Mild núna - skæð síðar?

Samkvæmt því sem hefur komið fram varðandi þessa flensu er ótti um að hún verði sífellt hættulegri eftir því sem hún fer fleiri smithringi í kringum hnöttinn. Hún leggst á fólk sem hefur ekki fengið hana áður eða afbrigði af henni. Fjölmiðlar greina svo frá að eldra fólk sé ekki í eins mikilli hættu, því það hefur myndað sér náttúrlegt mótefni. Sennilega fengið afbrigði af henni þegar hún hét flóðhestaflensan eða eitthvað álíka framandi.  Kannski ættu sem flestir að gera sér far um að fá flensuna á meðan milda afbrigðið ef henni er í gangi til að mynda með náttúrulega mótstöðu og vera síður í hættu að fá hættulegri stökkbreytingu af flensunni síðar.

Óska eftir mótrökum og meðrökum hjá einhverjum sem er sérfróður um flensur. 

p.s. Ég er ekki að segja fólki að gera það bara að velta þessu upp eftir að hafa heyrt í dag í fréttum hve vond áhrif bóluefnið hefði á börn sem voru bólusett á Bretlandseyjum út af þessari flensu. Enn hafa mjög fáir látist út af henni miðað við aðrar flensur.

P.s. Ég afbirti þessa færslu í smá stund því ég var ekki alveg búin að fínpússa hana og þurfti að bregða mér út í krónu og þvo bílinn minn og viti menn einhverjir glöggir fjölmiðlamenn höfðu tekið eftir því að hún var ekki lengur birt... það er sérstaklega furðulegt að upplifa það að hvert einasta orð sem maður skrifar sé fylgt svona grannt eftir... svolítið mikil viðbrigði fyrir einhvern eins og mig sem gat skrifað og skrifað svo árum skipti og nánast enginn pældi í því sem frá mér kom... maður þarf víst að venja sig þetta nú um stundir.

 

Svínaflensutilvik orðin 51

Athugasemdir

[Hansína Hafsteinsdóttir, 31.7.2009 kl. 14:51]

Held að yfirvöld geti ekki mælt með því að smitast viljandi. Meðal annars vegna þess að mjög margir eru með undirliggjandi sjúkdóma t.d. astma, sykursýki, hjartasjúkdóma, krabbamein, veiklað ónæmiskerfi, fyrir utan ófrískar konur og kornabörn. Því fleiri ,,heilbrigðir'' sem smitast því erfiðara verður að fyrir þá sem eru viðkvæmir að forðast smit. Svo er annað, ekki er hægt að fullyrða að þessi veira verði mikið alvarlegri eða að hún breytist þá ekki bara svo mikið að það gagnist lítið að hafa fengið hana áður. Veit samt ekkert meir um veirur en hver annar.

[Ragnar Örn Eiríksson (IP-tala skráð) 31.7.2009 kl. 18:25]

fólk bara smitast ef það smitast og ég held að þessa flensu fái næstum allir hvort sem er, ef fólk myndar mótefni sem fær hana þá skil ég ekki alveg hvernig það ætti að gagnast nokkrum manni ef hún stökkbreytist og verður drepsótt eins og spænska veikin varð.

[Jóhannes Birgir Jensson, 31.7.2009 kl. 18:38]

Pældi í þessu sama sjálfur, maður sækist svo sem ekki eftir því að fá flensu yfirhöfuð en ef maður fær hana núna í sumarhita þá er það vonandi skaplegra en í vetur í kulda og kannski stökkbreytta útgáfu.

[Soffía Sigurðardóttir, 31.7.2009 kl. 19:00]

Ef þú ætlar að næla þér í flensu þegar þér hentar, þá bið ég þig að halda þig ein heima frá því smittilraun þin fer fram og þar til ljóst er að þú smitaðist ekki, eða þá þar til þú ert risin upp úr flensunni þinni.

Það er nefnilega tóm sjálfselska að verða sér vísvitandi úti um smitsjúkdóm og smita með honum óaðvitandi fólk. Þú veist ekkert hverja þú smitar og þar með ekki hvaða heilsu þeir hafa til að verða fyrir smitinu.

Ég skil vel það viðhorf að illu sé best aflokið áður en það versnar. En, smitsjúkdómar snúast ekki bara um þig, eða mig, heldur um alla samborgara okkar. Á þeim ber hver og einn samfélagslega ábyrgð.

Fullfrísk manneskja á hvorki að heimta bóluefni fyrir sig, þegar magn þess er takmarkað, né stuðla að útbreiðslu sjúkdóma af því hún vilji sjálf ná í vægustu útgáfuna.

Þetta eru mín siðferðislegu mótrök og koma sérfræðiþekkingu á flesnu ekkert við.

[Birgitta Jónsdóttir, 31.7.2009 kl. 19:12]

Takk fyrir þessi svör - ég vildi gjarnan að fólk myndi lesa færsluna til enda áður en það fer að tjá sig. Soffía mín ef þú lest færsluna til enda þá er þar eftirfarandi: p.s. Ég er ekki að segja fólki að gera það bara að velta þessu upp eftir að hafa heyrt í dag í fréttum hve vond áhrif bóluefnið hefði á börn sem voru bólusett á Bretlandseyjum út af þessari flensu. Enn hafa mjög fáir látist út af henni miðað við aðrar flensur.

[Gunnar, 31.7.2009 kl. 20:09]

Ekkert skrítið ef bóluefnið fer illa í einhverja, það er verið að gefa það óprófað!

[Jóna Kolbrún Garðarsdóttir, 1.8.2009 kl. 01:26]

Ég pant fá svínaflensuna núna, svo ég fái ekki stökkbreytta útgáfu seinna.  

[Sigurður Örn Aðalgeirsson (IP-tala skráð) 1.8.2009 kl. 02:16]

Ég hef nú ekkert sérstakt að segja um færsluna útaf fyrir sig hafandi lesið marga verri vitleysuna í bloggheimum, það sem vakti athygli mína var ekki efnið heldur hvaðan það kom.

Í samfélögum þar sem fólk er ekki jafn uppgefið á vitleysunni í stjórnvöldum sínum væri það sennilega ekki liðið ef þingmenn færu að birta opinberlega greinar þar sem þeir ræddu vanhugsaðar hugmyndir sínar um vandamál á vettvangi sem þeir hafa enga sérþekkingu á.

Ég hef lesið aðrar færslur eftir þig og líkað ágætlega, ég held að fyrsta tilfinning þín um að taka færsluna út hafi verið rétt og þú hefðir líklega ekkert átt að setja hana aftur inn eftir þú komst heim úr krónunni á hreinum bílnum.

[Anna Benkovic Mikaelsdóttir, 1.8.2009 kl. 04:00]

Er að vona að við sonur minn smitumst sem fyrst!

[Tómas (IP-tala skráð) 1.8.2009 kl. 08:40]

Sæl vertu

Ég veit ekki til þess að nein börn hafi verið sprautuð fyrir pestinni hér í Bretlandi. Bóluefnið er ekki væntanlegt fyrr en í haust eða eftir um mánuð. Barnaskólum og gæsluvöllum var ýmist lokað eða strangar aðgerðir gerðar þegar pestin kom þar upp. Að öðru leiti var að koma sumarfrí í barnaskólum (þann 17 júlí) þegar fór að bera á pestinni hér í Bretlandi. 

Núna er hægt að fara á heimasíðu hér í UK og fá Tamiflu (1 einingu).

Annars finnst mér fólk gleyma því að á hverju ári deyr gamalt fólk af árstíðarbundnum umferðarpestum. Þessi pest tekur þó til sín skerf af ungu fólki. Lang flestir sem hafa dáið hér í Bretlandi hafa haft undirliggjandi vandamál (tengt öndunarfærum) og svo hefur komið upp röng greining sem leiddi til andláts barns. Annars er þetta eins og þú segir "mjög fáir látist". 

[Birgitta Jónsdóttir, 1.8.2009 kl. 08:53]

hér er grein sem birtist í íslenskum fréttamiðlum í gær...

"Meira en helmingur barna sem fá inflúensulyfið Tamiflu urðu fyrir hliðarverkunum á borð við ógleði og martraðir, samkvæmt rannsókn sem vefurinn Times Online greinir frá.

Áætlað er að um 150 þúsund manns með inflúensueinkenni hafi fengið lyfið í Bretlandi í síðustu viku. Rannsókn sem gerð var á börnum í þremur skólum í London og einum í suðvesturhluta Bretlands sýndi að 51-53 prósent þeirra höfðu orðið fyrir einni eða fleiri hliðarverkunum lyfsins. 

The Health Protection Agency gerði rannsóknina. Niðurstöður hennar voru birtar á sama tíma og Sir Liam Donaldson, landæknir í Englandi, sagði að tíðni nýrra tilfella af svínainflúensu sé hætt að aukast.

Sir Liam sagði að áætlað væri að læknar hafi greint um 110 þúsund ný tilfelli af H1N1 veirunni í síðustu viku.  Þar að auki eru þeir sem hafa nýtt sér sérstaka þjónustu fyrir smitaða til að verða sér úti um inflúensulyf, án þess að leita læknis.

Í síðustu viku voru staðfest 27 dauðsföll af völdum nýju inflúensunnar í Englandi."

[Hansína Hafsteinsdóttir, 1.8.2009 kl. 11:18]

Nú skil ég misskilningin hjá þér. Tamiflu er bara hreint ekki bóluefni. Þetta er veirulyf allavega nokkra ára gamalt og er tekið fyrirbyggjandi (tímabundið, þegar viðkomandi er í hættu að smitast)eða sem fyrst eftir að einkenni koma fram og styttir og mildar veikindin. Bóluefni er ekki tilbúið enn og allt annar handleggur! Tamiflu getur að sjálfsögðu haft aukaverkanir en í sumum tilvikum geta veirusýkingar haft mjög alvarlegar aukaverkanir bæði tímabundnar og eins geta þróast langvinnir sjúkdómar upp úr þeim, að ég tali nú ekki um dauða. Það á að vera mat læknis hvort lyfjagjöf er æskileg eða ekki.