Að læra nýtt tungumál

Dagbók þingmanns - hin vikulega dagbók mín fyrir DV.

Að fara inn á þing með nýja hreyfingu er snúið mál. Undanfarnir mánuður hafa verið með lærdómsríkustu tímum lífs míns. Að koma inn á þing með nýjan þinghóp þar sem allir eru nýgræðingar er eins og að vera lokaður inni í veruleika þar sem allir tala framandi tungumál sem við þurfum öll að leggja okkur fram við að skilja á einhverjum þeim örlagaríkustu tímum sem þjóðin stendur frammi fyrir. Sumarþing sem átti að standa í viku hefur nú staðið yfir í þrjá mánuði og enginn endir er í sjónmáli þó margir séu orðnir fullir vonar um að hægt verði að ljúka þingstörfum í komandi viku. Ég er ekki viss um að það sé endilega skynsamlegt að ljúka þingi útfrá einhverri fyrirfram gefinni dagsetningu – nær væri að ljúka þessu stóra máli sem við erum að glíma við með sóma. Þetta er annars furðulegt starf og maður þarf að hafa þykkan skráp til að þola allt illa umtalið og reiðina sem dynur á manni ef manni verður á að misstíga sig eða fylgja sannfæringu sinni. Ég get alveg skilið af hverju ákveðið fólk velst inn á þing, það er ekki fyrir viðkvæma að vinna þessa vinnu eða fólk sem vill eiga eitthvað einkalíf. Þetta er vinna þar sem maður fær aldrei frí og þetta er vinna sem krefst þess af manni þ.e.a.s. ef maður vill sinna henni vel að maður nái því að halda áttum þó allt sé logandi í kringum mann. Þetta er vinna þar sem maður þarf að hafa náð því meistaralega vel að taka hlutina ekki persónulega og þar sem innsæið verður að fá að vega þungt. Mikið er ég rosalega þakklát fyrir að Borgarhreyfingin hefur eftirfarandi í sinni stefnu: Borgarahreyfingin leggur sig niður og hættir störfum þegar markmiðum stefnuskrár hennar hefur verið náð eða augljóst er að þeim verður ekki náð.

Hvenær kemur réttlætið?
Það er alveg makalaust að ekki er búið ennþá að frysta eigur eða af hverju bankarnir eru ekki teknir út sem þær svikamyllur sem þeir greinilega eru. Það er ömurlegt að vita til þess að sumt fólk kemst upp með það að svíkja og pretta á siðlausan en löglegan hátt – því vinir og vandamenn þeirra hafa samið regluverkið sem þeir fara eftir eða hafa ekki sett það í forgang að laga það. Það er ömurlegur veruleiki fyrir þá sem eru að glata öllu sínu að vita til þess að þeir sem eru að stela lífsgæðin frá börnunum þeirra fái enn að leika lausum hala í fjármálaheiminum með leppa sér til handa. Auðvitað kallar slíkt á almennt siðrof. Á meðan ekkert réttlæti fyrirfinnst í samfélagi okkar þá er ósanngjarnt og óréttlátt að ætlast til þess að almenningur fórni sér með lakari lífsgæðum og lifi í dauðans óvissu um afkomu sína næsta áratuginn. Það verður hreinlega að hætta þessum hvítþvotti og láta einhverja sæta raunverulegri  ábyrgð. En það hefur aldrei verið sterka hlið okkar ráðamanna að taka pokann sinn sama hvað viðkomandi hefur verið uppvís af siðlausri framkomu. Hættum að vera eins og stór Sikiley og förum að haga okkur eins og siðmenntað fólk – það mun enginn – ekki nokkur maður taka mark á okkur á erlendri grund ef við höldum áfram á þessari braut. Það er líka alveg ótrúlegt að sá flokkur sem átti sinn stóra hlut í hruninu hafi í stað þess að vera látinn axla ábyrgð fengið meirihluta og þessi sami meirihluti hafi sett í æðstu embætti ríkisvaldsins og þingvaldsins fólkið sem sofnaði á vaktinni. Hvenær kemur réttlætið – kemur það kannski ekki fyrr en næsta bylting brestur á? Framundan er greiðsluverkfall og fólksflótti. Hlutverk ráðamanna er að skapa réttlátt samfélag en þannig samfélag verður aldrei hér á meðan AGS ræður för.

p.s. ég þigg ekki greiðslur fyrir þessi greinaskrif... smá samfélagsþjónusta:)

Athugasemdir

[Jón Lárusson, 7.8.2009 kl. 21:13]

Réttlætið kemur ekki bara sísona, við verðum að sækja það. Réttlætið er eins og frelsið, ef ekki er hugað að því, þá hverfur það á brott. Réttlæti og frelsi er ekki gefið, heldur áunnið.

Minni bara á færslur mína um hvernig við verðum að horfa til framtíðar með nýjum lausnum  http://jonl.blog.is/blog/jonl/entry/926292/ og svo vítið til varnaðar, örlög Fidjí búa, eins og koma fram í þýðingu Egils H. Lárussonar á umfjöllun Tolstoy um Fidjí búa.

[Jón Lárusson, 7.8.2009 kl. 21:14]

Hér er umfjöllunin um Fidjí í viðhengi við þessa færslu hjá mér http://jonl.blog.is/blog/jonl/entry/927064/ 

[Birgitta Jónsdóttir, 7.8.2009 kl. 22:39]

ég birti þessa frábæru grein á facebook síðunni minni í dag

[Birgitta Jónsdóttir, 7.8.2009 kl. 22:50]

það er leitt að hafa valdið þér áfalli - þetta var tilraun til að sýna esb, icesave og imf saman og til að tryggja að hlutirnir væru unnir í réttri röð. Icesave fyrst svo esb en því miður mistókst það...

[Jón Lárusson, 7.8.2009 kl. 22:55]

Saga Fidjí á að vera okkur víti til varnaðar. Það sem þeir stóðu frammi fyrir er sambærilegt stöðu okkar í dag. Við megum ekki gera sömu mistök og þeir, sagan er til að læra af henni.

[Jón Kristófer Arnarson, 7.8.2009 kl. 22:56]

Þetta mikið að læra og harður heimur og eflaust kemur þetta allt saman hjá ykkur.  Vonandi takið þið niðurstöðum fundarins í gær fagnandi og starfið með sáttarnefndinni.  Svo er það bara að halda námskeiðið  "Að starfa í félagi 101" og þá held ég að framtíðin sé björt.

Gangi ykkur allt í haginn á erfiðu þingi.

[Toni (IP-tala skráð) 7.8.2009 kl. 23:24]

Ég væri verulega áhyggjufullur ef þið gerðuð engin mistök, eiginlega myndi ég fyllast tortryggni.

Þið eigið eftir að gera mörg mistök til viðbótar því þetta kerfi umber ílla nýliðun og breytingar og gerir allt til að bregða fæti fyrir nýliðanna.

Þó þið mynduð mæta í trúðsbúningi í vinnuna mun ég kjósa ykkur aftur, og það munu fleiri gera. Ég hef áhuga á auknu lýðræði og treysti betur þeim sem ekki kunna leikinn til að berjast fyrir þeim málstað.

Er orðin leiður á gervimennsku gömlu flokkana og gervilýðræðinu þeirra. Gangi ykkur vel.

[Sigurður Þórarinsson (IP-tala skráð) 8.8.2009 kl. 01:08]

Eg kaus ykkur og það eru stærstu mistök lífs míns. Mistök sem ALDREI verða endutekin né leiðrétt.  Skömm mín er algjör.  Nenni ekki að tína til allt það sem valdið hefur vonbrigðum því það er nánast allt.  Vona bara að þið farið úr þingsölum sem fyrst því þangað eigið þið ekkert erindi.  Vona samt að þið eigið gott líf utan þingsala.

[Sigurður Þórðarson, 8.8.2009 kl. 01:28]

Sæl Birgitta, ég velti fyrir mér þessari grein: "Borgarahreyfingin leggur sig niður og hættir störfum þegar markmiðum stefnuskrár hennar hefur verið náð eða augljóst er að þeim verður ekki náð."  Baráttan fyrir betra þjóðfélagi er eins og hringur sem hvorki byrjar né endar en við einstaklingarnir erum forgengilegir og yfirgefum hringinn í fyllingu tímans.

Það er aldrei hægt að gera svo öllum líki. Hér hefur komið fólk aðallega úr tilteknum stjórnmálaflokki og segist hafa orðið fyrir miklum og sárum vonbrigðum með þín störf og þær ákvarðanir, sem mér finnst þið þremenningarnir hafa vaxið hvað mest af. 

Það er ábyggilega vanþakklátt starf að vera þingmaður og krefjandi ef fólk leggur sig allt fram eins og ég skynja að þið gerið.  Með sama hætti og sumir koma til að skammast eða kvarta ætla ég að leyfa mér að þakka þér kærlega fyrir að vinna í þágu Íslands.

[sandkassi (IP-tala skráð) 8.8.2009 kl. 01:47]

Þú ert hörð Birgitta og þingflokkur Borgarahreyfingarinnar er búinn að sanna það að það er hægt að spila góða pólitík án spillingar og valdagræðgi.

Sú hætta er alltaf fyrir hendi að fólk missi sjónar á málefnunum og reyni að troða sér í gegnum þvöguna að settu marki.

Miðstýrðir þingflokkar og ráðherravald, fyrirfram ákveðnar atkvæðagreiðslur og bisness milli flokka, allt eru þetta hlutir sem maður vill sjá minna af og þið hafið sýnt nýja pólitík í verki.

Það sést greinilega hve mikil ánægja er með ykkar störf í kommentunum hjá ykkur. Það eru jú alltaf niðurrifsmenn innan um en mér sýnist þeir drukkna bara í eigin ælu:).

[Billi bilaði, 8.8.2009 kl. 03:02]

Kærar þakkir fyrir þetta, Birgitta. Þið eruð hetjur.

ES: Sigurður Þórarinsson, ef það eru stærstu mistök lífs þíns að kjósa Borgarahreyfinguna, þá hefur þú hingað til lifað í bómull.

[Birgitta Jónsdóttir, 8.8.2009 kl. 09:09]

þakka ykkur fyrir - Jón Kr við tókum þeirri sáttaumleitan vel sem barst okkur í gær eins og við höfum alla tíð gert.

[bogi (IP-tala skráð) 8.8.2009 kl. 09:46]

Þið skituð svo innilega í buxurnar þegar þið reynduð og mistókst að nota ESB atkvæðagreiðsluna sem skiptimynt til að ná fram öðrum óskyldum hlutum. Vinnubrögð sem minna frekar á Framsóknarflokk eða aðra eins viðurstyggð. Ég vona að þið hafið ekki bara verið að skruma þegar þið sögðust fyrir kosningar vilja sjá Ísland í ESB. Og ég vona virkilega að ég þurfi aldrei að horfa upp á jafn brjóstumkennilega ömurlegann pólitískann gjörning eins og þessi uppákoma var.

[Birgitta Jónsdóttir, 8.8.2009 kl. 09:54]

Mikið er minni þitt lélegt Bogi ef þetta er ömurlegasti pólitíski gjörningur sem þú hefur orðið vitni af... segðu mér, hvaða flokk kaust þú?

[bogi (IP-tala skráð) 8.8.2009 kl. 10:56]

Borgarahreyfinguna.

Og ég sagði ekki að þetta væri "ömurlegasti pólitíski gjörningur sem þú hefur orðið vitni af" heldur að ég vonaðist til að þurfa ekki að horfa upp á slíkt aftur.

Ég kaus Borgarahreyfinguna meðal annars vegna þess að ég trúði því að þið mynduð vinna að því að koma Íslandi inn í ESB. Aukinheldur vegna þess að ég hélt að pólitísk hrossakaup væri eitthvað sem maður þyrfti ekki að hafa áhyggjur af úr þeim ranni.

Ég hef enn trú á ykkur sem einstaklingum, en það var skömm að þessari uppákomu.

[Sigurður Þórðarson, 8.8.2009 kl. 11:57]

Birgitta, ég þekki mjög marga sem kusu Borgarahreyfinguna.  Ég fullyrði við þig að þessar skítapillur sem við sjáum hér á víð og dreif frá ýmsum ip tölum sem t.d. kalla sig boga eru í engu samræmi við  almenningsálitið  og almennt viðhorf kjósenda til ykkar.

Ég verð að koma þessu á framfæri af því að mér blöskrar og grunar að hér sé skipulögð uppákoma.  Þetta rugl er dæmt til að mistakast og mun ekki gera neitt annað en að styrkja ykkur.

[bogi (IP-tala skráð) 8.8.2009 kl. 16:10]

Já takk Sigurður.

Ég er semsagt ekki fólkið. Gott að halda því til haga.

Ég fullvissa þig um að ég tala fyrir sjálfann mig og er ekki hluti af skipulagðri uppákomu. Það að nota ESB umsóknarferlið sem skiptimynt í pólitískum slag er og var léleg uppákoma og skömm að því. Sérstaklega þar sem Borgarahreyfingin setti fram í stefnumiðum sínum fyrir kosningar að

1) Leitast við að ganga í ESB

2) Standa fyrir heiðarlegri pólitískri framkomu.

Verknaðurinn að spyrða saman óskyldum málum og kjósa svo gegn því að sækja um aðild að ESB, ÞVERT Á það SEM TALAÐ VAR UM fyrir kosningar, segir mér að hér séu manneskjur sem ekki einungis eru óheiðarlegar heldur líka lélegir pólitíkusar. Maður getur ekki treyst því að þau gangi fram með það sem þau sögðu hvað skýrast til að komast í stólinn. Og maður getur ekki heldur treyst þeim fyrir því að sveigja af leið fyrir hugsanlega meiri ávinning, því brellan var gagnslaus með öllu, hún þjónaði einungis hagsmunum Framsóknar og Sjálfstæðisflokks til að veikja tillögu sem margir af kjósendum Borgarahreyfingar myndu vilja sjá fram ganga.

Kallaðu það endilega skítapillu að minnast á svikin loforð. Reyndar var orðalag mitt þannig að þér fyrirgefst að vera ómálefnalegur. Hlífðu mér samt við því að vera hluti af þínum vænissjúku samsæriskenningum. Nóg er af samsærum þó maður sé ekki að búa þau til úr einhverjum bloggkommentum.

[sandkassi (IP-tala skráð) 8.8.2009 kl. 17:32]

er ekki mansnafnið "bogi" með stórum staf?

[bogi (IP-tala skráð) 8.8.2009 kl. 17:47]

Jú reyndar Gunnar, hvað kemur það nokkrum sköpuðum hlut við?

[sandkassi (IP-tala skráð) 8.8.2009 kl. 17:57]

haha kraftur í þér strákur-:)