem virtist einkenna ímyndina okkar hálfkaraða og ósastillta. Það er alveg rosalega langt síðan að ég hef notið þess að gera ekki neitt, eins og í gær. Hitti mikinn fjölda af fólki sem flokkast sem vinir og kunningjar sem voru greinilega með "ég verð að fara út í góða veðrið" óþreyjuna. Þetta var hið fullkomna líf.

Ég gleymi því oftast að ég þurfi að nota sólarvörn á Íslandi og er því með nokkuð rautt nef og bringu eftir 5 tíma útiveru í sólinni. En ég er svo lánsöm að eiga gríðarlega stóra aloa vera plöntu sem ég fæ að nota í neyð til að hlúa að brunasárum fjölskyldunnar:)  

Nú verð ég bara að fara út og skoða þessi fallegu ský sem kúra yfir Esjunni og fanga sólina á meðan tími gefst. Vona að helgin ykkar hafi verið endurnærandi og gefandi og geymi í það minnsta eitt lífsins ævintýr.