Stuttmynd um hrunið

Ég var beðin um að setja saman frétt um aðdraganda hrunsins og eftirmála þess. Ég bjó til einskonar stuttmynd. Hún fer í loftið á lítilli bandarískri sjónvarpsstöð í dag. Ákvað að deila henni með ykkur - ef þið viljið dreifa henni til vina og vandamanna á erlendri grund þá er það allt í lagi mín vegna:)

 

Ekkert persónukjör í boði XD?

Samstaða - bandalag grasrótarhópa hélt almennan borgarafund um persónukjör og kosningalög á fimmtudagskvöldið. Ekki tókst okkur að fá neinar fréttatilkynningar birtar í fjölmiðlum þrátt fyrir að þær hefði verið ítrekað sendar. Þannig að þeir sem vissu af fundinum voru allt of fáir og fyrir vikið missti fólk af afar fróðlegum fundi - en enginn fulltrúi fjölmiðla mætti á staðinn til að fræðast um málefni sem ég hélt satt best að segja að brynni á þjóðinni. Kannski skiptir persónukjör ekki neinu máli - en ég í einfeldni minni hélt að það hefði verið háværar kröfur um það meðal almennings undanfarið. Niðurstaða fundarins var því miður þess eðlis að ljóst er að það verður ekki í boði fyrir þessar kosningar sem verða í apríl.

Þorkell Helgason stærðfræðingur flutti afar fræðandi erindi varðandi persónukjör en hann var ráðgjafi núverandi kosningalaga og er ef til vill manna fróðastur um hverju er gerlegt að breyta. Erindi hans og viðbrögð þeirra sem sátu fyrir svörum, sér í lagi Birgis Ármannssonar frá XD staðfestu að það verður ekkert úr því að við kjósendur fáum að raða sjálf á listana.

Mér finnst heillandi að geta sleppt því að vera flokksbundin til að fá að taka prófkjöri þess flokks sem mér finnst álitlegastur hverju sinni. Birgir bar því við að ástæða þess að XD vilji ekki styðja breytingu á kosningalögum þess efnis að prófkjörin fari fram í kjörklefanum að þeir væru komnir svo langt í prófkjörsbaráttunni og að það þyrfti að fjalla um þessi mál vel og lengi og taka yfirvegaðar ákvarðanir. Það er allt gott og gilt en skilar ekki prófkjörsbarátta þeirra sér þá bara í kjörklefanum? Eða snýst þetta bara um að tryggja sér efsta sæti til að eiga séns á ráðherraembætti samkvæmt gömlu góðu valdatröppunum?

Siv, Steingrímur J og Helgi Hjörvar voru öll á því að þau styddu persónukjör en gerðu samt ráð fyrir að það myndi ekki ganga upp og því eru allir flokkar að undirbúa prófkjör. Ef þessir flokkar hefðu með sanni verið alvara með þetta þá hefðu þau átt að setja pressu á að breytingin ætti sér í alvöru stað en væri ekki orðin tóm með því að gera bara ráð fyrir að þetta færi fram í kjörklefanum. 

Ég ætla að vitna í blogg Ómars Ragnarssonar sem flutti frábært erindi um kosningalögin sem eru hryllilega gölluð og virðast vera til þess sköpuð að viðhalda valdablokkunum inn á þingi.

"Þorkell Helgason upplýsti að lögfræðinga greindi á um hvort 2/3 þingmanna þyrfti til að samþykkja breytingar á kosningalögunum, en ef slíkan aukinn meirihluta þarf, fella Sjálfstæðismenn frumvarpið auðveldlega ef þeir vilja.

Eina lögfræðilega haldreipið með þessari kröfu um 2/3 virðist vera sú að enda þótt lögin sjálf bendi til þess að ekki þurfi aukinn meirihluta, finnst hið gagnstæða í fylgiskjali á fyrri stigum málsins.

Mér finnst fljótt á litið eðlilegra að þetta skrýtna fylgiskjal verði ekki látið ráða.

Í ljós kom að þessi framboð haga undirbúningi sínum þannig að þau séu viðbúin bæði óbreyttum reglum eða breyttum, allt eftir því hver verða afdrif málsins á Alþingi.

Það er alveg skýrt í stjórnarskrá hvernig skuli stand að breytingum á kosningalögum og stjórnarskrá er það sem ræður. Þetta segir í stjórnarskrá um málið." af bloggi Ómars Ragnars.

Það er því alveg ljóst að forræðishyggja XD mun fella þessar breytingar og deginum ljósara að þeir styðji ekki þær breytingar sem nauðsynlegar eru til viðreisnar. Þeir treysta sem sagt ekki kjósendum sínum. 

Þess má geta að nýju framboðið Borgarahreyfingin -þjóðin á þing og L-listinn eru á öndverði meiði með þetta. Það er skýlaus krafa Borgarahreyfingarinnar að við fáum persónukjör en L-listinn er sammála XD um að það sé ekki tímabært. 

Í gær ákvað svo Ómar að renna inn í Samfylkinguna og ekki ósennilegt að sú staðreynd að það verði ekki að umræddum breytingum á kosningalögum ásamt þeirri staðreynd að ekki verður hægt að breyta 5% reglunni fyrir þessar kosningar hafi haft þar áhrif á.

Við tókum borgarafundinn upp og mun hann verða aðgengilegur á YouTube innan tíðar. Læt ykkur vita hér á blogginu:)

 

 

 

Þessar tölur segja ekki alla söguna

Þessar tölur gefa afar skakka mynd af hve margir hafa misst vinnuna. Inn í þær vantar á milli 7 og 8000 erlenda verkamenn sem hafa yfirgefið landið, á milli 3 og 4000 sem hafa farið í nám hérlendis og erlendis vegna vinnumissis. Þá má ekki gleyma þeim fjölmörgu verktökum sem eiga ekki rétt á bótum.

Ég held að ef við eigum að geta tekið á þessum risastóra vanda sem við okkur blasir verðum við að skoða heildarmyndina. Nú eru 16.356 skráðir atvinnulausir og við það bætist um 10.000 glötuð störf sem vitað er um fyrir utan alla þá sem eiga ekki rétt á bótum - hvað gerir þetta þá tölu atvinnuleysis háa?

Þó flóðbylgja atvinnulausra á skráningu sé að minnka þá eru á sama skapi ekki að skapast ný störf fyrir þá sem hafa misst vinnuna. Þá má líka minna á þá staðreynd að til að fá námslán þarf að fá einhvern sem á eignir til að gerast ábyrgðamaður að lánunum - það er frekar ranglátt því margir eru að horfast í augu við gjaldþrot eða mikil vanskil. 

Ég hlakka til að sjá hvaða lausnir verða í boði - ég mæli annars með því að fólk sem missi vinnuna prófi sjálfboðaliðastörf - fari í sjálfstæða atvinnubótavinnu með því að fræða sig sjálfstætt þó því fylgi ekki neinar prófgráður - en okkur atvinnuleysingjum vantar miðstöðvar þar sem við getum hist og borið saman sögur okkar og hleypt kappi í hvort annað. Vona að það verði boðið upp á slíkt hið fyrsta. 

Hægir á vexti atvinnuleysis