Nýtt myndband frá Tíbet

Ráðlegg viðkvæmu fólki að sleppa því að horfa á þetta - en þetta er nýtt myndband sem sýnir hverskonar veruleika Tíbetar sem mótmæla standa fyrir. Nóg er komið af því ofbeldi sem kínversk yfirvöld kalla frelsi. Hvernig væri nú að heimurinn segði hingað og ekki lengra. Nú þegar búa fleiri Kínverjar en Tíbetar í Tíbet. Hægfara þjóðarmorð blasir við.

Dalaí Lama þakkar Indverjum hjálpina

Borgarahreyfingin hafnar leiðtogadýrkun

Fréttatilkynning

Nýlega efld stjórn Borgarahreyfingarinnar hefur tekið til starfa og í kjölfarið sent frá sér eftirfarandi tilkynningu. Borgarahreyfingin hafnar leiðtogastjórnmálum eins og þau hafa birtst hér á landi hvort sem um er að ræða undanfarna mánuði eða áratugi. Þess vegna hefur Borgarahreyfingin ákveðið að skipta ekki með sér verkum skv. hefðbundnum aðferðum í hlutverk formanns, varaformanns og ritara og nota ekki þá titla í starfi sínu. Um yfirstandandi helgi eru haldnir landsfundir tveggja stærstu stjórnmálaflokka landsins. Almenningur þarf að sæta því að horfa upp á nánast stanslausa umfjöllun á starfsemi þessara flokka í öllum fjölmiðlum þar sem fyrirferð flokksleiðtoga og leiðtogakjörs varpar stórum skugga á þá málefnalega umræðu sem annars ætti að vera í landinu. Landsfundir sem þessir og sú skefjalausa leiðtogadýrkun sem þeir upphefja er lýðræðinu ekki til framdráttar.

Borgarahreyfingin – þjóðin á þing bendir á að það er einmitt leiðtogadýrkun af þessu tagi sem leiddi til þeirrar ömurlegu niðurstöðu að Alþingi varð óstarfhæft. Ríkisstjórn landsins hrökklaðist svo frá þegar vanhæfni þeirra “leiðtoga” sem ríkisstjórnarflokkarnir höfðu á að skipa kom berlega í ljós. Stjórn Borgarahreyfingarinnar mun koma fram sem heild og meta það í hverju tilviki hver kemur fram sem talsmaður hennar, eftir því hvert tilefnið er. Þess vegna mun Borgarahreyfingin sýna mörg andlit í aðdraganda kosninganna. Í því skyni hefur Borgarhreyfingin skipað sér talsmenn sem munu skipta með sér hinu s.k. “leiðtoga” hlutverki sem gamaldags stjórnmál og fjölmiðlaumfjöllun kallar svo sterkt eftir.

Nýr formaður kosinn í dag

- BROTTVÍSUN ER MORÐ! -

Mótmæli, sunnudaginn 29. mars, klukkan 15
Krafa um að íslensk yfirvöld hætti að senda fólk út í opinn dauðan!

Hist verður á Lækjartorgi klukkan 15:00 á morgun, sunnudag, til að mótmæla
meðferð íslenskra stjórnvalda á hælisleitendum á Íslandi.

- BROTTVÍSUN ER MORÐ! -

Dauðadómur frá Íslandi

Í þessari viku átti að senda 5 hælisleitendur aftur til Grikklands með
eingöngu tveggja tíma fyrirvara. Rauði Krossinn og Sameinuðu þjóðirnar
hafa ásakað Grikkland fyrir að brjóta á mannréttindum í búðum
hælisleitanda. Ef við leyfum þessu að viðgangast er nær öruggt að þeir
verða sendir aftur til heimalanda sinna og beint í opinn dauðann.

   * Í lok ársins 2007 þurftu 67 milljónir manna að yfirgefa heimili sín
vegna stríðs og náttúruhamfara. Fæstir njóta nokkurrar verndar né hafa
fastan stað til að búa á.

   * Ísland tekur á móti fæstum hælisleitendum, hlutfallslega, af öllum
löndum heims. Frá 1990 til 2007 sóttu 603 einstaklingar um hæli á
Íslandi. Einungis einn hlaut hæli. Á sama tíma eru það fátækustu lönd
heims sem taka við flestum hælisleitendum.

   * Ísland nauðgar Dyflinnarsamkomulaginu með því að senda
hælisleitendur aftur til þess Schengenlands sem þeir komu fyrst til.
Þaðan verða þeir sendir aftur til sins heimalands.

Að senda fólk til lands þar sem geisar stríð er morð!

Að senda fólk til lands þar sem það er ofsótt fyrir skoðanir sínar er morð!

Berjumst fyrir lífi. Mætum á mótmælin á Lækjartorgi Sunnudaginn 29. mars,
kl. 15:00.

---

Bréf Hassan Raza , hælisleitanda frá Afghanistan.

„Ég kom frá Afganistan til Evrópu til að finna friðsamlegt líf, og ég hélt
að allt yrði í góðu lagi. Í Grikklandi lærði ég fyrst tungumálið og
tileinkaði mér svo lífsstílinn. Í 2 ár hélt ég að allt hefði breyst til
hins betra, þegar náungar sem höfðu valdið mér vandræðum í Afganistan,
komu til Grikklands. Þeir fundu mig og handleggsbrutu mig svo
handleggurinn hefur ekki komist í samt lag síðan, og stungu mig fjórum
sinnum hnífsstungu í brjóst, bak og háls. Þá komst ég að þeirri niðurstöðu
að Grikkland og jafnvel öll Evrópa væri mér ekki örugg. Ég flutti og hélt
að ef til vill myndi Kanada reynast betur. Á leiðinni þangað millilenti ég
á Íslandi og hér stöðvaði lögregla för mína. Þá átti ég einskis annars völ
en sækja um hæli á Íslandi.

Nú hef ég verið hér í 11 mánuði. Á þessum 11 mánuðum hef ég gert mitt
besta. Ég fann starf sem aðstoðarmaður kokks á veitingastað á hóteli í
Keflavík, og tímabundið atvinnuleyfi, til þriggja mánaða. Ég starfaði á
veitingastaðnum í þrjá mánuði án þess að fá nokkurn tíma greitt, því
veitingastaðurinn varð gjaldþrota. Ég hef rætt við Rauða krossinn um málið
og þau fengu mig til að afhenda þeim atvinnuleyfið, þannig að þau gætu
sótt um hæli fyrir mína hönd. Það var fyrir fjórum mánuðum síðan og ég hef
ekkert heyrt frá þeim síðan þá. Og nú hafa þau ákveðið að senda mig aftur
til Grikkland, þar sem þau vita að ég er í lífshættu. Nú hef ég þannig
engan stað þar sem mér finnst ég öruggur.

Ég þarfnast og á tilkall til þess að komið sé fram við mig í samræmi við
alþjóðleg mannréttindalög. Ég fer fram á hjálp við stjórnvöld og
fjölmiðla. Líf mitt er í ykkar höndum.“

Bein útsending á ræðu Davíðs

Það er alveg ótrúlegt að hlusta á gallið og hatrið - svívirðingarnar og eiturpillurnar sem Davíð eys úr sér. Þetta væri næstum því afsakanlegt ef aðeins um gamlan bitran mann væri að ræða en viðhlæjendur hans í salnum ættu að skammast sín - mæli með að fólk fari inn á XD og hlusti á leikhús fáránleikans í beinni.

Verðum að halda í vonina

Opið fyrir alla nema Snorra

Snorri bauð sig fram á móti Bjarna Ben í formannsstólinn - en reynt hefur verið með ráðum og dáðum og hunsa framboð hans. Hér er bráðskemmtileg ræða sem hann hélt í Valhöll - ég er ekki viss um að hann fái að halda ræðu í Laugardalshöllinni í dag. Flokkurinn vill sem sagt bara vera opinn fyrir suma - sér í lagi þá sem eru til í að halda sig til hlés.

„Þurfum að opna flokkinn“

Fall eða endurreisn?

Grein eftir mig sem birtist í Fréttablaðinu í vikunni

Íslenska þjóðin var fyrst til að falla í hyldýpi kreppu sem engan endi  virðist ætla að taka. Þögnin um eiginlega stærð vandans er bæði  þrúgandi og skammarleg.

Heimurinn horfði á okkur falla, en mun heimurinn sjá hér raunverulega  endurreisn? Við höfum tækifæri til að gefa bæði þjóðinni okkar von sem  og heimsbyggðinni um að hægt sé að taka á spillingu þó hún nái inn á  æðstu stofnanir.  Við höfum tækifæri til að sýna að við þorum að reisa 
hér samfélag þar sem krafan um gegnsæi og raunverulegt lýðræði rís hærra en óttinn við breytingar.

Heimurinn horfir til okkar því við erum fyrsta landið til að kjósa  í  kjölfar efnahagshrunsins eftir að ríkisstjórn var steypt af stóli með raunverulegri byltingu. Við berum því mikla ábyrgð að láta ekki tæla 
okkur til að endurnýja umboð þess fólks sem brást algerlega  trausti okkar. Heldur einhver að þau séu best til þess fallin að leiða  landið úr þeim ósköpum sem þau létu dynja yfir okkur án nokkurrar 
iðrunar? Tveir flokkar skópu þessa atburðarrás með fádæma  tengslamyndun á milli viðskiptaheims og þingheims. Treystið þið  virkilega þeim til að rannsaka sjálfa sig og vini sína?

Ef við viljum breytingar þá verðum við að gera eitthvað til að  þessar breytingar verði að veruleika. Ég treysti hvorki kerfinu né  fólkinu sem situr í öllum æðstu embættum til að tryggja að við 
almenningur fáum meiri völd. Ég treysti þeim ekki til að hafa dug í  sér til að uppræta þá spillingu sem hér er orðin svo samofin veruleika  allra að fólk er nánast hætt að sjá hana.

Hvað ætlar þú að gera til að tryggja að við losnum úr viðjum  flokkakerfisins? Hvað ætlar þú að gera til að sýna umheiminum að þér  er nóg boðið? Ég veit hvað ég ætla að gera, ég ætla að leggja allt 
undir til að tryggja að það fólk fái brautargengi sem ég veit að hefur enga hagsmuni aðra að leiðarljósi en að tryggja þjóðinni aftur þau völd sem hún hélt sig hafa. Ég ætla að styðja Borgarahreyfinguna – þjóðin á þing með  ráðum og dáð til að hér verði í boði raunveruleg lausn fyrir þá sem hafa 
fengið nóg af svikum og sérhagsmunagæslu ráðamanna.

Ánægjulegar fréttir

Ég er mjög ánægð með núverandi ráðhafa að hafa ráðið þessa frábæru konu til að vinna í mesta réttlætismáli sem þjóðin hefur staðið frammi fyrir - að fólk axli ábyrg á því að velta yfir þjóðina mestu skuldum í sögu landsins sem börn og barnabörn þurfa að bera ef ekkert er að gert.

Ég er ánægð með að núverandi ríkisstjórn hafi gert skurk í að vinna í þessu máli og fengið jafn hæfa manneskju til þess. Segja má að almenningur hafi lagt sitt á vogaskálarnar að þetta yrði að veruleika og sýnir að við skríllinn höfum árhrif ef við sýnum samstöðu og fylgjum málum fast eftir - alla leið inn í stjórnsýsluna. Held að aldrei fyrr hafi verið eins mikið lag fyrir almenning að hafa áhrif - aldrei gleyma því elsku þjóðin mín að þeir sem starfa sem sérstakir fulltrúar inni á þingi eru í vinnu fyrir þjóðina og eru fulltrúar hennar.

Nú eru kosningar framundan og lag að beita þrýstingi og aðhaldi á öllum sviðum.

Joly sérstakur ráðgjafi

Borgarahreyfingin bætir við sig mestu fylgi

Samkvæmt þessari skoðanakönnun bætir Borgarahreyfingin - þjóðin á þing við sig mestu fylgi eða úr 2,5% í 3,4%.

Þetta eru ánægjulegar fréttir fyrir okkur sem erum að vinna að því hörðum höndum að bjóða upp á þennan valkost í komandi kosningum. Ég er sannfærð um að við náum fólki inn - miðað við þann stöðuga meðbyr sem við finnum fyrir úti í samfélaginu - aðalatriðið er að almenningur fái vitneskju um tilvist okkar - ætla að skella hér inn stefnuskránni okkar ef einhver er að lesa bloggið mitt sem ekki þekkir til XO.

 

Réttlæti — siðferði — jafnrétti

Gripið verði þegar í stað til neyðarráðstafana í þágu heimila og fyrirtækja

1. Alvarleg skuldastaða heimilanna verði tafarlaust lagfærð með því að færa vísitölu verðtryggingar fram fyrir hrun hagkerfisins (til janúar 2008). Höfuðstóll og afborganir húsnæðislána lækki til samræmis við það. Raunvextir á verðtryggðum lánum verði að hámarki 2–3% og afborgunum af húsnæðislánum megi fresta um tvö ár með lengingu lána. Skuldabyrði heimila vegna gengistryggðra íbúðalána verði lagfærð í samræmi við verðtryggð íbúðalán. Í framhaldinu verði gert samkomulag við eigendur verðtryggðra húsnæðislána um að breyta þeim í skuldabréf með föstum vöxtum og verðtryggingarákvæði í lánasamningum verði afnumin.

2. Leitað verði leiða út úr myntvanda Íslands með myntbandalagi við aðrar þjóðir eða, ef þess þarf, einhliða upptöku annars gjaldmiðils.

3. Boðin verði víðtæk aðstoð við atvinnulausa um allt land með það að markmiði að aðstoða þá í að nýta atvinnuleysið sem tækifæri.

4. Skuldsett fyrirtæki verði boðin til sölu og tilboðum aðeins tekið ef ásættanlegt verð fæst. Annars verði starfsfólkinu leyft að taka yfir fyrirtæki. Skuldir eigenda verði ekki felldar niður sjálfkrafa en veita má hagstæð lán eða breyta skuldum lífvænlegra fyrirtækja í hlutafé í eigu ríkisins frekar en að afskrifa skuldir.

5. Halla á ríkissjóði verði mætt með endurskoðun skattkerfisins, m.a. með fjölgun skattþrepa, hátekjuskatti og breytingum á virðisaukaskatti, frekar en niðurskurði í heilbrigðis- og velferðarþjónustu. Alþjóðagjaldeyrissjóðurinn fái ekki að taka yfir stjórn á landinu.

6. Strax verði hafist handa við að meta heildarskuldir þjóðarbúsins og að því loknu gert upp við lánardrottna eftir bestu getu. ICESAVE-reikningar Landsbankans og aðrar skuldir bankanna erlendis verði ekki greiddar fyrr en álit óháðra sérfræðinga liggur fyrir um skyldur Íslands, m.t.t. þess að sennilega hafi verið um svikamyllu að ræða en ekki eðlilega bankastarfsemi. Rannsakað verði hvað varð um allar færslur á reikningum bankanna erlendis sem og lánveitingar þeirra til tengdra aðila, fjármunirnir sóttir og þeim skilað til eigenda. Stjórnendur og eigendur bankanna verði gerðir ábyrgir fyrir því sem upp á vantar. Samið verður við grannþjóðirnar um það sem út af stendur m.t.t. neyðarástands efnahagsmála á Íslandi og reynt að fá þær skuldir niðurfelldar. Samhliða því verði gefið loforð um að 2% af VLF Íslands renni til þróunaraðstoðar á ári í tíu ár til að sýna góðan vilja Íslendinga til að verða ábyrg þjóð meðal þjóða.

Landsmenn semji sjálfir sína eigin stjórnarskrá

1. Þjóðaratkvæðagreiðsla fari fram um mál sem varða þjóðarhag óski 7% þjóðarinnar þess. Sama skal gilda um þingrof.

2. Bera skal alla samninga sem framselja vald undir þjóðaratkvæðagreiðslu.

3. Rofin verði öll óeðlileg hagsmunatengsl milli viðskiptaheims og þingheims.

4. Viðurkenna skal þau sjálfsögðu mannréttindi að vægi atkvæða í alþingiskosningum verði jafnt, sbr. 1. gr. Mannréttindayfirlýsingar S. Þ., enda sé það í samræmi við hugmyndir um aukið vægi þjóðaratkvæðisgreiðslu um einstök mál. Það er augljóst að ekki gengur að láta suma landsmenn hafa meira vægi en aðra í þjóðaratkvæðagreiðslu.

5. Fjöldi þingmanna miðist við fjölda á kjörskrá og verði hlutfallið 1/4000. Það er í samræmi við algengt hlutfall hjá öðrum þjóðum sem við berum okkur saman við. Þetta myndi þýða örlitla fækkun þingmanna frá því sem nú er en hægfara fjölgun í framtíðinni með vaxandi fólksfjölda.

6. Kjördæmaskipan verði endurskoðuð og kjördæmum á suðvesturhorninu fækkað úr þremur í eitt.

7. Tryggð verði skipting valdsins milli löggjafarvalds og framkvæmdavalds, m.a. með því að ráðherrar sitji ekki á þingi.

8. Ráðherrar, þingmenn og æðstu embættismenn framkvæmdavaldsins gegni embætti í mesta lagi í átta ár eða tvö kjörtímabil samfellt.

9. Fyrstu málsgrein 76. greinar stjórnarskrárinnar verði breytt til samræmis við Mannréttindayfirlýsingu S. Þ. um réttinn til lífskjara sem nauðsynleg eru til verndar heilsu og vellíðan. 76. gr. verði á þessa leið eftir breytingu: „Öllum skal tryggður réttur til grunnlífskjara sem nauðsynleg eru til verndar heilsu og lífsviðurværi þeirra sjálfra og fjölskyldu þeirra. Grunnlífskjör teljast vera nauðsynleg næring, hreint vatn, klæði, húsnæði, læknishjálp og félagsleg þjónusta, svo og réttur til öryggis vegna atvinnuleysis, veikinda, fötlunar, fyrirvinnumissis, elli eða annars sem skorti veldur og menn geta ekki við gert.“ Öllum skal tryggður í lögum réttur til almennrar menntunar og fræðslu við sitt hæfi. Börnum skal tryggð í lögum sú vernd og umönnun sem velferð þeirra krefst. 10. Allar náttúruauðlindir verði í þjóðareigu og óheimilt að framselja þær nema tímabundið og þá aðeins með viðurkenndum gagnsæjum aðferðum þar sem fyllsta jafnræðis og arðs er gætt.

Trúverðug rannsókn á íslenska efnahagshruninu fari af stað undir stjórn óháðra erlendra sérfræðinga og fari fram fyrir opnum tjöldum. Frysta skal eignir grunaðra auðmanna STRAX meðan á rannsókn stendur

1. Tafarlaust verði sett í gang opinber rannsókn undir stjórn erlendra sérfræðinga á hruni íslenska efnahagskerfisins. Samhliða því verði sett lög sem leyfa ógildingu allra fjármálagerninga undanfarinna tveggja ára, þ.m.t. gerninga skilanefnda bankanna, og í undantekningartilfellum lengra aftur í tímann ef sýnt þykir að um óeðlilega gjörninga hafi verið að ræða.

Lögfest verði fagleg, gegnsæ og réttlát stjórnsýsla

1. Ráðningar og skipanir í embætti og þ.a.l. uppsagnarfrestur allra embættismanna sé í samræmi við það sem almennt gerist hjá stjórnendum á vinnumarkaði. Nánari útfærsla verður gerð í samráði við Kjararáð.

2. Tiltekinn minnihluti þingmanna geti boðað til þjóðaratkvæðagreiðslu um lagafrumvörp sem Alþingi hefur samþykkt.

3. Hæfi umsækjenda um störf hæstaréttar- og héraðsdómara verði metið af hlutlausri fagnefnd skipaðri af Alþingi eftir tilnefningu Hæstaréttar. Ráðherra beri að velja dómara úr hópi þeirra sem fagnefndin telur hæfasta.

4. Ráðið verði í stöður innan stjórnsýslunnar á faglegum forsendum.

5. Fastanefndir þingsins verði efldar. Nefndarfundir verði almennt haldnir í heyranda hljóði. Gerð verði krafa um að fastanefndir afgreiði öll mál og skili niðurstöðu innan ákveðins tíma.

6. Settar verði siðarreglur fyrir alþingismenn, ráðherra og æðstu embættismenn framkvæmdavaldsins og til þess ætlast að þeir m.a. geri grein fyrir öllum eignum og skuldum, stjórnarsetu í fyrirtækjum og upplýsi jafnharðan um allar breytingar á þessu sviði. Þingmenn, ráðherrar og embættismenn beri ábyrgð á gjörðum sínum.

Lýðræðisumbætur STRAX

1. Stjórnlagaþing fólksins í haust

2. Persónukjör í alþingiskosningum

3. Afnema 5% þröskuldinn

4. Þjóðaratkvæðagreiðslur

5. Ný framboð fái sama tíma í fjölmiðlum og sama stuðning og aðrir stjórnmálaflokkar

Borgarahreyfingin leggur sig niður og hættir störfum þegar þessum markmiðum hefur verið náð eða augljóst er að þeim verður ekki náð.

VG upp fyrir Sjálfstæðisflokk

Fimm flóttamenn handteknir í dag

Fimm flóttamenn voru handteknir í dag og verða fluttir nauðugir úr landi í fyrramálið - til Grikklands.  Sameinuðu þjóðirnar og ESB hafa sent út þau skilaboð að senda ekki flóttamenn til baka til Grikklands þar sem aðstaða og meðhöndlun flóttamanna sé ekki mannsæmandi og stríði gegn almennum mannréttindunum.  Er eitthvað sem við getum gert?

Einn af þessum flóttamönnum er rétt um 18 ára gamall og kemur frá Írak... hitti hann þegar hann var nýkominn fyrir nokkrum mánuðum síðan og honum leið ekki vel blessuðum.
Finnst mikilvægt að við munum eftir flóttafólkinu sem hingað kemur - margir íslendingar tala um að flýja Ísland - þá má með sanni kalla okkur efnahagslega flóttamenn - við viljum væntanlega hlýrri móttökur en það fólk sem hingað kemur og býr við vægast sagt ömurlegar aðstæður.

Okkar sjóðir!

Hvet alla til að taka þátt í undirskriftasöfnun Helga Vilhjálmssonar, kenndur við sælgætisgerðina Góu, gegn sukkinu í lífeyrissjóðakerfinu. Helgi fór af stað með herferðina í fyrradag og mun afhenda Jóhönnu Sigurðardóttur forsætisráðherra listann. Nú þegar hafa um 12.000 skrifað undir. Miðað við þessa frétt er ástæða til að þrýsta á að lífeyrissjóðirnir séu nýttir í þágu þeirra sem borguðu í þá.

Hægt er að skrifa undir með því að fara á vefsíða: Okkar sjóðir.

Hér er auglýsingin:
„Forstjóri Lífeyrissjóðs verslunarmanna er, þrátt fyrir fjórðungslækkun launa, launahæsti forstjóri íslensks lífeyrissjóðs. Starfskjör hans fela einnig í sér bifreiðahlunnindi sem hann að sjálfsögðu nýtir. Á sama tíma þurfa eldri sjóðsfélagar sennilega að horfa upp á skerðingu á lífeyrisréttindum sínum. Eldri
borgurum, 65 ára og eldri, og aðstandendum ofbýður þessi framkoma við fólkið. Hvernig stendur á því að enn eru ákveðnir einstaklingar að sukka með peningana okkar?

Við þökkum fyrir hreinsanirnar í Fjármálaeftirlitinu og Seðlabankanum en verkinu er ekki lokið. -Það þarf að taka til í lífeyrissjóðunum svo þeir geti gegnt því hlutverki sem þeim er ætlað, að tryggja sjóðsfélögum góð lífskjör á efri árum. Velferð eldri borgara veltur á því að peningarnir þeirra séu notaðir rétt í þeirra þágu. Aldraðir hafa ekki efni á að borga hæstu laun á Íslandi.

Jóhanna, nú hefur þú tækifæri til að standa við orð þín um að velferð aldraðra gangi fyrir. Það er líka spilling í lífeyrissjóðakerfinu, þar þarf að taka til.

Við viljum endurskoðun á lífeyrissjóðakerfinu strax. Það gengur ekki að lífeyrisgreiðslurnar okkar séu notaðar til að borga sukk örfárra einstaklinga í stað þess að þær séu nýttar í okkar þágu. Við höfum fengið nóg.“

Lífeyrisréttindi skerðast

Skora á sjálfstæða sjálfstæðismenn

að kjósa með eftir bestu vitund og samvisku - þessi forræðishyggja sem XD gerir sig sí og æ uppvís að er frekar neyðarleg fyrir frjálshyggjuflokk.

Skora því á ykkur þingmenn sjálfstæðisflokksins að sýna smá hugrekki og kjósa með þessu frumvarpi. Þið hafið ekkert að óttast - þið megið ráða því samkvæmt þessari tillögu hvort þið treystið kjósendum ykkar eða ekki til að velja eftir sinni sannfæringu. Ekki eyðileggja fyrir þeim sem hafa áhuga á að lifa við raunverulegt lýðræði þar sem prófkjörin fara fram í kjörklefanum og hver og einn fær að raða eftir því sem þeim hugnast.

Persónukjör ekki lögfest nú

Þvílík hræsni

Ég studdi Suður-Afríku í þeirra baráttu gegn því misrétti sem þar var og fór meira að segja í mótmælagöngu í Liverpool fyrir 25 árum til stuðnings þeirra baráttumálum - hef fylgst vel með ástandinu þarna fyrir og eftir aðskilnaðinn. Það er hryggilegt að horfa upp á að þjóð sem maður hefði haldið að hefði samúð og skilning gagnvart því hryllilega ástandi sem er í Tíbet - kúguð og undirokuð þjóð - rétt eins og meirihluti SA bjó svo lengi við.

Það ber vott um óskiljanlega hræsni að neita friðarhöfðingjanum sjálfum um þátttöku í friðarráðstefnu til að þóknast kínverskum yfirvöldum að það er ekki hægt að líta á það öðruvísi en smánarblett á sögu Suður-Afríku. 

Friðarráðstefnu aflýst vegna Dalaí Lama

Er mannanafnanefnd enn til?

Ég hélt að búið væri að leggja niður þessa nefnd. Ég held að fá lýðræðisríki búi við það að þar sé einhver hópur manna sem sé að skipta sér að því hvað fólk kýs að nefna börnin sín.

Eitt sinn þurfti ég að glíma við mannanafnanefnd og vann hana á endanum eftir 8 ára baráttu. Heyrði svo einhvern halda því fullum fetum fram að búið væri að leggja þetta foræðishyggjubatterí niður. Hvað kostar það okkur að fólk sé að rífast um hvort það sé í lagi að fólk nefni börn sín eftir bestu samvisku - stundum bera þeir við málhefð - en stundum eru rökin engin nema að barnið geti mögulega þurft að upplifa stríðni. 

Held að hægt sé að afbaka öll nöfn ef það er stemmningin meðal krakka. Því fannst mér þau rök afar hæpin og ansi langt seilst inn í friðhelgi fjölskyldunnar að þvinga fólk til að hlíta áliti nefndar eins og mannanafnanefndar sem oft er að þvarga um eigin skoðanir en tekur ekki mark á hefðum innan fjölskyldna.

Mannanafnanefnd klofnaði

Lögfest hjá ESB

Þetta er undarleg framsetning á einhverju sem hvort er eð þarf að fylgja samkvæmt aðildarumsóknaferlinu hjá ESB.

Enginn getur orðið fullgildur aðili eftir aðildarviðræður nema að fyrst fari fram þjóðaratkvæðagreiðsla um málið. Auðvitað næst full sátt um það - einfaldlega vegna þess að það er ekki hægt að framkvæma það öðruvísi.

En auðvitað er gaman að lofa einhverju sem er alveg öruggt að þarf að efna:)

Þjóðin sjálf hafi síðasta orðið

Lyfjamisnotkun

Í þessari grein segir. "Matthías segir marga tortryggna gagnvart kannabisi vegna misnotkunarhættu. En í „völdum tilvikum“ sé ástæðulaust að hræðast notkunina, t.d. við ógleði hjá krabbameinssjúklingum, sem verkjalyf eða við vissum taugasjúkdómum."

Flestir þeir unglingar sem leiðast út í fíkniefnaneyslu byrja á því að misnota lyfin sem finnast í lyfjaskápnum heima hjá sér. Auðvitað verður þetta eitthvað misnotað, en þessi lyf er ekki nærri því eins söluvæn og rítalín og lyf sem flokkast undir flokkinn: SSRI lyf.

Þekki krabbameinssjúklinga í USAnu sem hafa sagt að líðan sín hafi snöktum skánað með því að fá að nota kannabispillur. Skil ekki af hverju það ætti að vera einhver tregða við að bjóða sjúklingum hér upp á slíkt hið sama ef það linar þjáningar þeirra.

Um langa hríð mátti ekki nota hamp til framleiðslu á fatnaði eða öðru sem hann hentaði í vegna viðskiptahagsmuna bómullarræktenda. Það er löngu tímabært að enduskoða óttann við þessa ágætu plöntu sem er til margra hluta gagnleg. 

Kæmi til greina að leyfa kannabislyf á undanþágu