Hjartanlega sammála Kristjáni

Það hefur verið ömurlegt að horfa upp á þá aðför sem hefur verið höfð í frammi gagnvart atvinnulausu fólki. Það gleymist oft hve erfitt það er að þurfa að fá atvinnuleysisbætur og sjá ekki fram á að finna vinnu. Margir finna til þunglyndis og dagarnir verða æði langir hjá þeim. Síðan bætast við áhyggjur af fjármálum og framtíðinni. Það er kominn tími til að þessari aðför ríkisvaldsins linni. Meirihluti þeirra sem eru á bótum eru ekki að svindla á kerfinu og eru rétt eins og þeir sem hafa misst eigur sínar í hrunadansinum, fórnarlömb þessa algera kerfishruns sem við erum að glíma við.

Það er margt sem betur mætti fara í kerfinu hjá Vinnumiðlun - hvernig væri að fá eitthvað af atvinnulausa fólkinu sem hefur reynslu af mannauðstjórnun og tölvukerfum til að vinna að úrbótum til að kerfið verði mannlegra og skilvirkara?

Atvinnulaust fólk-ekki skrokkar

Athugasemdir

[Haukur Nikulásson, 26.8.2009 kl. 20:32]

Þar sem ég starfa við að taka á móti avinnuleitendum þá gremst mér að ýjað sé að því að við séum almennt að líta á skjólstæðinga okkar sem glæpamenn og séum í "aðför" að þeim. Þetta er ekki í fyrsta skipti sem þú ert meira en lítið fjarri sannleikanum um málefni Vinnumálastofnunar.

Gleymdu því ekki að við stöndum þessu fólki talsvert nær heldur en þið þingmennirnir. Við stöndum nefnilega í því alla daga að taka móti því og sinna þörfum þess að bestu getu. Það erum við sem erum oft eina ráðgjöfin sem þeim býðst. Mörg okkar höfðu áður komið sem skjólstæðingar og þekkjum því málin báðum megin borðsins.

Ég hef áður lagt til við þig á þessum sama vettvangi að þú kynnir þér málin áður en þú ferð í sleggjudóma af þessu tagi. Þú hefur ekki sýnilegan áhuga á því heldur notar tækifærið til að hnýta í þá sem sinna málunum í einhverjum óskiljanlegum tilgangi.

Ég tek fram að ég er ekki talsmaður Vinnumálastofnunar og hér er því aðeins um einkaskoðun að ræða. Ástæðan fyrir því að ég legg hér orð í belg er til að varna því að þú espir skjólstæðinga ómaklega gegn okkur sem erum að sinna þessu fólki af alvöru, alúð og mestu velvild. Okkur er engin greiði gerður, í nógu vandasömu starfi samt, að þingmaður rói í því að fólk komi til okkar bálreitt með svona ranghugmyndir.

Þú mátt hins vegar nota aðstöðu þína og hvetja stjórnvöld til að setja tímabundið meira fé til Vinnumálastofnunar svo hún geti bætt þjónustu sína. Ekki er vanþörf á því.

[Anna Benkovic Mikaelsdóttir, 26.8.2009 kl. 20:38]

það er hörmung að vera atvinnulaus!...en meiri hörmung að SVINDLA með það, en það gera aðallega atvinnurekendur!

[Birgitta Jónsdóttir, 26.8.2009 kl. 20:41]

Haukur það vill svo til að ég var ein af þessum atvinnulausu manneskjum áður en ég fór inn á þing og ég þekki ágætlega til hve það eru margar brotalamir í þessu kerfi og hef því miður orðið fyrir dónaskap frá starfsfólki vinnumiðlunar - þó svo ég hafi líka fengið ágæta þjónustu.

Helsti áhuginn hjá fulltrúum vinnumiðlunar virðist vera að fá meira fjármagn til að finna aðila sem svindla á kerfinu - þetta er því miður blákaldur veruleikinn Haukur.

[Haukur Nikulásson, 26.8.2009 kl. 20:48]

Það er ágætt að þú þarft ekki að kynna þér þetta neitt frekar Birgitta. Það er mjög gott að hafa svona alvitra þingmenn eins og þig. Ég vildi að ég gæti lifað í jafn einföldum heimi og þú.

[sigurður helgason (IP-tala skráð) 26.8.2009 kl. 20:58]

HAUKUR NIKULÁSONN FER MEÐ RÉTT MÁL ,,,,,,,,,,,,,,

Ég er einn af þessum aumingjum sem hef þurt að sækja til vinnumálastofnunar eftir 30 til 40 ára vinnu,

ÞAR ER BARA YNDISLEGT FÓLK VALIN MAÐUR Í HVERJU RÚMI...

Haukur er einn af þeim

BIRGITTA þú ert kominn á réttan stað fyrir bullið, 

[Ásgerður , 27.8.2009 kl. 07:25]

"Helsti áhuginn hjá fulltrúum vinnumiðlunar virðist vera að fá meira fjármagn til að finna aðila sem svindla á kerfinu - þetta er því miður blákaldur veruleikinn Haukur"

Ertu ekki að grínast Birgitta?? Og hverjir eru þá þessir fulltrúar,,líklega yfirmenn stofnunarinnar, en ekki starfsfólkið sem reynir eftir bestu getu að aðstoða fólk í vanda.

Ég vinn sjálf hjá Vinnumálastofnun og reyni eftir bestu getu að aðstoða fólk sem þangað kemur, en ekki að efast um heiðarleika, og við mætum oft reiðu og sáru fólki og fáum að heyra ýmislegt miður fallegt, en að fá svona frá þingmanni, það kemur mér á óvart.

Mikil vonbrigði Birgitta, ég sem hafði trú á þér.

[Birgitta Jónsdóttir, 27.8.2009 kl. 08:02]

Til að vera skýr: þá á ég við æðstu yfirmenn þessa stofnunar, en ekki fólkið á gólfinu. Ég veit vel að það hefur verið ómanneskjulegt álag hjá vinnumiðlun og fólk hefur staðið sig vel undir þessu álagi. Það hafa samt sem áður verið gerð mörg mistök sem eru ekki ykkar. Ég skil ekki af hverju það þarf að líta á það sem eitthvað neikvætt að gagnrýna þessa stofnun - það mætti til dæmis nýta það til að þjónustan gæti orðið betri. Ég trúi því ekki að ykkur finnist allt vera fullkomið hjá vinnumiðlun. Það er ekki verið að gagnrýna fólkið á gólfinu - en segið mér í fullri hreinskilni hvort að ykkur finnist það virkilega að það sé ekkert sem betur má fara hjá vinnumiðlun?

Ég vinn til dæmis á vinnustað sem er stöðugt verið að gagnrýna og ekki dettur mér í hug að halda því fram að ekkert mætti betur fara hjá okkur.

[Haukur Nikulásson, 27.8.2009 kl. 08:46]

Birgitta, það má ýmislegt laga, en til þess þurfið þið á Alþingi að veita til þess meira fé. Við stöndum á öndinni í þessum málum og líka æðstu yfirmenn stofnunarinnar sem ég tel standa sig með prýði.

Þeir þurfa að taka að sér það óvinsæla hlutverk að eiga við þá sem svindla á kerfinu vegna þess að það þeirra lögbundna hlutverk.

Við erum stöðugt að reyna að bæta vinnubrögðin og koma með tillögur að því sem betur má fara. Það fer sína réttu leið til yfirmanna og síðan ráðherra og þings. Endurskoðun laga um atvinnuleysistryggingar er stöðugt í gangi, þú hlýtur að verða vör við það upp úr næstu áramótum og þá máttu leggja málunum lið.

[Birgitta Jónsdóttir, 27.8.2009 kl. 10:19]

ég mun með sanni gera allt sem í mínu valdi stendur til að leggja málinu lið og ef þú hefur einhverjar tillögur Haukur þá er þér velkomið að vera í sambandi.