Er Morgunblaðið ríkisrekið?

Ég las það í leyniskýrslu sem DV birti að ríkið héldi lífinu í rekstri Morgunblaðsins. Samkvæmt þeirri skýrslu kemur fram að Árvakur skuldar 4,4 milljarða króna til Glitnis og Landsbanka. Þessir tveir bankar eru nú í eigu ríkisins. Merkilegt svona í ljósi sögunnar að það sé staðreynd, að sjálft frjálshyggjumálgagnið sé tæknilega séð: ríkisstyrkt.

Kannski væri bara best að við myndum hreinlega þjóðnýta þetta blað:)

Laun lækka um 5% hjá Árvakri

Undiralda samstöðu eflist

Það er mikið fundað um landið allt meðal almennings - vil minna fólk á að grasrótin er almenningur og vettvangur fyrir alla sem hafa áhuga á að breyta samfélaginu. Grasrótin er einmitt það sem orðið gefur til kynna - línulaga hreyfingar fólks, þar sem allir eiga að hafa sama vægi og þannig er það yfirleitt alltaf, þó með örfáum undantekningar tilfellum eins og vera ber í samfélagi manna:)

Ég hef ferðast um í grasrótinni undanfarna mánuði og verið svo lánsöm að finna og upplifa að allir eru nánast að hugsa það sama. Gagngerar breytingar á stjórnarskrá og kosningalöggjöf. Uppræting spillingar í stjórnsýslu, að hér verði komið á þrískiptingu valds, að hér fari fram alvöru rannsókn á hruninu með aðstoð erlendra sérfræðinga, að uppræta gerræði flokkaveldisins, að almenningur eigi þess kost að kjósa um málefni er varða alla þjóðina, að hér verði komið á neyðaraðgerðum til að vernda heimilin í landinu. 

Í gær var haldinn fundur þar sem öllum mögulegum grasrótarhreyfingum landsins var boðið að koma saman til að finna út hvort að það væru forsendur fyrir því að búa til afl sem væri einskonar bandalag allra þessa hreyfinga þar sem við gætum unnið að sameiginlegum markmiðum án þess þó að steypa okkur öllum saman. Það er nefnilega svo mikilvægt að öll sú vinna sem nú á sér stað í sértækum grasrótarhópum haldi áfram. 

Vegna þess að talsmenn hópanna eiga enn eftir að bera þessa tillögu undir sína félaga þá er ekki tímabært að segja hvaða fulltrúar mættu á fundinn og tóku þátt í að skrifa undir yfirlýsinguna - en ég get alveg haldið því fram fullum fetum að ég fór heim með mikla von um að hægt sé að hrinda þessum mikilvægum breytingum í framkvæmd því þarna voru manneskjur með mikla sameiginlega reynslu og yfirsýn sem höfðu allar hug á að vinna saman að því að endurreisa landið okkar. Fann að undiraldan var orðin af afli sem brátt mun ýta þjóðarskútunni upp á yfirborðið. Ef almenningur í grasrótinni með dyggri aðstoð fagfólks getur komið sér saman eins og er að gerast - þá eru okkur allir vegir færir og okkur mun takast að skapa hér samfélag þar sem sameiginlegur hagur þjóðarinnar er mikilvægasta verkefnið.

Það skal tekið fram að Raddir fólksins sendu ekki fulltrúa í gær enda hefur Hörður alltaf verið talsmaður þess að halda mótmælunum utan við alla pólitík. 

Unnið að framboði grasrótarhreyfinga

Nýtt framboð

 Ályktun fundar ýmissa grasrótarhreyfinga í dag

Á glæsilegum fundi talsmanna fjölmargra grasrótarhreyfinga um lýðræðisumbætur var samþykkt að tengja saman grasrótina og mynda samstöðu breiðfylkingar með það meginmarkmið að koma á nauðsynlegum breytingum og umbótum á íslensku samfélagi. Breytingum sem ekki verður
undan vikist að gera í kjölfar efnahagshruns þjóðarinnar, allt frá bráðaaðgerðum til varnar heimilum og atvinnulífi til endurreisnar lýðræðis á Íslandi.

Fundurinn samþykkti að vinna að framboði
grasrótarhreyfinga við næstu kosningar.

 

Útilokum ekki breytingar

Styð þessar aðgerðir Harðar

Finnst þetta góðar tillögur og er hjartanlega sammála vil ekki ofbeldi - en ég vil heldur ekki að það ofbeldi sem lögreglan hefur komist upp með sé látið afskiptalaust - vil að það verði undireins gerð rannsókn á þessu af hlutlausum aðila. Eru ekki til einhver alþjóðamannréttindasamtök sem geta tekið það að sér?

„Við viljum ekki ofbeldi“

Um tilgangsleysi allra hluta

Er fólk ekki farið að missa sjónar af því sem skiptir máli? Ég skil bara ekki tilganginn með þessum mótmælum - 99% þeirra sem mæta á önnur mótmæli eru þarna til að upplifa samstöðu og skapa þrýsting á stjórnvöld um að axla ábyrgð og taka poka sinn. Mér finnst alveg ógurlega kjánalegt að mótmæla öðrum mótmælendum enda alveg víst að nákvæmlega sama fólk myndi mæta á bæði fyrir utan kannski 1% sem eru á móti hver öðrum.

Einbeitum okkur að því að skipið er að sökkva og hættum að spá í hver er á hvaða þilfari. Við verðum að fá hér nýja stjórnarskrá, nýja kosningalöggjöf og neyðaraðgerðir fyrir almenning í landinu - höldum áfram að mótmæla því að það er ekkert verið að gera sem stuðlar að þjóðarhagsmunum. 

 

Mótmæli gegn ofbeldi og eignaspjöllum

Ekkert grjótkast fyrr en eftir að táragasi var beitt

Fann eftirfarandi inn á this.is/nei og finnst mikilvægt að þessi vitnisburður mótmælenda fari sem víðast. Virðist sem enginn fjölmiðill hafi séð tilefni til að tala við þá sem voru vitni að atburðarrásinni.

„Góðan daginn

Ég var þarna og af hálfu mótmælenda var ekkert ofbeldi fyrr en eftir að þeir sprengdu gasið. Vissulega voru einn og einn að atast í löggunni en það var bara í formi þess að ýta á skildina þeirra og einstaka sinnum að kalla þá illum nöfnum.

Ef þeir vildu losna við þetta bögg (sem ég myndi alveg skilja) þá áttu þeir að mazea viðkomandi og taka einstaklinga úr umferð en ekki gasa hundruðir friðsamra mótmælenda sem voru að tromma og syngja.

Algjörlega tilefnislaus árás með baneitruðu gasi. Ég forðaði mér eftir að þeir héldu áfram að sprengja táragas aftur og aftur og aftur. Hátt í 20 bombur sprengdar fyrir kl. 1. Engu grjóti hent í lögguna fyrr en eftir táragasið.

Þetta er auðvitað ekki ákvörðun einstakra lögreglumanna sem flestir standa sig eins og hetjur við mjög erfiðar aðstæður. Þetta er stjórnvaldsákvörðun til að sýna hver ræður. Ruddaleg aðferð og baneitruð til þess að dreifa mannfjöldanum.

Og já, eftir að þeir gösuðu ÞÁ kom ofbeldi frá mótmælendum. Fólk varð skiljanlega mjög reitt við þessa fullkomlega tilefnislausu árás.

Þarna var fólk á öllum aldri, vissulega yngist þegar líður á kvöldið en engu að síður fullt af fullorðnu fólk, þar á meðal ég.“

Blöndum ekki saman djammi og mótmælum

Fékk eftirfarandi póst áðan og styð þessa tillögu heilshugar:

"Engin mótmæli föstudagskvöld eða laugardagskvöld. Látum ekki
djammmenninguna blandast mótmælunum og byltinguna blandast fylleríi.
Látið ganga sem víðast."

Ég held að eitthvað af þeim voðaverkum sem áttu sér stað í nótt megi rekja til þess að fólk hafi komið af börunum á mótmælin - það fer ekki vel að standa í mótmælum og drekka. Sá slíkt gerast í stórum mótmælum í Ástralíu og ofbeldið byrjaði fyrir alvöru þegar fólk sem hafði setið að sumbli byrjaði að taka þátt. Fyrr um daginn höfðu mótmælin einmitt verið alveg frábær fyrir utan nokkrar löggur sem virtust þurfa að sýna vald sitt án tilefnis en ofbeldi og meiðsl urðu ekki fyrr en drukkið fólk sem virtist bara koma til að búa til uppþot fór að verða áberandi - þá fór ég heim. 

 

 

Ég vil getað haldið áfram að mótmæla án þess að eiga á hættu að verða fyrir ofbeldi hvort heldur það sé af hendi lögreglu eða mótmælendum. Mér finnst alveg jafn ömurlegt að ráðast á lögregluna tilviljanakennt eins og löggan ræðst á mótmælendur tilviljanakennt.

Munið að auga fyrir auga verður aðeins til þess að við verðum blinduð af hatri.

Lögreglumaður enn á sjúkrahúsi

Harma ofbeldi í öllum myndum

Finnst mér rétt að lögregla beita ofbeldi: nei

Finnst mér rétt að mótmælendur beita ofbeldi: nei

Innan lögreglunnar er fólk sem er prýðisfólk og vinnur vinnuna sína af heilindum, en þar eru líka ofbeldisseggir sem njóta þess að beita annað fólk ofbeldi. 

Innan raða mótmælenda er prýðisfólk sem mætir í mótmæli af heilindum, en þar eru líka ofbeldisseggir sem njóta þess að beita annað fólk ofbeldi. 

Á meðan innan raða lögreglu þessir einstaklingar komast upp með vanhæfni og ofbeldi, þá mun það bitna á því löggæslufólki sem síst skildi og það sama má segja um mótmælendur.

Þeir sem hafa sýnt mótmælendum ofbeldi bæta eldi á reiðibálið - og það sama má segja um samskipti mótmælenda og lögreglu. 

En gleymum ekki því að lögreglan hefur farið offari í beitingu piparúða og að það sé alltaf réttlætt án þess að neinn þurfi að axla ábyrgð á því lætur fólk upplifa svo mikinn vanmátt þegar það hefur ekkert brotið af sér. 

Núna er þetta allt að fara úr böndunum og ég hygg að margir sem hafa sleppt sér með grjótkasti og ofbeldi hafi aldrei mætt á mótmæli en hafi skroppið niðrí bæ til að næla sér í hasar. 

Ég var reyndar fjarri í gær - nældi mér í flensu og fékk því tækifæri til að skoða þetta utanfrá eins og margir aðrir og verð að segja að mér hugnast ekki þessi þróun. 

Ég vil að þær lögreglur sem hafa beitt mótmælendum ofbeldi og jafnvel handleggbrotið mótmælendur eða hótað lífsláti, verði látnar sæta ábyrgð - og það sama gildir um þá mótmælendur sem hafa valdið lögreglu líkamsskaða. 

En við skulum ekki hætta að mótmæla - við skulum halda áfram að mæta með hávaðatól og tæki þangað til að ríkisstjórnin víki. Látum hvorki mótmælendur eða lögreglu sem fara yfir strikið stoppa okkur.

Þeir sem fyrst og fremst bera ábyrgð á þessari ömurlegu þróun er ríkisstjórnin sem neitar að sæta ábyrgð. 

Táragasi beitt á Austurvelli

Höldum áfram

Ég ætla að fara aftur á eftir. Í gær var fólk þarna á öllum aldri - frá öllum samfélagsstéttum - frá öllum flokkum - frá öllum trúfélögum - hef aldrei séð annan eins þverskurð af fólki á mótmælum. Sumir dönsuðu í kringum eldinn - aðrir stóðu í þvögunni og slógu á potta og pönnur og hrópuðu "vanhæf ríkisstjórn", enn aðrir stóðu utar og sýndu stuðning með viðveru sinni - það er pláss fyrir alla í mótmælum sem ekki er hægt að kalla annað en lýðveldisbyltingu - þetta er mótmælin okkar allra.

Ekki vera feiminn að koma ef þú vilt breytingar - ef réttlætiskennd þín hrópar hingað og ekki lengra. Ekki vera hræddur við okkur - því á mótmælunum erum við öll eitt - þarna rekst maður á ættingja og vini, þjóðþekkt andlit og fólk sem maður hefur aldrei skilið - en það skiptir ekki máli - því í grunninn erum við öll eins þó skoðanir okkar séu ekki alltaf eins. Okkur dreymir um réttlátt samfélag og til þess að fá það verður við að sýna það í verki - því það gerir það enginn fyrir okkur. 

Ef þið eigið ekki potta og pönnur til að framkalla hávaða - takið þá vatn og brauð handa þeim sem standa kannski vaktina allan daginn - sýnum að okkur er ekki sama um hvort annað - Í dag er ég þakklát og stolt af þjóðinni minni - höldum áfram - ekki gefast upp - við erum alveg að ná markmiði okkar.

Sjáumst á eftir:) - kæru mótmælendur.

Mótmæli fram á nótt

Förum ekki fyrr en ríkisstjórnin segir af sér

Ég skora á almenning að mæta eins mikið og hver og einn hefur tök á - vera í tvo tíma eða 5 tíma en umfram allt að mæta - ég komst loks í kvöld og það er eitthvað meiriháttar sérstakt að gerast - ekki missa af því - að finna samstöðuna og rekast á fullt af fólki sem maður hefði aldrei átt von á að sjá á mótmælum er ólýsanlegt - við erum þjóðin - við viljum fá að kjósa - við viljum að ríkisstjórnin segi tafarlaust af sér - við verðum þarna með potta og læti þangað til að þið farið :) ég er með sanni stolt af því að tilheyra þessari þjóð í dag:) takk öll sem hafið vaknað og komið og sýnt að það er dugur í þjóðinni.

Mótmæli halda áfram

Vík frá ríkisstjórn

Þjóðin þarf að losna við ykkur svo að við getum fengið að reisa landið úr öskustónni án hagsmunatengsla og spillingar. Vík burt vík burt vík burt --- við þolum ekki meiri vanhæfni frá ykkur.

Mikilvægt að stjórnin fái vinnufrið

Takk hugrakka fólk

Ég kemst ekki - vil ekki vera óábyrg móðir og taka son minn í mótmælin. En ég er ánægð með að það sé svona mikið fjölmenni þarna. Við verðum að sýna samstöðu - það er búið að brjóta svo illilega á okkur og enginn hefur sætt ábyrgð nema við almenningurinn - aðfarirnar að almenningi eru næst því sem kalla má landráð. Ég skora á ríkisstjórnina að segja af sér- vanhæfni hennar er alger að takast á við það sem þjóðin stendur frammi fyrir.

Ég vona að þetta fari ekki út í ofbeldi. Ég vona að þetta verði hávaði en ekki handalögmál. En takk allir sem lögðu leið sína að alþingi í dag.

Fann þessa frétt inn á Smugunni núna rétt í þessu: "Sífellt fjölgar mótmælendum á Austurvelli og nú fyrir nokkrum mínútum gengu tveir þingmenn vinstri grænna út úr Alþingishúsinu og inn í hóp mótmælenda. Álfheiður Ingadóttir og Katrín Jakobsdóttir þingmenn sögðust ekki geta setið lengur inni í Alþingishúsinu.

Hávaðinn við Alþingishúsið hefur stigmagnast frá því klukkan eitt. Lögregla hafði lokað fyrir innganginn að húsinu með gulum borða. Fólk fór fljótlega inn fyrir borðann og gerði lögregla ekkert til að hindra það.

Fólkisfjöldinn hefur nú dreifst og er allt í kringum Alþingishúsið. Margir berja húsið að utan með berum höndum, en sumir með sleifum eða pottlokum. Margir lögreglubílar eru í nærliggjandi götum, hávaðinn á Austurvelli er ærandi og óttast menn að upp úr sjóði í mótmælunum."

 

Mótmælendur við alla innganga

Hvernig væri einbeita sér að fjárglæfrafyrirtækjunum?

Ó, ég gleymdi, þau eru lögleg - þau eru vernduð af mafíunni sem situr á ráðherrastólum. Stórglæpamenn komast alltaf undan - hér eru framin landráð og ekki neitt gerist - þurfum við borgarar landsins virkilega að fara í borgaralegar handtökur eða ætlar einhver að fara að draga einhvern til ábyrgðar - það stefnir í átök ef ekki gerist neitt NÚNA.

Mér er algerlega nóg boðið og finn að það sama má segja um meirihluta þjóðarinnar. Skora á lögregluna að hneppa í gæsluvarðhald stórvesírana og láta smákóngana í friði. 

Úr. úr X. kafla almennra hegningarlaga - 91. gr.

Hver, sem kunngerir, skýrir frá eða lætur á annan hátt uppi við óviðkomandi menn leynilega samninga, ráðagerðir eða ályktanir ríkisins um málefni, sem heill þess eða réttindi gagnvart öðrum ríkjum eru undir komin, eða hafa mikilvæga fjárhagsþýðingu eða viðskipta fyrir íslensku þjóðina gagnvart útlöndum, skal sæta fangelsi allt að 16 árum. Sömu refsingu skal hver sá sæta, sem falsar, ónýtir eða kemur undan skjali eða öðrum munum, sem heill ríkisins eða réttindi gagnvart öðrum ríkjum eru undir komin.

Sömu refsingu skal enn fremur hver sá sæta,sem falið hefur verið á hendur af íslenska ríkinu að semja eða gera út um eitthvað við annað ríki, ef hann ber fyrir borð hag íslenska ríkisins í þeim erindrekstri. Hafi verknaður sá,sem í 1.og 2. mgr. hér á undan getur, verið framinn af gáleysi, skal refsað með …1) fangelsi allt að 3 árum, eða sektum, ef sérstakar málsbætur eru fyrir hendi.

 

Landaverksmiðju lokað

Enn grafa þeir gjá

Augljóst er að kínverska alræðisstjórnin ætlar sér aldrei að fara í neinar málamiðlanir varðandi Tíbet. Ástandið í Tíbet hefur aldrei verið verra en hér ríkir einatt mikil þögn um málefni Tíbets. Ég hef fylgst með ástandinu í landinu og hef þungar áhyggjur af því hvernig alþjóðasamfélagið horfir fram hjá því þjóðarmorði sem þar fer fram fyrir nánast opnum tjöldum. Landið er enn lokað fyrir opinberar rannsóknir mannúðarsamtaka á afdrifum þeirra þúsunda Tíbeta sem hurfu eftir óeirðirnar í mars í fyrra.

Enn er fólk sett í fangelsi fyrir það eitt að neita að afneita Dalai Lama. Enn hverfur fjöldi fólks á ári hverju eða deyr út af pyntingum í fangelsum. Kínversk yfirvöld ögra og slá á útréttar hendur þeirra er vilja finna friðsamlega lausn og fá að fremja sitt menningarlega þjóðarmorð í friði fyrir alþjóðasamfélaginu. Skammarlegt.

Útlegð Dalaí Lama verði minnst með hátíð

Mótmælafundur í Háskólabíói

Þjóðarsamstaða gegn fjöldamorðunum á Gaza
Sunnudaginn 18. janúar - kl 15.00

Fjölmörg félagasamtök, stjórnmálahreyfingar og fjöldasamtök gangast fyrir mótmælafundi í Háskólabíói á sunnudaginn undir kjörorðinu: ÞJÓÐARSAMSTAÐA GEGN FJÖLDMORÐUNUM Á GAZA.

Ræður flytja:
Guðfríður Lilja Grétarsdóttir, stjórnmálafræðingur
Jóhanna K. Eyjólfsdóttir, framkvæmdastjóri Íslandsdeildar Amnesty International
Kristín Helga Gunnarsdóttir, rithöfundur

Össur Skarphéðinsson, starfandi utanríkisráðherrra, flytur ávarp

Fundarstjóri er Arnar Jónsson leikari

Fjölbreytt tónlistardagskrá verður á fundinum:

Barnakór Kársnes
Lay Low
Hulda Björg Garðarsdóttir
Steinunn Birna Ragnarsdóttir
Trio Nordica
... og fleiri

Eftirtaldir hafa nú þegar staðfest aðild að fundinum:

ASÍ
BSRB
Félagið Ísland-Palestína
Frjálslyndi flokkurinn
KÍ
Landssamband sjálfstæðiskvenna
SFR
Samiðn
Samfylkingin
Starfsgreinasambandið
Ungir Vinstri-Grænir
Vinir Tíbets á Íslandi
Vinstri-Grænir
...og fleiri

Boð um aðild að fundinum hefur verið sent fjölda félagasamtaka og búist er við að fleiri eigi eftir að tilkynna þátttöku, enda öll félagasamtök, stjórnmálahreyfingar og fjöldasamtök hvött til að vera með.