Margslunginn dagur í gær

Náði tölvupóstinum niður fyrir 400 sem ég á eftir að flokka, lesa, svara, bregðast við:) Skúraði sem óð manneskja, enda fær maður mikla aukaorku þegar sólin sýnir sitt fagra andlit. Allt í fínlegu ryki vegna framkvæmda við blokkina. Verið að brjóta allar svalir af með tilheyrandi látum.

Drifum okkur til Hveragerðis til að kíkja á ömmu, reyndi að mæta með eins litlum fyrirvara og mögulegt er til að hún færi nú ekki að gera hlaðborð. Henni tókst að gera það á mettíma, blind að baka lummur, sem stundum er nokkuð svartar en það er allt í lagi, hún bakar þær af slíkum kærleika. Annars þá held ég að það hljóti að vera erfitt að vera gamall á Íslandi. Fólkið er meira og minna afskipt, er oft stolt til að biðja um hjálp eða þiggja hana. Amma var lengi vel húsvörður í barnaskólanum í Hveragerði og mikið meira en það. Hún er gullnáma þegar kemur að útileikjum, vísum og hverskyns fróðleik sem snýr að börnum. Hún beitti hlýlegum aga og enginn óð yfir hana þegar hún var í barnaskólanum. Í gær kenndi hún krökkunum mínum leikinn "kjöt í katli", dásamlegt að sjá hana að leik, það var eins og hún lifnaði öll við og barnið innra með henni braust út um stund.

Svo fórum við í göngutúr í Hverageragerði, um hverasvæðið og niður að fossinum. Fór að rótum hans og hlóð batteríin mín. Fann fallega steina og hlustaði á fossinn. Man þegar ég hitti seiðmennina í Kólumbíu, hvað ég öfundaðist út í þá að skilja enn mál dýra og jarðar. Er alltaf að hlusta og vonandi mun ég einn daginn líka skilja mál málleysingjanna.

Eftir gott labberí og klifurleik fórum við heim á leið. Horfði svo á Undercurrents DVD með Neptúnusi í gærkvöldi, á alveg frábæran grínista af pólitísku tagi sem heitir Mark Thomas. Fann slatta af þáttum með honum á youtube áðan, ætla að deila fyrsta þættinum með ykkur.

Skemmdarverk

Í gærkvöldi leið mér sem ég byggi í Sódómu - eftirlitlaust partý unglinga í næstu blokk með miklum hávaða. Sá tvær stúlkur gera sér að leik að reyna að skemma bíla hér á bílastæðinu, kallaði til þeirra "Hvað eruð þið eiginlega að gera?" Þá hlupu þær á brott með skottið á milli... stuttu seinna heyrði ég meiri óhljóð á bílastæðinu, voru þar tveir jakkafataklæddir drengir sem héldu leiknum áfram þar sem stúlkurnar hættu. Brutu allavega af einum bíl rúðuþurrku. Ég var ekki nógu snögg til að gera eitthvað í því, sá bara í skottið á þeim.

Skil ekki svona skemmdarverkaþörf. Það var eins og þessu fólki væri algerlega fyrirmunað að skilja að með þessum random aðgerðum sínum væru þau að gera öðru fólki mikinn óleik. Ef ég hefði ekki skipt mér af hefðu sennilega fleiri bílaeigendur í blokkinni minni vaknað upp við vondan draum. Var næstum því búin að skipta mér af þessum gleðiskap í næstu blokk. Skil ekki hvernig fólkið sem bjó í blokkinni þoldi lætin. Hann var svo mikill að ég í næstu blokk átti erfitt með að sofna. Skil reyndar alls ekki foreldra sem leyfa eftirlitlaus partý, kaupa jafnvel áfengi fyrir krakkana. Mér tókst að kúga mömmu til að kaupa handa mér brennivín og sígarettur þegar ég var í heimavist og langt undir lögaldri. Veit ekki hvort að það sé merki um dómgreindarleysi hennar eða varnarleysi hennar gagnvart sannfæringarkrafti mínum, nema hvorutveggja sé:)

Að varpa frá sér ábyrgð

Merkilegt hvað við erum mikið viðbragðasamfélag. Það er greinilega eitthvað að á þeim slóðum þar sem mávarnir eru vanir að finna æti á hafi úti. Eins og fuglafræðingar hafa verið að benda á, þá eru mávarnir að benda okkur á að eitthvað sé ekki eins og það á að vera með því að sækja svo mjög til byggða. Ekki þætti mér það ólíklegt að mannskepnan hafi eitthvað að gera með að æti vantar þar sem þeir eru vanir að sækja sér það.

Eru það þá eðlileg viðbrögð að bregðast við vandanum eins og margir vilja, að skjóta bara mávana, þessar fljúgandi rottur? Er ekki kominn tími til að við sem mannkyn skoðum hvernig við erum að riðla eðlilegu jafnvægi í náttúrunni vegna mikils ágangs okkar. Við búum til vandamál en erum svo sjaldnast tilbúin að axla ábyrgð á þeim.

Reynar þá var gaman að sjá þessa frétt hérna, því ég var akkúrat að hugsa á þessum nótum á labbi mínu í vinnuna, en ég er svo lánsöm að labba framhjá tjörninni dag hvern. Þar voru menn að gefa fuglunum brauð og mávarnir ansi ágengir, enda greinilega mjög svangir. Ég er viss um að ef mávurinn gæti valið á milli brauðs og síldar að hið síðarnefnda væri efst á óskalistanum.

Þannig að í stað þess að ætla bara að skjóta burt vandamálið væri nú óskandi að það væri rannsakað hvað veldur því að þeir sækja til byggða. Efast um að það sé losti í myglað brauð sem hreki fuglana til byggða.

„Það er ekki allt í lagi“

Ekkert stóriðjustopp!!! hjá RiseSSunni

Vonbrigði mín stærri en orð fá lýst.  Var búin að ákveða að vera jákvæð gagnvart þessari nýju ríkisstjórn uns þau birtu sína stefnuyfirlýsingu. En umhverfismálin eru mér mikið hjartans mál og ég harma að þau séu ekki sett á oddinn. Fagra Ísland virðist vera glansrit sem enginn tekur mark á.

Auðvitað hljómar margt af sameiginlegum stefnuyfirlýsingum fallega og ég vona svo sannarlega að kjör aldraðra og öryrkja verði bætt strax.

Stefnt að lækkun skatta á kjörtímabilinu

Þetta er ákveðinn léttir

Hefði ekki verið gott ef Alcoa hefði náð yfirráðum yfir Alcan. Þeir eru að verða allt of stórir og frekar ógeðfellt fyrirtæki þegar maður lítur á þeirra sakaskrá.

Þetta er allavega ljós punktur á annars frekar ömurlegum riseSSudegi. Get ekki sagt að þessi nýja ríkisstjórn sé beinlínis að kæta mig, þó vissulega séu þarna eðal manneskjur inn á milli.

Alcan hafnaði yfirtökutilboði Alcoa

Lífsbókin endurflutt

Útvarpsþátturinn fíni um mömmu, aka Bergþóru Árnadóttur sem var á dagskrá 1. maí verður endurfluttur á rás 2, fyrri hlutinn verður 28. maí klukkan 22:10 og seinni 29.maí klukkan 20:30

Frábær viðtöl við alls konar skemmtilegt fólk og hellingur af lögum sem ekki hefur verið auðvelt að finna til hlustunar um langa hríð.

Það er Andrea Jónsdóttir sem á heiðurinn af þessum þætti og á hún mikið lof fyrir að búa til svona einlægan og skemmtilegan þátt.

Alcoa tapar mikilvægu máli í Brazilíu

Þetta þykja mér góðar fréttir og finnst jafnframt kominn tími á að þetta fyrirtæki sé skoðað í heild sinni. Þeir haga sér glæpsamlega og oft á tíðum af fullkomnu siðleysi í öðrum heimshlutum. Hef kynnt mér þetta fyrirtæki og þeirra vafasama slóð er ekki falleg. Þeir eru umhverfissóðar af versta tagi og hafa verið kærðir fyrir mýmörg mál sem hafa eyðilagt líf fólks vegna svika þegar kemur að umhverfisþáttum, eins og til dæmis mengun. En þetta kemur okkur kannski ekkert við. Þeir myndu nú aldrei fara að haga sér svona hjá okkur!? Svo getum við nú líka sagt að með því að bjóða þeim hingað þá erum við að bjarga vesalingunum sem láta fara svona illa með sig frá því að Alcoa byggi verksmiðjur hjá þeim. Reyndar þá gátu talsmenn Alcoa ekki svarað fyrir það hvort að verksmiðjum yrði lokað þar sem óumhverfisvæn orka er notuð til að kynda undir bræðsluna. Annars þá hvet ég þá sem nenna að lesa þessa stuttu frétt sem mér var send um Brasilíu málið, hef ekki tíma til að þýða hana yfir á okkar ástkæra.

During a meeting today with the Pará State Secretary of the Environment, Valmir Gabriel Ortega, the State and Federal Public Prosecutors Offices requested cancellation of the environmental license granted to Alcoa to mine bauxite in the municipality of Juruti. In an exclusive interview with the Amazonia website, the coordinator of the State Public Prosecutors Office (MPE) Environmental Center, Prosecutor Raimundo Moraes, explained that the decision to request suspension aims at averting a violent reaction by the local population, which wants the company to leave at any cost, and also to conduct a rigorous review of the license.

Although mining operations are only scheduled to begin in 2008, during public hearings held on May 2nd and 3rd, the community claims that it is already suffering impacts from construction of lodgings for employees of the multinational, a port and a road.

Moraes said, "the impacts are so obvious that Alcoa has not denied any of them. Alcoa said it was correcting the problems and recognized that it does not enjoy good relations with the community". Moraes, however, stated that the problems run deep and will not be set straight with just repairs.Impacts One of the main complaints raised at the hearings is contamination of the waters in rivers that flow through the town.

Technical studies detected the presence of feces coliforms in Jará Lake, which supplies water to the municipality, and data from the municipal health department show that cases of viral hepatitis, caused by ingesting water contaminated by human feces, jumped from 26 in 2006 to 121 in the first four months of this year. The community accuses Alcoa of not performing proper treatment on sewage from the lodging of its employees. Moreover, Incra representatives present at the meetings presented pictures and other documents that prove that the company is conducting deforestation in areas not authorized inside the Juruti Velho and Socó Agro-extractivist Settlement Projects.

Another complaint is the increased expenses of public agencies, which are faced with increased demands for health, education and infrastructure. "If, after the review is conducted, Alcoa can act correctly, alright, otherwise it would be best for them to leave, as we do not need to bear these costs. It is unfair that they keep the riches produced here and we keep the burdens", says Moraes.

The prosecutor believes that the population has shown its lack of trust in the company and accuses the multinational of trying to upset the hearings. "They tried to co-opt leaders, offering 10 jobs to each community".

License
The preliminary license for installation of the Alcoa plant was granted by the State Environmental Council (Coema) in 2005. At the time, the representative of the State Public Prosecutors Office (MPE) voted against the authorization. Soon afterward, the agency, together with the Federal Public Prosecutors Office (MPF), filed a class action suit petitioning for the suspension of the company's activities in the region.

The hearings this week were attended by the coordinator of the MPE Environmental Center, Prosecutor Raimundo Moraes and Federal Attorney Daniel César Azeredo Avelino, who commands the (Federal Public Prosecutors Office (MPF) in Santarém. Members from both agencies also visited the affected locations.

By Renata Gaspar

Handsprengja í morgunsárið...

... er bara snilld. Ingólfi og Eiríki tekst að skapa ljóð úr orðum ráðamanna sem vekja hjá manni óhugnalega kátínu og réttláta reiði í sömu andrá. Langt síðan ég hef skemmt mér jafn mikið yfir ljóðabók. Þarna eru ljóðaþýðingar á orðum þeirra ráðamanna landsins sem ég hef löngum haft á aðal gremjulista mínum, vegna fádæma einfeldni og hroka. En ekki má gleyma mannvitsbrekkum úr hinum alþjóðlega hring stórmennskubrjálæðinga sem afhjúpa sig sem viðkvæm skáld samanber fyrstu ljóðlínur bókarinnar eftir Serbneska flóttamanninn og stríðsglæpamanninn Karadzic, "Ég lofa mikilfengleik byssukúlunnar, sem hún borar sig í gegnum vaxköku heilabúsins". Hinn engilblíði zíonisti Stern skrifar "eins og steypuhræru mótum líkin eins og múrsteina og reisum heimili vor í okkar heimalandi". En það grillir í von þegar maður eins og Ronald Reagan brýst út úr þankanum þrönga og sýnir okkur í djúp sálar sinnar, "Til hvers er þetta litla líf - hve lítið þarf til að ónýta dag ..." og landsfaðirinn Túrkmenbasí er ekki síður rómantískur í sínu daðri við skáldagyðjuna "Veljum oss þúsund vængjuð hross og ferðumst í bæn yfir sléttur lands og heiðar".

Hægt að gefa sér og sínum þessa snilldarbók sem er núna að skríða upp í topp 10 listann minn yfir uppáhalds bækur með því að smella hér.

Ég þarf annars að þjóta, þarf að fara til Hafnarfjarðar að kyrja og fara svo að versla í Fjarðarkaupum, eina kaupfélagið í höfuðborgarsvæðinu sem mér finnst gaman að fara í. Verð að komast yfir þessa búðarfælni. Er alltaf á svo miklum spretthlaupum að ég kaupi alltaf eitthvað allt annað en ég lagði í leiðangur að ná í. Svo er það áframhaldandi rykhreinsun að vori á heimli voru. Ég þori ekki að fara að svara tölvupóstum en það eru um 450 sem ég á eftir að lesa, henda, svara, flokka í inboxinu mínu. Arg...

Ef að vilji er fyrir hendi þá er hægt að mynda vinstri stjórn

Finnst það skilda ISG að byrja á að fara í stjórnarmyndunarviðræður við vinstri í stað hægri. Hún sagði í öllum viðtölum og umræðuþáttum fyrir kosningar að það væri hennar fyrsti kostur og því er hún skuldbundin gagnvart kjósendum að gera eitthvað meira en að draga ályktanir af því sem hún hefur heyrt í fjölmiðlum. Finnst hennar rök fyrir því að fara fyrst í formlegar viðræður við Sjálfstæðisflokkinn ótrúverðug og vona innilega að hún standi við kosningaloforð sín. Auðvitað verður það ekki endilega auðvellt en til að halda einhverjum trúverðuleika fyrir sinn flokk þá finnst mér hún verða í það minnsta láta á það reyna með opnum huga. Þau rök að SJS hafi sagt eitthvað í hita leiksins sé ástæða fyrir þessu nýjasta útspili halda bara ekki vatni í huga mér þegar svo mikið er í húfi og raun ber vitni.

Satt best að segja þá virðist þetta vera allt eitt risastórt leikrit og ég er kannski bara svona einföld að skilja ekki leikreglurnar. Er hún ekki að fatta að í hennar höndum er á þessari stundu lykilstaðan til að koma ríkisstjórninni eins og hún leggur sig frá. Ég vona það og ég vona að hún byrji ekki á því að svíkja kosningaloforð, hvað verða þau þá mörg? Var að vona að Samfó og VG gætu byrjað nýja tíma - mikið af nýju fólki að koma inn á þing sem hefur ekki þessa erfiðleikasögu á bak við sig og því ætti þetta fólk að geta einbeitt sér af málefnum en ekki gömlum skærum. Er ekki kominn tími til að vinstri öflin standi saman? Eða ætlar ISG að leggja grunninn að því að það verði aldrei vinstristjórn hérlendis.

Reyndar er það öruggt að við erum að sigla inn í samdráttarskeið og ef til vill er ágætt að Sjálfstæðisflokkurinn axli ábyrgð af sínum verkum með því að vera í stjórn, vonandi mun þá Samfó bera gæfu til að sporna við því að það verði leyst með frekari stjóriðjuframkvæmdum. Ég er bara ekki nógu gömul til að hafa skilning á hvernig hægri og vinstri starfi saman svo úr verði góður jöfnuður, er það hægt, munu þau málefni sem sett voru á oddinn hjá Samfó fá brautargengi? Mun Samfó lenda í sömu pattstöðunni og Framsókn, með því að hafa ráðuneyti sem vissulega þarf að taka til í en þurfa að vera upp á náð og miskun fjármálaráðherra sem væru þá úr röðum Sjáflsæðisflokks?

Steingrímur: Stjórn Sjálfstæðisflokks og Samfylkingar allt of hægrisinnuð

Vatn vs Kók

VATN

75% Bandaríkjamanna eru með krónískan ofþurrk. (Á sennilega við helminginn af íbúum jarðar)
Hjá 37% Bandaríkjamanna er þorstaskynjunin orðin svo slök að hún er oft túlkuð sem hungur.

Jafnvel vægur ofþurrkur getur hægt á brennslukerfi líkamans um 3%.

Eitt glas af vatni nægði til að slá alveg á hungurverki seint að kvöldi hjá næstum 100% þátttakenda
í könnum hjá Háskóla í Washington.

Ónóg neysla af vatni, er í FYRSTA SÆTI yfir það sem veldur þreytu yfir daginn.

Niðurstöður úr einni könnun gefa til kynna að drekki fólk 8-10 glös af vatni yfir daginn
gæti það létt á bakverkjum og liðaverkjum hjá allt að 80% þeirra sem þjást af þessum verkjum.

Ef vatnið í líkamanum minnkar um aðeins 2% getur það valdið lélegu skammtímaminni,
erfiðleikum með einfalda stærðfræði og skorti á einbeitingu við lestur á tölvuskjá eða annað prentmál.

Að drekka 5 glös af vatni á dag dregur um 45% úr áhættu á krabbameini í þörmum auk þess sem það getur dregið
allt að 79% úr áhættu á brjóstkrabba og lækkar áhættu karlmanna á blöðruhálskrabbameini um 50%.

Viltu ekki fá þér vatnssopa???

KÓK

Í mörgum bandarískum fylkjum er vegalögreglan með 10 lítra af kóki bílunum hjá sér til að þrífa blóð af vegum eftir umferðarslys.

Þú getur sett T-Bone steik í skál af kóki og hún verður horfin eftir 2 daga.

Til að hreinsa klósettið:
Helltu einni dós af kók ofan í klósetið, bíddu í eina klukkustund og sturtaðu svo niður. Sýran í kókinu leysir upp bletti.

Til að fjarlægja ryðbletti af krómstuðurum: Dýfðu krumpuðum álpappír í kók og nuddaðu stuðarann.

Til að hreinsa rafgeyminn í bílnum: Helltu einni dós af kók yfir rafgeymatengslin.

Til að losa ryðgaðan bolta (skrúfu). Rennbleyttu tusku með kóki og haltu henni að boltanum í nokkrar mínútur.

Til að fjarlægja fitubletti úr fatnaði: Helltu einni dós af kók í þvottavélina bættu við þvottaefni og þvoðu eins og venjulega. Kókið leysir upp fitublettina.

Framrúðan á bílnum þínum hreinsast líka vel með kóki.

Virka efnið í kók er phosphoric acid. Ph í kók er 2.8. Það getur leyst upp nögl á ca fjórum dögum.

Til að flytja Coca-Cola sýrópið (fullan styrk) þurfa vöruflutningabifreiðar að hafa á sér viðvörunarskilti
sem einungis eru notuð á bíla sem annast flutning á MJÖG ÆTANDI EFNUM.

Dreifingaraðilar Coca-Cola hafa notað gosdrykkinn í um það bil 20 ár til að hreinsa vélarnar í trukkunum hjá sér.

Langar þig enn í hressandi dós af Cola drykk?

Frábært myndband frá Saving Iceland

Ef ríkisstjórnin heldur áfram er ágætt að hafa í huga hverju hefur verið fórnað og hvað er á teikniborðinu. Viðtöl við Grím Björnsson, Sigga pönk, Ólaf Pál og fleiri um Kárahnjúkavirkjun.

Eitthvað annað en pólitík

Fyrir fjöldamörgum árum fann ég áhugaverðan stað á netinu sem heitir "The Hungersite". Þar er hægt að gefa mat til hungraðra með því að smella á þar til gerðan link einu sinni á dag sér að kostnaðarlausu. Vefurinn er enn til og hefur vaxið ört. Þar er nú hægt að smella til bókagjafa fyrir nemendur í þróunarlöndunum, bjarga skika af regnskógi og borga fyrir leit að brjóstakrabbameini svo eitthvað sé nefnt. Þarna er líka einhver flottasta netverslun í heimi. Hægt að fá allt á milli himins og jarðar og flest er það tengt "fair trade" viðskiptum. Hægt er að kaupa gjafabréf upp á upphitun í skólastofu í Afghanistan, kennaralaun, skólafatnað og margt fleira sem kostar ekki svo mikið en getur skipt sköpum fyrir fólk sem á ekki neitt. Þetta er hin fullkomna gjöf fyrir fólk sem á allt og þarf ekki meira af veraldlegum hlutum.

Ég hvet fólk til að kíkja á þennan vef og gefa eins og fimm mínútur af tíma sínum dag hvern með því að smella á linkana góðu og ef fólk er í þroti í gjafahugmyndum þá er þessi búð alger himnasending. Ég hef keypt hitt og þetta þarna, gaf ömmu til dæmis gjafabréf upp á að klæða skólabörn í Afghanistan svo þau geti stundað nám í jólagjöf. Allt sem ég hef pantað hefur skilað sér og það er ævintýri líkast að taka upp pakka frá þeim.

"The Hungersite"

Hvað er að þessari þjóð minni?

Með atkvæði sínu var stór hluti hennar að velja áframhaldandi stóriðju, áframhaldandi eyðileggingu á náttúruperlum okkar, einkavæðingu heilbrigðiskerfisins, einkavæðingu Landsvirkjunar, einkavæðingu á vatnsrétti og sýna stuðning sinn við Írak stríðið, samþykka kvótakerfið, samþykkja mannréttindabrot á örykjum og öldruðum, samþykkja ósanngjarnt skattkerfi þar sem þeir sem eiga minnst borga hlutfallslega mest.

 Ég held að ég hafi verið óþarflega bjartsýn á vinstri stjórn gæti orðið að veruleika og er núna satt best að segja mjög hrygg. Ég hreinlega trúi þessi ekki. En best er að vakna og horfast í augu við ömurleikann í öllu sínu veldi og reyna að finna leiðir til að takast á við hann. Vildi að Ómar og co hefðu haft hugrekki til að gefa eftir atkvæði sín fyrir kosningar en ekki eftir. Hvað svo sem fólk segir þá voru þau samkvæmt könnunum að taka atkvæði frá VG og ég þekki fjölmarga sem hefði kosið VG sem voru að kjósa Ómar persónulega.

Enn einu sinni

Baráttuhátíð VG í gærkvöldi

 Það var alveg troðfullt út úr dyrum í kosningamiðstöð VG á Grensás í gærkvöld -mikil stemmning - mikill baráttuhugur í fólki og mikil samkennd. Hafði heyrt margar draugasögur og flakksögur um fólkið í VG áður en ég fór að vinna með því og allar reyndust þær ósannar. Hef sjálf alla tíð haldið því fram að VG sé flokkur með stórt hjarta og eftir að hafa kynnst fólkinu sem knýr hann áfram þá veit ég af hverju. Þetta er allt saman ákaflega hjartastórt fólk með heilbrigða skynsemi að leiðarljósi. Þau hafa fengið samfélagsgenið í vöggugjöf og er í sannleika umhugað um náunga sinn og um velferð þessa lands og þjóðar.

Frábær skemmtiatriði og mergjaðar ræður. Það eru enn tveir dagar til kosninga og hinn mikli meðbyr sem við höfum fundið í samfélaginu mun skila sér á einn eða annan máta. Hinn mikli sigur er að grænu málin hafa orðið ofaná í þessari kosningabaráttu og það er ekki lengur hallærislegt að vilja skila landinu og þess gæðum til komandi kynslóða óspjölluðu.

Ég fékk að flytja tvö ljóð í gærkvöldi og naut til þess stuðnings hans Hjörleifs Vals - hann er auðvitað bara snillingur í að tvinna tóna við ljóð. Læt ljóðið fyglja hér en ég orti það fyrir Dimmugljúfur, fyrir Lindur, fyrir alla þá náttúru sem liggur nú undir Hálsalóni í jökuleðju. Vaknaði í morgunn og sat þá Hrafn á þakskeggi og ég sakna þess að skilja ekki mál þeirra. Á þessari stundu flæðir haglél frá dimmu skýi, ég læt mig dreyma um að þeir sem eru ábyrgir fyrir skemmdarverkum á þessu landi mínu fái að gjalda þess með því að fólk kjósi þá ekki næstkomandi laugardag. Ég læt mig dreyma um að fólk muni Írak, að það muni öll loforðin sem hafa verið svikin og hve gjöfult þetta land hefur verið þeim. Er ekki tími kominn til að koma fram við það af meiri virðingu?

Ísland örum skorið

dimmugljúfur
hljóð
       –aftökustaður

í nið dauðadæmdra fossa
sem kvíslast
um löngu gleymdar slóðir
                 hvíslast á löngu gleymdar raddir


"veistu að þinn vinur er að deyja"

angan agnarsmárra blóma
dregur mig niður

                         n
                        i
                     ð
                        u
                           r

                              í hrjóstrugt mosabeð

                              og ég get ekki
                                               annað en andað tárum

hvers megnug er rödd mín gegn
vítisvélum sem bryðja fjöllin
                             eins og sætabrauð

hvers megnug eru orð mín
gegn almáttugu sinnuleysinu

                     forynjur og tröll
búa ekki lengur í fjöllunum
þau hafa tekið sér bólfestu
í hjörtum mannanna

nei álfar eru ekki menn
huldufólkið flúið drauma okkar

hvern dreymir lengur
um barnsburði í klettum

                                     hvers virði er að sjá
það sem enginn vill vita

ég heyri í fínlegum vængjum hugsanna minna

                                              vængsláttur fiðrildana
hrindir af stað stormi í fjarlægri heimsálfu


ég bíð frétta
af hvirfilbylum og bólgnuðu vatni
                                    jarðskjálftum og gjósku



Tek það fram að jarðskjálftar og gjóska getur líka verið tákn um fólk,
um breytingar. Fyrir mér í dag er það önnur ríkisstjórn.