Argaþras vs innri friður

Ég er snillingur að koma mér í vandræði og hef fengið duldar hótanir um kærur á mig fyrir að birta bréfið hennar Arnþrúðar... því ætla ég að fjarlægja allt af blogginu er tengist henni og nenni ekki tala um þetta, vil frekar beina kröftum mínum í eitthvað uppbyggilegt og ætla að drífa mig á borgarafund klukkan 20 í IÐnó...

lifi byltingin innra með okkur...

svona til útskýringar þá er þetta ástæðan fyrir að ég lokaði fyrir færslurnar:

"Sæl Birgitta. Ég veit ekki um hvað málið snýst nema það sem kemur fram á bloggi þínu. En ég vil benda þér á að þú ert að brjóta lög um persónuvernd í tvígang. Fyrst með ummælum um að Arnþrúður hafi reynst mömmu þinni illa. Ef þú getur ekki sannað það fyrir dómi þá má búast við að það verði dæmt sem rógburður og þú krafin skaðabóta. Í öðru lagi með því að birta einkabréf á bloggi þínu.

mér sýnist þetta ekki viturlegt hjá þér og kalla yfir þig skaðabótaábyrgð og sennilega það að moggabloggið er í fullkomnum rétti að loka blogginu þínu ef Arnþrúður snýr sér til þeirra.

þú skalt leita til persónuverndar á personuvernd.is og spyrjast fyrir. fólkið þar gefur góð svör um hver réttarstaða þín er."

27. okt. 2008 17:42 

 

mér finnst mikilvægt að við einbeitum okkur að þeim brunarústum sem samfélag okkar er. ég ætla að athuga hvort að það sé eitthvað til í því að ég megi ekki birta tölvupóst áður en ég set bréfið aftur inn.. en svo er líka mikilvægt að muna að núna er tími þar sem öll okkar sem viljum breytt samfélag gerum allt sem við getum til að leggja drög á því, að eiga í argaþrasi við Arnþrúði eða aðra á opinberum vettvangi en bara eitthvað svo tilgangslaust. En það er vissulega skoðandi sem ég hef heyrt að láta athuga hvort rétt sé að hún tali illa um og fari með rógburð um fólk á útvarpstöð þeirri sem hún hefur umsjón yfir...ætli það sé ekki líka brot á persónuvernd samkvæmt því sem Salvör heldur fram?

 

Gaman væri ef einhver lögfróður gæti upplýst mig um þetta....

 

með björtum kveðjum 

birgitta

 

 

Ávarp Guðmundar Beck

Ég fékk þessa frábæru ræðu frá honum Guðmundi Beck sem hann flutti á Akureyri á mótmælafundi sem þar var... hvet ykkur til að lesa hana, því hún setur hlutina í ágætt samhengi.

Svo vil ég bara þakka fyrir allan stuðninginn sem ég hef fengið í dag og vil bara segja að ég vil engu fólki neitt ill og sendi sumum bara hlýja strauma, sér í lagi toppunum í samfélaginu og einni konu.

Og svo vil ég líka segja það að ég þrái ekkert frekar en samstöðu meðal manna og held að það sé alveg möguleiki á að okkar yndislega mótmælafólk sé að komast að jákvæðri niðurstöðu fyrir almenning eins og mig. Annars þá langar mig helst að rækta fúlegg og fá mér heykvísl en fattaði svo að við erum öll ábyrg, hvað er samfélagið annað en við. Gerum eitthvað uppbyggilegt, búum til meðal úr þessu eitraða krepputíma og það mikilvægasta af öllu: við verðum að rækta með okkur samfélagsvitund, hún er í molum hjá okkur og ef við ræktum og þroskum hana, þá eigum við von:)     En hér er ræðan hans Guðmundar birt með leyfi hans:

   Ágæta samkoma!

  Ég finn mig knúinn til að ávarpa ykkur hér í dag. Við erum hér saman komin á alvarlegum tímamótum í sögu ungrar þjóðar. Á aðeins 17 árum höfum við lifað nýja Sturlungaöld þar sem misvitrir valdagráðugir menn hafa misbeitt valdi sínu og sóað auðlindum þjóðarinnar svo horfir við örbirgð komandi kynslóða ef ekki verður spyrnt við fótum.
   Gamalt máltæki segir að oft ratist kjöftugum satt á munn og svo hefi ég mátt því miður reyna síðan ríkisstjórn Íslands og 44 alþingismenn samkvæmt fyrirmælum frá Davíð Oddssyni og Halldóri Ásgrímssyni gáfu út lög um hryðjuverkin á Austurlandi, Kárahnjúkavirkjun og álfabrikku Alcoa. Meira en 200 milljörðum af erlendu fé eða um 2 milljónum á hvert heimili var veitt inn í íslenzkt efnahagslíf og helmingurinn af því með ríkisábyrgð. Þetta reyndist hinum sprenglærðu fjárglæframönnum í höfuðborginni nægur eldsmatur til að kynda undir falsbréfasölunni og gefa út ávísanir á auðlindir Íslands út þessa öld. Síðan fengu þeir í hendur þjóðbankana og sjóði atvinnuveganna til að fullkomna áramótabrennu frjálshyggjukapítalistmans.
   Ég sagði strax að þetta væru hryðjuverk gegn íslenzku samfélagi þar sem öllu er menn hafa verðið að reyna að byggja upp frá upphafi sjálfstæðisbaráttu var kastað í eldinn og Kárhnjúkahryðjuverkin yrðu myllusteinn um hálsinn á komandi kynslóðum. Það var einnig sárt að verða þess áskynja að ekkert nema sulturinn virtist geta kennt þjóðinni að velta af sér þessu oki og komast til raunveruleikans á ný.
   Þeir sem vöruðu við afleiðingum hryðjuverkanna, græðgisvæðingunni, sóun auðlinda og viðskiptahalla voru kallaðir öllum illum nöfnum s.s. óvinir framfara, sérvitringar, talibanar, letingjar og sakaðir um að ætla að færa þjóðina aftur í torfkofana þar sem hún drægi fram lífið á fjallagrösum.
   En hvar stöndum við nú? Ég sagði við upphaf Kárahnjúkahryðjuverkanna að verið  væri að færa íslenzka þjóð 70 ár aftur í tímann. Ég sé ekki betur en það sé að rætast með því að næstu kynslóðir sitja hér uppi með skuldahalann af óráðsíunni um ókomin ár.
   Og hver eru ráðin sem brennuvargarnir gefa, t.d. Jón Hannibalsson og Halldór Ásgrímsson? Takið eftir því góðir tilheyrendur! Það eru sömu úrræði og eftir Sturlungaöldina fyrri, að koma íslenzkri þjóð undir erlent vald og að halda áfram skuldasöfnuninni og auðlindasóuninni. Þeir ætla að koma þjóðinni aftur undir erlent vald sem kostaði okkur fyrr, meira en sex alda áþján, svo þeir sjálfir geti hreiðrað um sig sem embættismenn þess sama valds og haldið þannig áfram að reyra ykkur í fjötra skulda og niðurlægingar.
   Hlustið ekki á þessa menn sem leitt hafa þjóðina í verstu ógöngur af mannavöldum. Vonandi eruð þið að átta ykkur á að það var ekki verið að nýta auðlindir landsins í okkar þágu. Það var verið að sóa auðlindum og spilla landinu í þágu erlendra hergagnaframleiðenda og fámennrar valdastéttar falsbréfasalanna. Það var gert með valdníðslu, lögbrotum, mútum og mannfórnum. Það er ekki auðlindanýting að spilla fallvötnum og fiskimiðum og búa til 60 ferkm. leirflag á best gróna hálendissvæði Íslands með tilheyrandi loftmengun frá lóni og fabrikku. Það er ekki auðlindanýting að gefa hergagnaframleiðendum 20% orkunnar úr borholum háhitasvæðanna meðan mestur hlutinn rýkur út í andrúmsloftið með tilheyrandi loftmengun.
   Nú rísum við upp og segjum hingað og ekki lengra. Það er þegar búið að gefa Gullfoss og Grímsey. Látum ekki þá sem bera ábyrgð á hryðjuverkunum stjórna lengur. Líf okkar í nútíð og framtíð byggir á auðlindum fiskimiðanna og gróðurmoldarinnar ásamt þeirri lífsorku sem við fáum frá fegurð og hrikaleik landsins, ógnum þess og unaðsemdum. Þessum auðlindum verðum við að ráða sjálf ef við viljum skapa okkur vænlega framtíð í þessu landi. Hrindum af okkur oki þeirra manna sem vilja kasta frá okkur auðlindum landsins og sjálfstæði þjóðarinnar. Okkur ber að skila þeim til næstu kynslóðar svo hún geti fætt sig og klætt í þessu landi. Gleymið ekki spilltum verkalýðsleiðtogum sem hafa hrópað hæst á meiri auðlindasóun og lagt blessun sína yfir þrælahaldið og mannfórnirnar við Kárahnjúka í þágu auðvaldsins og heimta nú sem aldrei fyrr afsal sjálfstæðis þjóðarinnar og forræðis yfir auðlindunum.
   Tökum höndum saman, ryðjum burt öskuhrúgunni og bykkjum upp réttlátt þjóðfélag sem byggir á sjálfbærri nýtingu auðlinda, samhjálp og jöfnuði. Látum gullglýjuna aldrei aftur teyma okkur út í foraðið. Látum aldrei af höndum forræði yfir auðlindum landsins. Okkur ber að skila þeim sem minnst spilltum til næstu kynslóða sem vilja búa hér við fæðu klæði og frið.

                                    Íslandi allt!


25. okt. 2008

Arnþrúður Karlsdóttir hótar mér

Fékk þennan póst frá Arnþrúði Karlsdóttur í nótt: "Birgitta. Lengi skal manninn reyna segir gamalt og gott máltæki og sannarlega á það við um þig núna. Ég er viss um að móðir þín snýr sér við í gröfinni yfir þeim ummælum sem þú viðhefur um mig. Viltu að ég segi sannleikann um þig og hvernig þú komst fram við hana??????? Þetta verður þér dýrkeypt..AK"

Ég hef bara einfalt svar við þessu: gjörðu svo vel, ég hef ekkert að fela gagnvart sambandi mínu og mömmu, það gekk oft á ýmsu hjá okkur enda átti mamma við sjúkdóm að stríða sem kenndur er við áfengissýki og samband okkar oft harla stormasamt út af því, uns mér tókst að vinna með mína meðvirkni og læra að aðgreina sjúkdóminn frá manneskjunni. En við mamma áttum fallegt samband undir lokin og það fær enginn tekið það frá mér, sér í lagi ekki kona sem mamma talaði ekki við undir lok æviskeiðs síns, þrátt fyrir langa vináttu.

Að sjá það sem gott er:)

Skemmtilegt að fólk geri eitthvað til að létta sér lund. Það er svo sannarlega af nógu að taka í þessu leikhúsi fáránleikans sem við virðumst vera stödd í þessa dagana.

Í gær fórum við yngri sonur minn í göngutúr út í myndbandsleigu hér í vesturbænum. Hún heitir 107 Reykjavík og er ein af þessum fáu sem enn eru í eigu einstaklinga en ekki bónusvídeó keðjunnar. Við förum afar sjaldan á myndbandsleigur en þegar við gerum það, þá verður það að smá ævintýri. Við vorum með frostbit í kinnum eftir ágætlega langan göngutúr og ákváðum að fá okkur Hulk og Ironman. Það kostaði bara 550 krónur og þegar við vorum búin að borga þá bauð starfsstúlkan okkur að fá ís í kaupbæti að eigin vali. Við urðum auðvitað alveg himinlifandi og þakklát. 

Hvet fólk að versla við kaupmanninn á horninu, því þar er oftast besta þjónustan og síðast en ekki síst, þá eru hlutirnir oft á betri kjörum þar :) Langaði bara að þakka fyrir mig, því það er fátt betra en að finna til þakklætis.

Mér líður pínupons eins og innra með mér búi Hulk sem þurfi að fá útrás fyrir það sem undan er gengið, held að það verði ágætt að skreppa í kyndilgöngu á eftir og finna að maður er ekki einn um að vera nóg boðið. Ætla að taka ömmu með mér. 

Innstæður frystar

Gullmoli dagsins

„Síðasti seðlabankastjóri var skipaður af mér, ég man ekki betur en að það hafi verið gert á faglegum forsendum,“ svaraði Geir H. Haarde spurningu blaðamanns um hvort næsti seðlabankastjóri yrði ráðinn á faglegum forsendum.

Spyrillinn vitnaði í áskorun starfsmanna Seðlabanka áður en Davíð Oddsson var ráðinn, en starfsfólk bankans var víst svo ferlega frekt að vilja að nýr seðlabankastjóri yrði ráðinn á faglegum forsendum.

En Geir er sannfærður um að það hafi verið faglegt að ráða sinn fyrrum yfirmann í þessa stöðu þegar hann tók við hans stöðu. Síðan komst Geir í þá skemmtilegu stöðu að verða yfirmaður Davíðs. Það að hann væri ekki sérfræðingur í fjármálum er aukaatriði þegar hægt er að hygla að sínum fyrirmyndum. 

Vá, hvað þetta er bara of mikil sifjaspell til að ég þoli að horfa fram hjá þessu lengur. Hvað vorum við að spá, að æmta ekki og skræmta þegar spillingin var svona rosalega augljós.

Lifi bananinn!!!!

Óska formlega eftir aðstoð IMF

Er hægt að kalla okkur sjálfstæða þjóð?

Ég er búin að vera með nagandi tilfinningu innra með mér undanfarna daga, sú tilfinning hefur ágerst og er nánast lamandi við að lesa þessa frétt. Hún áréttir þá grunsemd að við séum búin að glata að fullu sjálfstæði okkar enda fórum við hroðalega illa með það. Þrælar hafa ekki frelsi, sá skuldaklafi sem við eigum að standa undir er ekkert annað en þrældómur. Því er það ljóst að við erum ekki lengur sjálfstæð, við erum ekki frjáls, þrælaeyjan hin nýja. Yfir mig hellist einkennileg sorg sem ég get ekki útskýrt með orðum.

Elsku þjóðin mín, við getum ekki látið þetta ganga svona, við verðum að koma þessu fólki frá. Ef ríkisstjórnin væri krakki sem hefði sullað niður miklu magni af sykurdrykk og krefðist svo að fá að þurrka það upp, hvernig væri þá sú hreinsun? Frekar klístruð og sennilega hefði hún gert illt verra. Ég votta þjóð minni samúð, í dag missum við það dýrmætasta sem við áttum, sjálfstæði, frelsi og æru. 

Ég veit að sennilega mun enginn hafa dug eða trú á að viðkomandi geti gert eitthvað til að hreinsa upp hið klístraða sull þingheims... ég veit samt að slíkt fólk er til, aðalatriðið í dag er að fólk losi sig undan klöfum flokkspólitíkur og fari að hugsa sjálfstætt... það er eiginlega okkar eina von í þessari vonlausu stöðu.

 

 

Hroðalega þröngir kostir

Bananlýðveldið Ísland

Mér hefur alltaf liðið eins og útlaga hérlendis. Ég hef ekki getað fundið það í mér að tilheyra klíkum eða nýta mér vensl til að fá betri þjónustu. Ég hef alltaf hafnað klíkuskapnum og fyrir vikið er maður einskonar holdsveikisjúklingur í hugum margra.

Ég veit að hér verður ekkert alvöru uppgjör. Til þess að slíkt uppgjör gæti átt sér stað þyrftum við að vera harla hugrökk og afnema fjölskyld- klíku- vina- flokkshollustu. Ég er ekki að sjá það gerast. Ef ég skoða afneitunarferlið sem er í gangi varðandi hver ber ábyrgð þá er ljóst að notuð verður séríslenska aðferðin, "ha ég, ekki satt, það var "blíb" sem stal ærunni frá þjóðinni í gær... og svona gengur þetta koll af kolli uns auðljóst er að enginn gat mögulega borið ábyrgð, því það var enginn annar en jólakötturinn sem át æruna þegar hann fattaði að það var enginn innistæða fyrir henni.

Ég veit að við munum áfram keyra á skyndilausnum. Afnemum umhverfismat og leggjum helst niður ráðuneyti umhverfis til að spara. Leggjum aftur niður mannréttindastofu og burt með alla útlendinga mun kveða við, sumt af þessu er nú þegar byrjað að kveða við sem er vægast sagt skammarlegt.

Hvar erum við eiginlega stödd þegar eina fólkið sem þjóðin treystir eru þingmenn sem eru sestir á helgan stein? Ekki það að mér finnist Jón Baldvin ekki skelleggur og hafi gefið greinagóð svör. 

Við munum áfram sitja uppi með meiri hollustu við flokka heldur en heiðarleika, málefni og heilindi.

Sifjaspell nátengingar og krossbanda eru á þeim skala að hægt væri að segja að við höfum sett enn eitt heimsmetið samkvæmt höfðatölu.

Hvernig verður hið nýja Ísland? Verður það eitthvað öðruvísi? Munum við hafa vilja og þor til að breyta hugsunargangi okkar, neysluvenjum og gildismati? Nú er svo komið að við getum ekki, hvorki sem þjóð né mannkyn, tjaldað til einnar nætur. Það er afar mikilvægt að fólk, ekki bara hér heldur um gjörvalla veröld endurskoði gildismat sitt á lífsgæðum. Staðreyndin er þessi: ef við höldum áfram á sömu braut neyslu þá verður ekki til nægilega mikið af jörðinni til að metta okkur öll, hvað þá halda áfram á þeirri tæknivæddu braut sem við höfum lagt svo mikið í. Núna lifum við í veruleika ótta, ótta við aðrar þjóðir, ótta við að það sé ekki til nóg fyrir alla, ótta við hryðjuverk og ótta við þá sem hafa ekki arkað í hjólför græðgisvæðingar. Við óttumst nánast allt og við óttumst ekkert frekar en óvissuna. En óvissan er hluti af lífsins gangi, það er alltaf óvissa, það er ekki til neinn morgundagur aðeins þessi stund. Það veit enginn hvað morgundagurinn ber í skauti sér. En það að vita ekki hvað morgundagurinn ber í skauti sér er gott fyrir okkur og ágæt áminning um að láta ekkert ógert í dag sem við getum framkvæmt í dag. Nýtum okkur þessa óvissu til að gera byltingu í hjarta okkar. Ræktum hjartavöðvann, hann er miklu traustari en ef hausinn okkar ræður einn för, því ekkert hefur gert okkur meiri grikk en að halda að vitsmunir okkar einir geti leyst vandamál heimsins. Horfið bara í kringum ykkur og sjáið hve jörðin er sviðin af eiginhagsmunasemi og hroka þeirra er hugsa án siðferðis- og réttlætiskenndar. 

Ég held að kvendi við stjórn séu ekki endilega lausnin, heldur hygg ég að þeir sem eru hjartahreinir og eigi engra hagsmuna að gæta séu þeir sem ættu að leiða þetta land okkar inn í nýja tíma. En eru þannig manneskjur til hérlendis? Auðvitað, ykkar er að koma auga á þetta fólk, fólk sem hefur unnið baksviðs að því að hjálpa öðrum, þeir sem hafa unnið baksviðs af alúð og umhyggju fyrir þeim sem minna mega sín og aldrei kallað á athygli fyrir það. Þannig fólki myndi ég treysta fyrir landinu okkar. 

Kalla eftir alvöru fjölmiðlaumfjöllun

Á tímum sem þessum þarf maður trausta fjölmiðla sem eru ekki málgagn þeirra sem réðu för í spillingarleiknum mikla. Staðan er því miður þannig að allir helstu fjölmiðlar landsins eru undir stjórn útrásarvíkinga og stjórnmálamanna sem tóku þátt í áhættuleik sem enn er engan veginn lokið.

Ég vil fá að skipta þessu fólki út úr brúnni, henda öllum flokkum út í hafsauga og kjósa einstaklinga. Ég treysti ekki þeim er telja að það sé þjóðinni fyrir bestu að vita ekki nákvæmlega hver staðan er. Ég treysti ekki þeim sem semja ekki fyrir opnum tjöldum, ég treysti ekki þeim sem neyta okkur um að fá að kjósa. Ég fer fram á afsökun til þjóðarinnar fyrir öll mistökin og afglöpin. Ég lýsi vantrausti á alla víkinga og einveldinga á þingi, í bönkum, í útrás. 

Ég kalla eftir rannsóknablaðamennsku, ég kalla eftir réttum fréttum. Í gær voru mótmæli, sem ég reyndar komst ekki á, en eldri sonur minn fór á. Hann sagði mér að þarna hefðu verið 2000 eða fleiri. Allir fjölmiðlar héldu því fram að þarna hefðu aðeins verið 500 manneskjur. Ég verð að viðurkenna að ég treysti syni mínum betur sem og öðrum sem þarna voru betur heldur en fjölmiðlum, enda hafa þeir stundað lygar um langa hríð eða aðlögun sannleikans. Ég hef sjálf unnið hjá dagblaði og sá vinnubrögðin. Þau eru ekki vönduð og ekki hikað við að hagræða sannleikanum ef það mögulega selur fleiri blöð. 

Ég hef margoft orðið vör við að sannleikanum er hnikað í fjölmiðlum og veruleikinn afbakaður, síðan tekur fólk mark á þessu og myndar sér afstöðu útfrá því sem þar er sagt. Mér finnst eitt helsta áhyggjuefnið í dag að það vanti gagnrýna hugsun og hugrekki í fjölmiðlana.

Ég kalla eftir því að þeir fjölmiðlamenn og konur sem hafa enn einhverja sómatilfinningu og æru, mótmæli því að segja upplognar fréttir eða fréttir sem greinilega er verið að hagræða sannleikanum, hvort heldur að það sé til að selja fleiri blöð eða þóknast þeim er greiða þeim launin. 

Ég er alveg búin að fá nóg að lygum og hálfsannleika. Ég vil fá að vita hvar við stöndum, þjóðin þarf að vita hvar hún stendur. Við erum ekki lengur í miðju stormsins. Ég vil vita hvað er verið að bjóða Rússum og IMF í skiptum fyrir lán. Ég vil vita af hverju Norðmenn eru ekki búnir að hjálpa okkur. Ég vil fá kort yfir tengsl þeirra er nú leiða land og fjármálastofnanir.  Og síðast en ekki síst vil ég fá að kjósa, ég treysti ekki þeim sem frömdu glæpinn til að vera dómarar í sínu eigin máli.

Ég vil nota tækifærið og þakka þeim manneskjum sem hafa staðið vaktina og oft fengið illt fyrir. Ég vil þakka þeim fyrir hugrekkið og heiðarleikann. Það er vissulega umhugsunarefni af hverju enginn tók mark á þeim nema einstöku "svartsýnisfólk og úrtölufólk".

Útreið Íslands engin tilviljum

Mig langar að heyra sannleika frá vörum ráðamanna

Þeim hefur tekist að rugla mig svo hressilega í ríminu að ég veit ekki lengur hvort að ég eigi að hamstra eða ekki. Ég veit ekki hvort að allt sé gufað upp eða hvort að við séum stöndug. Ég veit ekki hvort að við erum lögð í alheimseinelti eða hvort að við höfum kallað þessa hörku yfir okkur.

Eitt veit ég þó að ég harma ekki að við komumst ekki í öryggisráðið. Við þurfum að sýna aðhald í fjármunum og höfum ekki efni á einhverjum útávið flottræfilshætti lengur.

Annars þá ætla ég að frumflytja fyrsta kafla Kreppuljóða á Rosenberg í kvöld í samfloti við biblíubeltishljómsveitina Southside, sem státar stormhviðum eins og Mikka Pollock og Ron Whitehead.

Mun líka lesa Wake up ljóðið mitt sem ég samdi fyrir 10 árum síðan og er akkúrat um þessa tíma sem við erum að fara í gegnum núna... það er ekki hægt að þýða það með góðu móti en ég bjó til heila ljóðalistaverkabók með þessum titli. Heimavinnubók sem ég saumaði með ærum sársauka að japönsku sniði... nú er í tísku að gera heimagert, það er eins og ég segi alltaf, ef ég þrjóskast við að vera í samhljómi við sjálfa mig þá kemst ég alltaf að lokum í tísku;) engin ástæða að eltast við slíkt....

 

 

 

Rétt að fara í framboðið

Kjósa takk

Mikið er rætt um, meðal annars hér á blogginu mínu að hér skulu ekki verða galdrabrennur. Það er sniðugt að nota þetta orð, runnið undan rifjum þeirra sem vilja að við tökum því sem hefur gerst hér án þess að segja neitt, gera neitt, eða krefjast neins. Kannski er vita gagnslaust að mótmæla, en ég hef séð það að ef nógu margir sýna í orði og á borði að þeir vilji breytingar að það virkar.

Ég vil ekki galdrabrennur, ég vil ekki tjarga neinn EN ég vil ekki að sama fólkið sjái um endurreisn sem felldi þetta samfélag. Ég held að fólk geri sér ekki grein fyrir hvaða áhrif allt þetta sukk og einkavinavæðingarbull hefur kallað yfir okkur.

Sumum finnst það rangt að krefjast þess að Davíð byrji á því að fara frá völdum. Allt eða ekkert segja sumir og satt best að segja hefði ég viljað að mótmælin á morgun myndu fjalla um allan pakkann... ég vil fá að kjósa, ég vil nýja stjórn yfir allan seðlabankann, ég vil að þeir auðmenn sem tóku þátt í fallinu fái að gjalda fyrir það, selji eigur sínar og borgi skuldir sínar til þjóðarinnar. 

Ég veit ekki hvort að fangelsi sé lausnin, en það væri ágætt ef við myndum senda þetta fólk út í Papey og leifum þeim að búa við meinlætalifnað um stund, eða fá þau í samfélagsþjónustu í nokkur ár. 

Ég hafði aldrei neitt sérstakt traust til ríkisstjórnar, banka eða auðmanna. Ég vil fá að kjósa, ég held að Þorgerður hafi rangt fyrir sér þegar hún reynir að bjarga eigin skinni og vill ekki leyfa okkur að kjósa fyrr en eftir 3 ár. Ríkisstjórnin og sér í lagi XD er vanhæft til að fara í naflaskoðun án þess að færa einhverjar fórnir. Þetta er eins og alki segist ætla að fara í meðferð eftir næsta fyllerí. 

Ég vil fá að kjósa, ég vil hreinsun, en ég verð að viðurkenna að ég held að ég muni skila auðu. Ég lýsi vantrú á allt og alla. Ég er þreytt á atvinnupólitíkusum, ég er þreytt á því að þeir sem stjórna hér eru í engum tengslum við veruleikann. Ég er þreytt á því að heyra stöðugt talað um veruleika minn af einhverjum greiningardeildum, af fólki sem getur ekki skilið hvað það er að missa allt og eiga ekki fyrir mat eða öruggt húsaskjól. 

Ég tek það fram að ég á ekkert og hef engu tapað, en þarf eins og aðrir að þrengja sultarólina, því allt hefur hækkað svo mikið, sér í lagi matvara og það er harla erfitt að sleppa því.  Ég hefði ekkert á móti því að styrkari stoðum yrði veitt undir okkar landbúnað. Synd að sjá öll gróðurhúsin sem eru að grotna niður í Hveragerði. 

Ég vil sjá alvöru breytingar hér, við þurfum að læra að vera sjálfbær, við þurfum að leggja metnað í að búa til samfélag sem er ekki háð olíu og nánast öllum hráefnum til að geta staðið af okkur storma af þessum tagi. 

Ég vil sjá alvöru samfélagsbreytingar, þar sem við lærum aftur að hafa samábyrgðartilfinningar og að samfélagsábyrgðin er ekki á fárra höndum. Samfélög okkar eru alltaf byggð á sjálfum okkur. Kannski ættum við að reka þjóðina eins og hún leggur sig. Ráðamenn segja að við höfum öll tekið þátt í sukkinu og svínaríinu og allir hafi notið góðs af góðærinu. Ef svo er ... þá erum við öll vanhæf.

Ísland standi við alþjóðlegar skuldbindingar

Ákall til þjóðarinnar

Ákall til þjóðarinnar - Davíð Oddsyni vikið frá störfum

Við mótmælum öll – Hittumst á Austurvelli á laugardag kl. 15. Vertu þáttakandi, ekki þolandi. Hvetjið alla sem ykkur eru nærri til að mæta líka. Við fáum kannski bara þetta eina tækifæri.
Ákall til þjóðarinnar - Davíð Oddsyni vikið frá störfum – Eina leiðin til að þjóðin haldi sjálfsvirðingu sinni nú er að hún sameinist í fjölmennum mótmælum með ein skýr skilaboð til stjórnmálamanna. Skýr skilaboð um að þjóðinni stendur ekki á sama, skilaboð um að hún sé þátttakandi en ekki þolandi í þeirri atburðarás sem nú fer í hönd. Skýr skilaboð sem valdhafar geta brugðist við strax, að Davíð Oddssyni verði vikið úr starfi Seðlabankastjóra.

Davíð Oddson ber mesta pólitíska ábyrgð á því að bankarnir voru einkavinavæddir á sínum tíma og hleypt í útrás með veikburða eftirlitskerfi. Síðan stillti hann sér upp til að fylgjast með þeim sem Seðlabankastjóri án faglegar þekkingar. Með röð mistaka í hagstjórn Seðlabankans undir forustu Davíðs og ótrúlegan einleik hans síðustu vikur er þjóðin gjaldþrota, rúin trausti og virðingu í alþjóðasamfélaginu.

Nýjir tímar - Vertu þáttakandi, ekki þolandi

http://www.nyirtimar.com/

p.s. þetta er ekki á mínum vegum en ég styð þetta heilshugar og ætla að mæta... það er kominn tími til að sýna að við látum ekki troða meira á okkur.

Rekin úr búð í Danmörku

Meira um meinta kreppu

Ég get ekki hugsað mér að skipuleggja mótmæli, þó slíkt brenni á mér, ég get ekki hugsað mér að skrifa langar ritgerðir þegar það form sem ég hef alltaf heillast hve mest af liggur svo beint við.

Búin að fá upp í kok af löngum pistlum um eiginlega ekki neitt, því við erum engu nær um hvað varð um lýðræðið okkar. Spilling grasserar fyrir opnum tjöldum, en hér skal ekki kosið.

Ætla því að halda áfram að skrifa ljóð í knöppum ljóðabálk sem að sjálfsögðu heitir Kreppuljóð. Fyrst fjalla ég um fallið, er næstum búin með þann bálk, er núna að skrifa um reiðina, get ekki beðið eftir að komast í lokabálkinn sem um fjalla um upprisuna. Ég ætla að skrifa þetta á meðan þjóðin er að fara í gegnum þessi stig. Finnst sem við séum hætt að falla og ættum að vera að skríða inn í reiðina. Reiði á fyrst að vera stormur innra sem feikir til snyrtilega röðuðum fallvöltum veruleikanum, síðan á hún að hvetja mann til að þrýsta á breytingar, að fara úr ofbeldissambandinu, að hætta að laumast í ríkið fyrir alkann, að hætta að ljúga fyrir fíkilinn, að hætta að láta eins og allt sé í lagi. Það er ekki allt í lagi, en enn sem komið er vitum við ekki nákvæmlega hvað er mikið er ekki í lagi. 

Kreppuljóð

Fallið

Enn í nýjustu tísku
eilítill útsölubragur á
góðærisspikið vellur út um buxnastreng
og allt of þröngar peysur

bótaxfylltar innfallnar

sílikon brennur illa
í fimbulkulda
fallina gilda


------------------------------------

Þjóðin er lömuð
hrædd
í skuggunum falla þau hvert á fætur öðrum
í hællærisharakírí

tómar tóftir glerhalla
og þó erum við rétt að byrja

------------------------------------

Þoturnar þagnaðar í annarri heimsálfu bíða
færis á ný
þjóðargersemin horfinn
æran ekki traustari en svo
að ljúfan og brúnklukkan blésu á spilaborgina
höff pöff - kreditkortaturnarnir hrynja


timburmennirnir virðast engan enda taka
jafnvel krúttin ekki lengur sæt


suss hér verða engar galdrabrennur

------------------------------------

Hann hneppir hnöppum úr gulli
í Kensington
á meðan sitjum við uppi með glópagullið
og óræðnar tilfinningar

en suss hér verða engar galdrabrennur

------------------------------------

Undir stólum ríkisstjórnar eru pappírstætarar
þar er skýrslum laumað undir
sem allir ættu að sjá
en fáir vilja heyra

------------------------------------

Sjarmatröllið í gráfjalli
steingerfð þjóð undir
hvössu bliki

svo brosir hann sakleysislega og reitir einn brandara
og álögin eru fullkomnuð
lemúraþjóðin gekk fyrir björg
af því að pabbi sagði það

hér verða engar galdrabrennur

------------------------------------

Upphæðir sem enginn skilur
og vogunarsjóðir og
svikamyllur
og einn og einn don kíótí

Við erum ekki gjaldþrota
við erum stöndug
enginn getur lengur reiknað hve hár skuldahali hvers mannsbarns eyjunnar er
upphæðir sem enginn skilur
eru ekki raunverulegar
fyrr en launaumslagið er skyndilega tómt

hókus pókus
góðærið var okkur öllum til góða
haldið áfram að kaupa
haldið áfram að vera þæg
og þegja

það er gott fyrir hagkerfið að vera gráðugur

------------------------------------

Skipbrot frjálshyggjunnar
skipbrot auðvaldsins
skipbrot Milton Friedmanista
nú eru þeir sem það studdu
stimplaðir afturhaldskommatittir

Davíð kominn í heilan hring
í hringavitleysunni

Íslendingar gjalda sjálfstæði sitt dýru verði


------------------------------------

Nú er litla Ísland
hryðjuverkaþjóð
hefur framið stórfelld hryðjuverk í skjóli frjálshuggunar hyggjunar
á sitt eigið sjálfstæði
sína eigin afkomu

kalla ekki sumir slíkt sjálfsmark
á ögurstundu
í vítaspyrnuleik verðlausra verðhalla
verðlausra lífsgilda

hvar er kletturinn
öryggið
traustið rúið

Mjög róttæk viðbrögð

Kreppuljóð II

Fallið II

Þoturnar þagnaðar í annarri heimsálfu bíða
færis á ný
þjóðargersemin horfinn
æran ekki traustari en svo
að ljúfan og brúnklukkan blésu á spilaborgina
höff pöff - kreditkortaturnarnir hrynja

timburmennirnir virðast engan enda taka
jafnvel krúttin ekki lengur sæt

suss hér verða engar galdrabrennur

Svalir Íslendingar

Kreppuljóð

Segja má að tímar sem þessir séu einskonar gullnáma fyrir andans fólk, verandi skáld fyrst og fremst þá get ég ekki annað en skrifað ljóð er tengjast þessum miklu viðburðum, ekki aðeins hér heldur út um heimsbyggð alla. Ég byrjaði því fyrir nokkrum dögum að skrifa Kreppuljóðabók sem mun skiptast í nokkra kafla. Ég er að skrifa kaflann "Fallið" núna og hef ákveðið að hafa kreppuljóðin knöpp:) Að sjálfsögðu mun bókin enda á kaflanum "Upprisan". Mun deila með ykkur þessum ljóðum en tek það fram að þau eru ekkert pússuð, heldur hrá eins og ástandið...

Fallið

I
Útundan mér sé ég kreppuhönd
lauma tjarnargæs inn í skjannahvítan Range Rover
flaumur fjaðra eins og blindhríð um stund

 

 

IMF tilbúinn að hjálpa Íslandi

Takk kærlega

Ég ætla með sanni að þiggja þetta góða boð:) taka með mér börnin og njóta þessarar stórkostlegu hljómsveitar. Mun án efa veita birtu í sálartetur.

Afboðunin ákveðinn léttir