Vorið kom í dag

Var einmitt að ræða það við yngri son minn þegar ég labbaði með honum út í skóla, að það væri vorangan í lofti - hann var ekki alveg að fatta hvað ég átti við - en ég heyrði eitthvað í söngvum fuglanna í morgunn sem minnti mig á vorið og ákvað að í það minnsta væri mitt huglæga vor hafið:)

Undanfarið hefur hver önnur hörmungarfréttin dunið yfir þjóðina og ég er sannfærð um að sú von sem fæðist alltaf með vorinu og birtunni muni hjálpa okkur að halda heiðríkju í huganum þrátt fyrir að á móti blási úr öllum áttum eins og jafnan gerist hér á Íslandi.

Þetta eru erfiðir tímar, en það er samt eitthvað stórmerkilegt að gerast í þjóðarsálinni og einhver spakur sagði að maður eflist með hverri raun. Þetta getur átt jafnt við einstaklinga sem þjóð. Það eina sem maður þarf að gera er að læra af reynslunni og gera ekki sömu mistökin aftur, ef mistök mætti kalla. Einhver annar spakur sagði að það væru ekki til mistök heldur aðeins tækifæri til þroska.

Vorboðar koma til landsins

Vaknaðu nú þjóðin mín!

Samkvæmt úrslitum prófkjara og forvala og hvað þetta nú heitir allt saman - er ljóst að hér verða engar breytingar. Þeir sem sökktu skútunni með vanhæfni og hagsmunatengsl að leiðarljósi eiga semsagt að sjá um að sigla björgunarbátunum í strand líka.

Þarf ég að fara út á torg og kyrja vanhæf þjóð? Er þetta virkilega það sem þið viljið? Treystið þið fólkinu í sjálftökunni til að hætta að hygla að sér og sínum? Haldið þið virkilega að þeim sé ekki alveg sama um ykkur og heimilin ykkar sem þið eruð að missa? Haldið þið að þeir sem skópu hér landslag siðrofs og spillingar séu þess færir að rannsaka sjálfa sig og sína?

Hvað viljið þið? Hvernig viljið þið að framtíð okkar verði? Viljið þið að við verðum þekkt sem þjóð spillingar eða hugrekkis? Það krefst mikils hugrekkis að breyta til - að yfirgefa eitthvað jafn heilagt og flokkakerfið er fyrir mörgum - fjölskyldur hafa kannski kosið sama flokkinn kynslóð eftir kynslóð? Munið bara að þetta eru ekki trúarbrögð - maður svíkur engan nema sjálfan sig að hanga í eitthvað sem maður veit að stríðir gegn samvisku og réttlætiskennd. 

Ætlum við að segja við börnin okkar þegar við eigum ekkert eftir sem þjóð eftir ca 10 ár ef fer sem horfir - að við gerðum ekki neitt til að stoppa þetta feigðarflan? 

Vaknaðu nú þjóðin mín - vaknaðu og sjáðu veruleikann eins og hann er.

18.000 atvinnulausir, enginn endir virðist vera á uppsögnum. 

Meira en helmingur fyrirtækja berjast í bökkum. Mörg orðin gjaldþrota.

Fólk flýr landið - skilur eftir þá sem eiga ekki tök á að flýja - hver á að sjá um gamla fólkið okkar? Varla er það að fara að taka sig upp og flytja.

IMF stjórnar landinu - hvað gerist þegar við getum ekki borgað skuldirnar okkar? Er mögulegt að við missum náttúruauðlindir okkar í hendurnar á alþjóðafyrirtækjum? Í sögulegu samhengi þeirra þjóða sem hafa þurft að leita á náðir IMF eru of góðar líkur á því til að ég geti horft fram hjá því.

Hvar á að skera niður? Hef heyrt að næsta haust byrji niðurskurðurinn fyrir alvöru. Engin raunveruleg svör fást frá neinum af fjórflokknum. Hvar eru efndirnar við stóru orðin SJS? 

Okkur er enn haldið í myrkrinu. Við vitum ekki hve stór jakinn er sem skútan er að stefna á. En óumflýjanlegt er að við verðum fyrir miklu höggi - margir eru enn ekki að sjá eða upplifa þungu höggin. Það er alveg ljóst að XD og XB geta ekki lagfært þann hringorms-ósóma hagsmunatengsla sem vefja sig um stjórnsýsluna alla. 

Hvað getum við almenningur gert? Við getum haldið áfram að vera broddflugan - sem lætur þetta fólk verða friðlaust nema það hlusti á kröfur okkar um hreinsun, um heiðarlegt og réttlátt samfélag. En kæra þjóð - ekkert mun gerast ef þið gerið ekki neitt. Í guðanna bænum ekki kjósa þetta fólk aftur yfir okkur. Prófið að gera eitthvað verulega hugrakkt - nýtið ykkur það einstaka tækifæri sem Borgarahreyfingin er að skapa - labbið yfir brúnna á þing. Hún er byggð af okkur fyrir ykkur til að tryggja að við verðum aldrei aftur valdlaus þjóð. 

Vaknaðu nú þjóðin mín og mundu að ef þú vilt breytingar þá færðu aldrei þær breytingar sem þú vilt ef þú sækir þær ekki sjálf.

Ragnheiður Elín sigraði

Borgarahreyfingin hélt sinn fyrsta opna fund

Fjölmiðlar sáu ekki ástæðu til að senda fulltrúa sína á hann - Ég ákvað því að skrifa stutta frétt um fundinn:)

Við héldum opinn fund í Iðnó til að kynna framboðið. Mætingin var góð þrátt fyrir að við auglýstum hann helst í netheimum og í útvarpi. Herbert Sveinbjörnsson, Birgitta Jónsdóttir og Hjálmar Hjálmarsson héldu ræður við góðar undirtektir. Eftir það var fólki útí sal boðið að spyrja fólkið í pallborðinu sem samanstóð af fyrrnefndum ásamt Þór Saari, út í stefnu og markmið  Borgarahreyfingarinnar - þjóðin á þing. Spurningarnar voru jafn fjölbreyttar og fólkið var margt.

Við erum venjulegt fólk sem sér ekki fram á að byltingin hafi leitt til neins nema uppfærslu á sömu hugmyndafræðinni og hér hefur verið allt of lengi við lýði - skreytt slagorðum byltingarinnar.

Það sem brennur greinilega á almenningi er óvissan sem þjóðin býr við um framtíð sína í kjölfar hrunsins sem engan endi virðist ætla að taka. Miðað við þá miklu þátttöku í mótmælum og andófi við Þingvallastjórnina svokölluðu virðist fólk almennt hafa sætt sig við ríkjandi ástand nema þeir sem mættu til dæmis á fundinn okkar - þar mátti sjá fólk sem hefur verið mjög virkt í baráttunni fyrir að hér verði gagngerar lýðræðisumbætur til að koma í veg fyrir annað eins stórslys og við erum að vinna okkur úr.

Kærar þakkir til allra sem mættu á þriðjudagskvöldið.

Hér er svo ræðan mín

Byltingin

Pottar og pönnur
lamin
í taktfastri reiði
undiraldan svo þung
að ekkert fær hana stoppað

Skríllinn umbreyttist í hetjur
felldi vanhæfa ríkisstjórn

Þúsundir streymdu út
óttaþögnin rofin

Hungrið sverfur að
hungur eftir réttlæti
heiðarleika
von

Og vonin sigraði óttann
þegar valdhafar
stigu niður úr hásætum
hroka og yfirgangs

Og réttlætið mun sigra
stjórnsýslan verður hreinsuð
við erum ekki þögnuð
við erum rétt að vakna

Flokkaveldið mun falla
höggvum það fúatré spillingar
í herðar niður
með sannleika
með heiðarleika

Við erum rétt að vakna
almenningur
ég og þú
VIÐ
verðum stórfljót breytinga
á siðspilltu sjálftökukerfi

Við eigum kerfið
við erum þjóðin

Við trúum því að til að byggja upp heilbrigt samfélag eftir hrunið þurfum við, fólkið í landinu, að þrýsta á þær meginbreytingar sem þjóðin kallar eftir og öruggt er að fjórflokkurinn er vanhæfur til að gera án eftirlits og þrýstings frá þjóðinni, innan þings sem utan:
Það þarf raunverulega rannsókn á efnahagshruninu til að gera upp spillta fortíð – spillingin þrífst í stjórnsýslunni sem er sýkt af hringormsmynduðum hagsmunatengslum.
•    Ef það reynist rétt að þingmenn og þeirra fólk hafi fengið óeðlilegar fyrirgreiðslur frá fjármálastofnunum, er ljóst að raunveruleg rannsókn á efnahagshruninu án eftirlits og þrýstings óháðra aðila mun ekki skila neinum árangri.
Það þarf að tryggja raunverulegar lýðræðisumbætur til framtíðar.
•    Sama hvar í flokki stjórnmálamenn standa munu þeir aðeins láta frá sér þau völd sem þeir er þvingaðir til að láta frá sér. Stærsta efnahagshrun heimsins miðað við höfðatölu var ekki nóg, það þurfti margra mánaða mótmæli og á endanum ofbeldi til að þvinga síðustu ríkisstjórn til að láta af völdum.
•    Látum ekki fjórflokkinn stela frá okkur stjórnlagaþinginu með því að búa til nánast óyfirstíganlegar reglur sem hindra þátttöku almennings í því.

Hvaða verkfæri höfum við almenningur til að hafa áhrif: eins og staðan er í dag framseljum við vald okkar á fjögurra ára fresti – þess á milli erum við algerlega upp á náð og miskunn valdhafa komin. Það verður að gera grunnbreytingar á kosningalögum svo við lendum ekki aftur í þeirri stöðu að hafa yfir okkur vanhæfa, ráðalausa ríkisstjórn þegar þjóðin lendir í hamförum eins og við höfum upplifað. Það er aðeins hægt með því að færa valdið aftur til þjóðarinnar. Það er aðeins hægt ef við fáum það meitlað í stein að við getum kallað eftir breytingum ef nægilega stór hluti þjóðarinnar krefst þjóðaratkvæðagreiðslu.

Almenningur kallar eftir upplýsingum en fær þær ekki. Hvað er þá til ráða? Hvernig í ósköpunum eigum við að fá upplýsingar sem gefa okkur hugmynd um hver staða okkar er nákvæmlega í dag? Við fáum þær ekki með því að standa fyrir utan þing og hrópa okkur hás eða beita annarskonar ytri þrýstingi. Eina leiðin sem ég sé færa í þessari stöðu er að fara inn á þing og ná í þær. Það voru ekki stjórnvöld sem fengu Evu Joly til landsins heldur og það voru án efa háværar kröfur almennings um að hún yrði fengin til að aðstoða okkur, sem urðu til þess að stjórnvöld sáu sig knúin til að fá hana til liðs við sig. Gleymum ekki mætti okkar. Eva mun verða okkur mikill styrkur í baráttunni við að uppræta spillinguna. Höldum áfram að þrýsta dag hvern – verum broddflugur samvisku og réttlætis.

Borgarahreyfingin – þjóðin á þing ætlar að byggja brú fyrir almenning inn á þing – vera rödd ykkar – talsmenn ykkar, en síðast en ekki síst – fá ykkur sem hafið unnið að samfélagsumbótum og mannúð bak við tjöldin til að bjóða ykkur fram. Við þurfum ekki leiðtoga – við þurfum samstöðu og samvinnu – við sem einstaklingar, getum breytt heiminum en það mun ekkert gerast nema að við gerum eitthvað. Við erum þjóðin – við erum kerfið – við eigum þingið.

 

Lítil hreyfing á fylgi flokkanna

Eru flokkarnir eins og trúarbrögð?

Þetta rennir stoðum undir þá kenningu mína að flokkarnir eru nánast uppbyggðir eins og trúarstofnanir. Nú er búið að gera úr vesalings konunni einhverskonar dýrling. Við þurfum ekki fleiri leiðtoga - fólk þarf að trúa því að það hafi eitthvað að segja um framtíð sína og hætta að varpa ábyrgð sinni á annað fólk sem það heldur að sé mikilfenglegra en það sjálft.

Ef maður skoðar uppbyggingu flokka og uppbyggingu trúarbragða þá er þetta nánast eins. Ef einhver yfirgefur flokkinn er hann svikari og uppsker yfirleitt útskúfun.

Blysför til Jóhönnu

Von á von ofan

Þetta þýðir að möguleikarnir á því að réttlæti nái fram að ganga margfaldast - sér í lagi ef hún fær raunsanna mynd af því hvernig spillingin hefur ofið sig hér allt um kring og ofan í dýpstu rætur fjórvaldsins.

Ég finn fyrir ákveðnum létti og von - þessi kona kann sitt fag og hlífir engum:) 

Eva Joly sérstakur ráðgjafi

Stuðningsfundur fyrir utan kínverska sendiráðið í dag

10. mars eru 50 ár liðin síðan H.H. Dalai Lama flúði Tíbet - Þá er 1 ár liðið frá blóðugum átökum í Lhasa sem brutust út vegna mótmæla munka og almennings gegn því alræði sem þjóðin býr við.

Vinir Tíbets taka þátt í alþjóða aðgerð til að sýna tíbesku þjóðinni stuðning í baráttu þeirra fyrir mannréttindum og trúfrelsi. Safnast verður saman fyrir utan kínverska sendiráðið að Víðimel 29, þriðjudaginn 10. mars kl: 17:00. Tsewang Namgyal flytur stutt erindi um ástandið í Tíbet. Birgitta Jónsdóttir les úr yfirlýsingu frá H.H. Dalai Lama.

Í Tíbet getur það varðað margra ára fangelsi að eiga þjóðarflagg Tíbeta í fórum sínum. Í Tíbet búa nú fleiri Kínverjar en Tíbetar. Í Tíbet er tungumálið að glatast. Í Tíbet hafa verið herlög í meira en ár og sífellt meiri harka gagnvart íbúum landsins virðist engan enda taka. Enn á ný hefur landinu verið lokað fyrir alþjóða samfélaginu. Þar eru engir alþjóða fjölmiðlar eða mannréttindasamtök.  Fyrir ári síðan útskýrði Dalai Lama ástandið í Tíbet á þann veg að þar væri verið að fremja menningarlegt þjóðarmorð.

Fjölmennum og sýnum tíbesku þjóðinni samstöðu í verki.

„Tíbetar búa við helvíti á jörðu"

Úr stefnuskrá Borgarahreyfingarinnar - þjóðin á þing

Trúverðug rannsókn undir stjórn og á ábyrgð óháðra erlendra sérfræðinga á íslenska efnahagshruninu verði hrundið af stað og fari fram fyrir opnum tjöldum. Frysta eignir grunaðra auðmanna STRAX meðan á rannsókn stendur

1. Tafarlaust verði sett í gang opinber rannsókn undir stjórn erlendra sérfræðinga á hruni íslenska efnahagskerfisins.  Samhliða því verða sett afturvirk lög sem leyfa ógildingu allra fjármálagerninga undanfarinna tveggja ára þ.m.t. gerninga skilanefnda bankanna, og í undantekningartilfellum lengra aftur í tíma ef sýnt er að um óeðlilega gjörninga hafi verið að ræða þar sem félag og/eða eigendur þess hafi verið með þeim hætti leitt af sér skaða fyrir íslenskt efnahagslíf. Í þeim tilfellum verður ákvæði hlutafélagalaga um takmarkaða ábyrgð eigenda fellt niður.

Meira á borgarahreyfingin.is

 

 

Joly: Leita þarf til erlendra sérfræðinga

Til hamingju Lilja

Fyrir síðustu kosningar var það Guðfríður Lilja sem var sigurvegari forvalsins, þó hún hafi komið inn beint af götunni rétt eins og Lilja Mósesdóttir. Mér finnst góður árangur þeirra í forvali afar jákvætt fyrir okkur landsmenn, þekki þær báðar smá og veit að þarna fara heiðarlegar og víðsýnar manneskjur inn á þing.

Frábært að sjá stuðninginn við Katrínu og Svandísi. Hefði viljað sjá meiri stuðning við Álfheiði, því mér hefur fundist hún vera að standa sig mjög vel.

Það er aldrei vinsælt að vera umhverfisráðherra og allir sem hafa sest í þann stól þurft að gjalda fyrir það - veit ekki nákvæmlega af hverju. Þó Kolbrún njóti ekki víðtæks stuðnings - þá finnst mér þörf á að benda á að hún hefur alltaf haldið sínum tengslum við grasrótina. Auðvitað var þetta bleikt og blátt frumvarp klúður en ég hef nú séð önnur frumvörp sem eru ekkert skárri og fólki fyrirgefið fyrir það. Má þar nefna frumvörp sem hafa komið þjóðinni í þrot.

Ég er ánægð að sjá að það er endurnýjun í gangi í Reykjavík - varð fyrir miklum vonbrigðum með VG í NA - hefði viljað sjá Hlyn í öðru hvoru efsta sætinu.

Enn og aftur til hamingju Lilja mín - þú ert svo sannarlega vel að þessu komin.

 

Lokatölur komnar hjá VG í Reykjavík

Samstaða með Tíbetum - 50 ára afmæli "Tibetan Uprising"

Þann 10. mars næstkomandi eru 50 ár liðin síðan H.H. Dalai Lama flúði Tíbet - Þá er 1 ár liðið frá blóðugum átökum í Lhasa sem brutust út vegna mótmæla munka og almennings gegn því alræði sem þessi þjóð býr við.

Enn á ný hefur landinu verið lokað fyrir alþjóða samfélaginu. Vinir Tíbets taka þátt í alþjóða aðgerð til að sýna tíbesku þjóðinni stuðning í þeirra baráttu fyrir að lifa af sem þjóð. En í fyrra útskýrði Dalai Lama ástandið í Tíbet á þann veg að þar væri verið að fremja menningarlegt þjóðarmorð.

Í Tíbet getur það varðað margra ára fangelsi að sýna Dalai Lama hollustu sína eða að eiga þjóðarflagg Tíbeta í fórum sínum. Í Tíbet fremja munkarnir frekar sjálfsvíg en að verða fangelsaðir og þurfa að búa við margra ára pyntingar og hrottaskap.

Í Tíbet búa nú fleiri Kínverjar en Tíbetar. Í Tíbet er tungumálið að glatast sem og menningarleg arfleifð þessarar friðsælu þjóðar.

Vinir Tíbets stóðu fyrir samstöðu og mótmælafundum fyrir utan kínverska sendiráðið í hverri viku frá því í mars í fyrra þangað til í september. Félagið hefur legið í dvala á meðan efnahagshrunið hér hefur skollið á með fullum þunga, en þrátt fyrir efnahagslegar þrengingar þá ber okkur skylda til að gleyma ekki þeim er þjást þó í fjarlægum heimshlutum sé. Eftir nokkra mánuði mun Dalai Lama heimsækja þjóð okkar. Það væri gaman að geta sýnt honum að hér er víðtækur stuðningur við þjóð hans sem heimurinn hefur gleymt í 50 ár.

Fjölmennum og sýnum samstöðu með Tíbetum, sýnum kínverskum ráðamönnum að heimurinn lætur málefni Tíbet sig varða.

Ef þú kemst ekki - gefðu þér þá endilega tíma til að skrifa í fjölmiðla um Tíbet eða á bloggið þitt þennan dag. Kveiktu á kerti eða twittaðu - fjésbókaðu þinn stuðning. Vinsamlegast látið sem flesta vita.

Leaving Fear Behind (in Tibetan, Jigdrel) is a heroic film shot by Tibetans from inside Tibet, who longed to bring Tibetan voices to the Beijing Olympic Games. With the global spotlight on China as it rises to host the XXIX Olympics, Tibetans wish to tell the world of their plight and their heartfelt grievances against Chinese rule. The footage was smuggled out of Tibet under extraordinary circumstances. The filmmakers were detained soon after sending their tapes out, and remain in detention today.
 

In a remarkable coincidence, filming concluded in early March 2008 on the eve of the eruption of unprecedented mass Tibetan protests across the Tibetan plateau. Shot primarily in the eastern provinces of Tibet, the film provides a glimpse into the hearts and minds of the Tibetan people and their longstanding resentment of Chinese policies in Tibet.

The filmmakers traversed thousands of miles, asking ordinary Tibetans what they really feel about the Dalai Lama, China, and the Olympic Games. The filmmakers gave their subjects the option of covering their faces, but almost all of the 108 people interviewed agreed to have their faces shown on film, so strong was their desire to express themselves to the world. Excerpts from twenty of the interviews, including a self-recorded interview of the filmmaker himself, are included in the 25 minute film.

The footage reveals with stark clarity that Tibetans are frustrated and embittered by the deterioration and marginalization of Tibetan language and culture; the destruction of the lifestyle of Tibetan nomads through Chinese forced settlement policies; the lack of religious freedom and the vilification of the Dalai Lama; and the broken promises made by the Chinese government to improve conditions in Tibet in the run up to the Olympic games. All are united in their reverence for the Dalai Lama and long for him to return, and as some even dream, to attend the Olympic Games.

Spillingin vellur fram

Dag hvern vellur og sullar upp spillingin sem stjórnvöld með agaleysi og reglugerðaleysi leyfðu að krauma og æta upp undirstöður landsins. Hvernig stendur á því að það eru ekki hafnar alvöru vitnaleiðslur? Af hverju hefur enginn stórlax verið látin axla ábyrgð á þessu. Manni verkjar stöðugt í siðferðiskenndina og maður spyr sig hvað veldur seinaganginum að koma því fólki sem ber ábyrgð í gæsluvarðhald.

Af hverju er hin nýja ríkisstjórn ekki búin að stórefla efnahagsbrotadeildina? Eru stjórnvöld enn vanhæf til að taka á þessum risastóra spillingarvef sem teygir anga sína inn á þing.

Lánuðu sjálfum sér milljarða

Hvaða flokkur er Borgaraflokkurinn?

Er það Íslandshreyfingin? eða Borgarahreyfingin eða L-listi?

Fylgi Samfylkingar eykst

Borgarahreyfingin - nýtt stjórnmálaafl

Borgarahreyfingin kynnti framboð og stefnumál sín. Fréttir Stöðvar 2 og RÚV, Kastljósið og Mbl-Sjónvarp 4. mars 2009. 

 

 

Hvet ykkur til að lesa stefnuskránna okkar. Hún er að mörgu leiti einstakt plagg. Fjöldi fólks úr grasrótinni sem hefur verið að funda í sitt í hvoru lagi um landið allt lagði hönd á plóg við að gera þessa stefnu þess eðlis að hún taki á því sem almenningur vill að verði gert. Borgarahreyfingin er brú almennings inn á þing - við viljum afnema allar þessar hindranir sem búið að setja upp innan úr þingi.

 

Okkar markmið eru skýr - við viljum að ÞJÓÐIN skrifi sína stjórnarskrá. Ekki einhverjir útvaldir heldur verði tekið slembiúrtak úr þjóðskrá.  Við viljum afnema 5% þröskuldinn, við viljum að öll atkvæði hafi sama vægi. Við viljum persónukjör þvert á alla flokka. Ekkert er eðlilegra en að prófkjör fari fram inni í kjörklefa. Í mínum huga er fátt þó mikilvægara en að hér verði komið á skýrum reglum um þjóðaratkvæðagreiðslum - þar sem u.þ.b. 7% þjóðarinnar getur kallað eftir slíkri atkvæðagreiðslu um málefni er varða þjóðarhag. Þá er nauðsynlegt aðhald fyrir þingheim sú vissa að við getum beitt annarri aðferð en byltingu að til að láta rjúfa vanhæft þing eins og við upplifðum nýverið. 

 

Auðvitað er líka mikilvægt að koma með lausnir á þeim brýnu efnahagslegu vandamálum sem við stöndum frammi fyrir sem þjóð - því var mikill fengur að fá hagfræðinga til liðs við okkur sem hafa ekki fetað hefðbundna slóða heldur hafa þorað að gagnrýna þetta gjörspillta kerfi sem við búum við. 

 

Það er líka mikilvægt að fólk viti að við erum hreyfing sem hefur það markmið að ná þessum grundvallarbreytingum í gegn og þegar við höfum náð þeim markmiðum þá munum við leggja þetta framboð niður. Við erum fólk sem hefur barist fyrir því að uppræta spillingu og okkar markmið er að færa valdið aftur til almennings. En það er afar mikilvægt að almenningur taki þátt í að byggja upp nýtt Ísland - þess vegna erum við opin fyrir því að fá til liðs við okkur fólk sem lætur sig samfélagið sitt varða án þess að eiga einhverja hagsmuni í húfi. Það er ekki hægt að ætlast til þess að þeir sem mögulega nutu fyrirgreiðslu hjá þeim fyrirtækjum sem talin eru vafasöm, rannsaki sig sjálfa. 

 

Ég skora á fólk sem verkjar í sálina út af þeirri siðspillingu sem hér gapir við okkur dag hvern, að koma til liðs við okkur - bjóðið ykkur fram - það er kannski ekki mjög spennandi að setja sjálfan sig í eldlínuna og eitthvað sem ég til dæmis er með hnút í maganum út af - en ég ætla samt að gera það - ég get ekki ætlast til þess að einhver annar breyti samfélaginu fyrir mig ef mér hugnast ekki hvernig það er. 

 

Það er svo mikilvægt að við fáum þverskurð af samfélaginu til liðs við okkur að hrinda þessum breytingum í framkvæmd - ég skora á alla þá sem láta sig þetta land og þessa þjóð sig varða að vera með. Þegar við svo höfum náð þessum breytingum í gegn - þá losnum við að sitja uppi með æviráðna pólitíkusa inn á þingi. Held að það sé hverjum manni gott að vera á almennum vinnumarkaði og takast á við lífið án forréttinda. Líka fyrir fólk sem fer í opinber þjónustustörf í þingsölum. Þingið er okkar - Okkar þing - Okkar kerfi - Okkar ábyrgð.

Stefna Borgarahreyfingarinnar – þjóðin á þing

Réttlæti  -  siðferði – jafnrétti

Gripið verði til neyðarráðstafana í þágu heimila og fyrirtækja

 

1. Alvarleg staða heimilanna verði tafarlaust lagfærð með því að færa vísitölu verðtryggingar handvirkt fram fyrir hrun hagkerfisins (janúar 2008) og hækkanir höfuðstóls og afborganir húsnæðislána til samræmis við það. Raunvextir á verðtryggðum lánum verði að hámarki 2% - 3% og afborgunum af húsnæðislánum verði hægt að fresta um tvö ár með lengingu lánsins um þann tíma. Náð verði samkomulagi við eigendur verðtryggðra húsnæðislána um að þeim verði breytt í skuldabréf með föstum vöxtum og verðtryggingarákvæði í lánasamningum verði bönnuð.

 

2. Leitað verði leiða til að leysa myntvanda Íslands með myntbandalagi við aðrar þjóðir eða ef með þarf með einhliða upptöku annars gjaldmiðils.

 

3. Atvinnulaust fólk verði hvatt til að stunda vinnu með samfélagslegu markmiði til að koma í veg fyrir að tengsl þess við vinnumarkaðinn rofni.  Sett verði á stofn víðtæk aðstoð við atvinnulausa um allt land með það að markmiði að aðstoða þá að nýta atvinnuleysið.

 

4. Illa skuldsett fyrirtæki verða boðin til sölu og tilboðum aðeins tekið ef ásættanlegt verð fæst. Annars verði starfsfólkinu leyft að taka yfir lífvænleg fyrirtæki sem ekki fæst ásættanlegt verð fyrir. Skuldir eigenda verði ekki felldar niður sjálkrafa en nota á endurreisnarsjóð atvinnulífsins til að veita hagstæð lán og breyta skuldum lífvænlegra fyrirtækja í hlutafé í eigu ríkisins frekar en að afskrifa skuldir.

 

5. Halla á ríkissjóði verði mætt með endurskoðun skattkerfisins, m.a. með fjölgun skattþrepa, hátekjuskatti og breytingum á virðisaukaskatti, frekar en niðurskurði í heilbrigðis- og velferðarþjónustu.  AGS fái ekki að ráða ferðinni með stöðu ríkissjóðs.

 

6. Strax verði hafist handa við að meta heildarskuldir þjóðarbúsins og að því loknu gert upp við lánardrottna eftir bestu getu og skynsemi.  ICESAVE reikningar Landsbankans og aðrar skuldir bankanna erlendis verði ekki greiddar fyrr en álit óháðra sérfræðinga liggur fyrir um skyldur Íslands og m.t.t. þess að sennilega hafi verið um svikamyllu að ræða en ekki eðlilega bankastarfsemi. Rannsakað verði hvað varð um allar innlagnir á reikningana, fjármunirnir sóttir og þeim skilað til eigenda. Stjórnendur og eigendur bankanna verði gerðir persónulega ábyrgir fyrir því sem vantar upp á.  Samið verður um það sem út af stendur m.t.t. neyðarástands og reynt að fá þær skuldir niðurfelldar.  Samhliða því verði gefið loforð um framlag af hálfu Íslands sem nemi 2% af VLF, renni til þróunaraðstoðar á ári næstu tíu ár til að sýna góðan vilja íslendinga til að verða ábyrg þjóð meðal þjóða.

 

Landsmenn semji sína eigin stjórnarskrá

 

1. Þjóðaratkvæðagreiðsla skal fara fram um mál er varða þjóðarhag óski tiltekinn minnihluti þjóðarinnar þess. Sama gildir um að rjúfa þing.

2. Bera skal alla samninga undir þjóðaratkvæðagreiðslu sem mögulega framselja vald.

3. Rofin verði óeðlileg hagsmunatengsl milli viðskiptaheims og þingheims.

4. Viðurkenna skal þau sjálfsögðu mannréttindi sbr. 1. gr. Mann-réttingayfirlýsingar S. Þ. að vægi atkvæða í alþingiskosningum verði jafnt enda væri það í samræmi við hugmyndir um að auka vægi þjóðaratkvæðis um einstök mál enda augljóst að ekki væri hægt að láta suma landsmenn hafa meira vægi en aðra við þjóðaratkvæðagreiðslu.

5. Fjöldi þingmanna miðist við fjölda á kjörskrá í hlutfallinu 1/4000 sem væri í samræmi við algengt hlutfall í öðrum löndum. Þetta myndi þýða nokkra fækkun þingmanna í dag en hægfara fjölgun þeirra í framtíðinni með vaxandi fólksfjölda sem væri rökrétt.

6. Kjördæmaskipan verði endurskoðuð og kjördæmum fækkað á suðvesturhorninu.

7. Tryggð verði skipting valdsins milli löggjafarvalds og framkvæmdavalds, m.a. þannig að ráðherrar sitji ekki á þingi.

 

8. Ráðherrar, þingmenn og æðstu embættismenn framkvæmdavaldsins, nema dómarar, gegni embætti í mesta lagi í átta ár eða tvö kjörtímabil samfellt.

 

9. Fyrsta málsgrein 76. greinar stjórnarskrárinnar verði breytt til samræmis við   Mannréttindayfirlýsingu S. Þ. um réttinn til lífskjara sem nauðsynleg eru til verndar heilsu og velliðan allra. Grein 76 muni þá hljóða svona eftir breytingu. “Öllum skal tryggður rétttur til grunn lífskjara sem nauðsynleg eru til verndar heilsu og lífsviðurværi þeirra sjálfra og fjölskyldu þeirra Grunn lífskjör teljast vera nauðsynlegt fæði, hreint vatn, klæði, húsnæði, læknishjálp og nauðsynleg félagsleg þjónusta, svo og réttur til öryggis vegna atvinnuleysis, veikinda, fötlunar, fyrirvinnumissis, elli eða annars sem skorti veldur og menn geta ekki við gert.” Öllum skal tryggður í lögum réttur til almennrar menntunar og fræðslu við sitt hæfi. Börnum skal tryggð í lögum sú vernd og umönnun sem velferð þeirra krefst.

 

10. Allar náttúruauðlindir verða í þjóðareigu og óheimilt að framleigja þær nema tímabundið og þá aðeins með viðurkenndum gagnsæjum aðferðum þar sem fyllsta jafnræðis og arðs er gætt.

 

Trúverðug rannsókn undir stjórn og á ábyrgð óháðra erlendra sérfræðinga á íslenska efnahagshruninu verði hrundið af stað og fari fram fyrir opnum tjöldum. Frysta eignir grunaðra auðmanna STRAX meðan á rannsókn stendur

 

1. Tafarlaust verði sett í gang opinber rannsókn undir stjórn erlendra sérfræðinga á hruni íslenska efnahagskerfisins.  Samhliða því verða sett afturvirk lög sem leyfa ógildingu allra fjármálagerninga undanfarinna tveggja ára þ.m.t. gerninga skilanefnda bankanna, og í undantekningartilfellum lengra aftur í tíma ef sýnt er að um óeðlilega gjörninga hafi verið að ræða þar sem félag og/eða eigandur þess hafi verið með þeim hætti leitt af sér skaða fyrir íslenskt efnahagslíf. Í þeim tilfellum verður ákvæði hlutafélagalaga um takmarkaða ábyrgð eigenda fellt niður.

Lögfest verði fagleg, gegnsæ og réttlát stjórnsýsla

 

2. Ráðningatími (skipunartími) og þ.a.l. uppsagnarfrestur allra embættismanna sé í samræmi við það sem almennt gerist hjá stjórnendum á vinnumarkaði skv. nánari útfærslu sem verði í höndum Kjararáðs.

 

3. Tiltekinn minnihluti þingmanna geti boðað til þjóðaratkvæðagreiðslu um lagafrumvörp sem Alþingi hefur samþykkt.

 

4. Hæfi umsækjenda um störf hæstaréttar- og héraðsdómara verði metið af hlutlausri fagnefnd skipaðri af Alþingi eftir tilnefningu hæstaréttar. Fagnefndin geti lagt fyrir umsækjendur próf til að skera úr um þá hæfustu og að ráðherra beri að velja dómara úr hópi þeirra sem fagnefndin telur hæfasta.

 

5. Æðstu embættismenn verði valdir á faglegum forsendum.

 

6. Fastanefndir þingsins verði efldar. Nefndarfundir verð almennt haldnir í heyranda hljóði. Gerð verði krafa um að fastanefndir afgreiði öll mál og skili niðurstöðu innan ákveðins tíma.

 

7. Settar verði siðarreglur fyrir alþingismenn, ráðherra og æðstu embættismenn framkvæmdavaldsins sem m.a. geri grein fyrir eign sinni í fyrirtækjum og stjórnarsetu fyrir kosningar og upplýsi umsvifalaust um allar breytingar á þessu sviði.
Við viljum innleiða hugtakið : pólitísk ábyrgð

Lýðræðisumbætur STRAX

1. Stjórnlagaþing fólksins í haust

2. Persónukjör til Alþingiskosninga

3. Afnema 5% þröskuldinn

4. Þjóðaratkvæðagreiðslur

5. Ný framboð fái sama tíma í fjölmiðlum og sama stuðning og aðrir stjórnmálaflokkar

 

Borgarahreyfingin leggur sig niður og hættir störfum þegar þessum markmiðum hefur verið náð eða augljóst er að þeim verður ekki náð

Hagfræðingur af öðru tagi

Þór er einstakur hagfræðingur með djúpstæðari skilning á þeim vanda sem við erum að kljást við en gengur og gerist. Hef verið svo lánsöm að vinna með honum að hugmyndavinnu sem tengist lýðræðisumbótum, ásamt alveg frábærum hóp af fólki sem varð til þegar veröldin hrundi í september. Við höfum rætt mikið um lausnir og hvernig það sé best að virkja almenning til að láta sig varða meira um samfélag sitt. Það er nefnilega þannig að ef það er eitthvað að í samfélaginu þá er besta verkfærið sem við höfum sem almenningur að gera eitthvað til að breyta því.

Ég vona að þetta framboð - þessi hreyfing verði eins og mig dreymir um að hún þróist - vettvangur almennings til að fá sína rödd - sína hagsmuni inn á þing. Hér hefur ríkt eitthvað sem kalla mætti flokksræði. Hér hefur fengið að grassera hagsmunatengsl á milli viðskiptaheims og þingheims. Hér er spillingin svo almenn og hefur sýkt allt samfélagið að við erum hætt að taka eftir henni eða bregðast við henni. Við verðum að fá í gegn nauðsynlegar umbætur og breytingar á stjórnarskrá og kosningalöggjöf - við verðum að uppræta spillinguna og það gerum við aðeins með því að fá inn á þing fólk sem á enga hagsmuni eða á í óeðlilegum tengslum við þá sem þarf að rannsaka og jafnvel sakfella. 

Ísland líkist fyrrum Afríkunýlendum

Yfirlýsing Borgarahreyfingarinnar – þjóðin á þing

Refsingin fyrir að hafna þátttöku í stjórnmálum er að þér verður stjórnað af verra fólki en sjálfum þér.

Plato 

  

Borgarahreyfingin – þjóðin á þing, stefnir á framboð í öllum kjördæmum undir listabókstafnum O. Borgarahreyfingin samanstendur af breiðfylkingu fólks sem á fátt annað sameiginlegt en að vera virkir borgarar í lýðræðissamfélagi. Efnahagshrunið í haust og vanhæfni stjórnvalda til að taka á því, varð til þess að leiða saman þann ólíka hóp sem stendur að Borgarahreyfingunni. Innan hreyfingarinnar er fólk með fjölbreyttan bakgrunn, ólíkar lífsskoðanir, sem býr við mismunandi kjör víðsvegar á landinu.

 

Nánast allar stofnanir sem almenningur treysti til að gæta hagsmuna sinna brugðust. Enginn sætti ábyrgð og enginn hefur verið kallaður til ábyrgðar. Borgarahreyfingin er stjórnmálaafl sem sinnir hagsmunavörslu fyrir einn hóp – þjóðina – og hefur eina meginreglu að leiðarljósi: að færa völdin frá flokkræði til lýðræðis sem er róttæk skynsemi.

Borgarahreyfingin – þjóðin á þing var stofnuð til að hrinda í framkvæmd eftirfarandi meginatriðum:

• Alvarleg staða heimila og fyrirtækja verði tafarlaust lagfærð.
  
• Þjóðaratkvæðagreiðsla skal fara fram um mál er varða þjóðarhag óski tiltekinn minnihluti þjóðarinnar þess. Sama gildir um að rjúfa þing.
  
• Bera skal alla samninga undir þjóðaratkvæðagreiðslu sem mögulega framselja vald.
  
• Rofin verði óeðlileg hagsmunatengsl milli viðskiptaheims og þingheims.
  
• Tryggð verði skipting valdsins milli löggjafarvalds og framkvæmdavalds, m.a. þannig að ráðherrar sitji ekki á þingi.
  
• Allar náttúruauðlindir verða í þjóðareigu og óheimilt að framleigja þær nema tímabundið.
  
• Trúverðug rannsókn undir stjórn og á ábyrgð óháðra erlendra sérfræðinga á íslenska efnahagshruninu verði hrundið af stað og fari fram fyrir opnum tjöldum. Frysta eignir grunaðra STRAX meðan á rannsókn stendur.
  
• Landsmenn skrifi sína eigin stjórnarskrá.

• Við í Borgarahreyfingunni erum sammála um, að sama hvar í flokki þingmenn standa, munu þeir leitast við að halda þeim völdum sínum áfram.
  
• Við treystum þeim því ekki til að færa völdin frá flokkunum til þjóðarinnar, sama hverju þeir lofa.

• Við erum líka sammála um að þeim er ekki treystandi til að rannsaka efnahagshrunið ef rétt reynist að þeir hafi margir hverjir fengið óeðlilegar fyrirgreiðslur hjá fjármálastofnunum.
  
• Við þjóðin þurfum okkar þrýstihóp inn á þing og sameiginlega munum við beita þrýstingi innan þess sem utan.
  
• Ef landsmenn, treysta flokkunum til þess að takmarka völd sín og rannsaka eigin sök á efnahagshruninu þá kjósa þeir bara einn þeirra.
  
• Ef þeir hins vegar treysta því fólki best til verksins sem búið er að standa vaktina frá upphafi hrunsins. Fólkinu sem þegar hefur sýnt einlægan vilja til að koma á breytingum, þá biðjum við hér með um þeirra stuðning í komandi kosningum.
  
• Við erum valkostur fyrir þá sem eru orðnir þreyttir á sömu frösunum, sömu andlitunum, sömu lausnunum og vilja gegnsætt réttlæti. Jafnframt viljum við hvetja alla þá sem stóðu vaktina með okkur á Austurvelli og á Borgarafundum að hjálpa okkur með því að  bjóða sig fram.

Vilja gegnsætt réttlæti