Sameinuð stöndum við - sundruð föllum við

Það virðast enn vera til manneskjur hér á landi sem sætta sig við það hvernig á málum er haldið í stjórnsýslunni - þetta fólk fer stórum í bloggfærslum og kommentakerfum. Það vinnur markvisst að því að reyna að sundra þeirri samstöðu sem í landinu ríkir um að ástandið sé með öllu ólíðandi. Það sem ég held að fari mest fyrir brjóstið á fólki er sú staðreynd að enginn hefur verið látinn sæta ábyrgð á fallinu og sú staðreynd að bankatopparnir eru enn við völd í bönkunum, þó þeir hafi snyrtilega verið færðir til eins og í refaskák.

Það var því sérstakt fagnaðarefni þegar allir hinir ólíku hópar sem hafa staðið fyrir einhverri andspyrnu við ríkjandi ástand ákváðu að standa saman um eina aðgerð. Þjóðfundurinn 1. desember sýnir að ólíkir hópar geta unnið saman að einu markmiði þó þeir komi frá eins ólíkum áttum og þeir sem kvitta fyrir samstöðuna. (sjá færsluna hér á undan)

Við verðum að standa saman á þessum erfiðu tímum - ef myndlíking ráðherra er rétt að við séum í fárviðri eða hamförum er þá ekki eðlilegt að fólk standi saman? Hamfarir snerta alla - við erum ef til vill að upplifa einhverjar þær mestu hamfarir af manna völdum sem þjóðin hefur nokkru sinni staðið frammi fyrir. Því er brýnt að við stöndum saman. Þjóðfundurinn snýst um þær eðlilegu kröfur að einhver verði að sæta ábyrgð en hann snýst fyrst og fremst um samstöðu. 

Fullveldi okkar verður 90 ára 1. desember næstkomandi - því miður þá er ekki mikill fögnuður í brjóstum okkar - miklu frekar uggur um þá tíma sem eru á næsta leiti. Látum það ekki eftir okkur að draga fólk í dilka vegna ólíkra skoðana - látum það miklu frekar eftir okkur að finna þá fleti sem við getum verið sammála um. Við getum verið sammála um að samstaða okkar skiptir máli. 

Við erum komin nóg af spillingu og valdaklíkum - ekki satt. Við getum allavega verið sammála um það?

Ég hvet ykkur elsku þjóðin mín að hætta að einblína á smáatriðin sem sundra okkur - reynið frekar að finna það sem sameinar okkur. Við almenningur erum öll á sama báti - það erum við sem þurfum að bera byrðarnar sem settar eru á okkur að okkur forspurðum. 

Ég er venjuleg manneskja - mér var ekki gefið andóf við spillingu eða mannréttindabrot í vöggugjöf. Við skiptum öll jafn miklu máli - það á ekki að vera til einhver stétt fólks sem lítur svo á að það eigi meiri rétt á að geta brauðfætt börnin sín og veitt þeim húsaskjól.

Nelson Mandela sagði: When those in power deny you of freedom, the only path to freedom is power. Gleymum ekki að valdið er fólksins ekki öfugt.

Athugasemdir

[Sturla (IP-tala skráð) 28.11.2008 kl. 08:38]

Það er til fullt af fólki hér á landi sem vill ekki að ríkisstjórnin fari frá, amk ekki fyrr einhvað fólk kemur með aðrar lausnir. En á meðan þeir sem mest gagnrýna koma ekki með raunhæfar lausnir (og að segja "Við förum bara í evrópusambandið og tökum upp evruna og þá leysist allt" er ekki lausn) þá sé ég ekki tilganginn í því að reka hana ólöglega frá völdum. Gleymum því ekki að hún er lýðræðislega kosin til fjögura ára og hún hefur ekki verið að brjóta lög.

Staðreyndin er að það er ENGIN töfralausn á okkar vandamálum. Engin. Þetta verður erfitt og þetta mun taka tíma. Og við stjórvölin þurfum við level-headed fólk en ekki heithausa með stuttan kveikiþráð sem elta skoðanakannanir.

[Jón Snæbjörnsson, 28.11.2008 kl. 12:18]

mín skoðun er einföld "réttlæti" og óháð pólitík

[Jón Sigurðsson (IP-tala skráð) 28.11.2008 kl. 13:43]

Það er merkilegt, að enn skuli 20% aðspurðra í skoðannakönnunum vilja kjósa Sjálfstæðisflokkinn. Þetta er kannski svona eins og að styðja fótboltafélag, árangurinn er aukaatriði.

[Sturla (IP-tala skráð) 28.11.2008 kl. 13:59]

Spámaður: Nú er ég ekki sammála þér. Á meðan ríkisstjórnin er ekki að brjóta stjórnarskránna eða lög þá ber henni ekki að víkja. Ég er á því að það eru stórir gallar á stjórnkerfi okkar en ég vil fara réttu leiðina til að laga þá. Ég mun aldrei reyna að þvinga skoðunum mínum upp á aðra með ofbeldi, þá hefur lýðræðið tapað.

[corvus corax, 28.11.2008 kl. 14:23]

Já, við skulum ekki einblína á smáatriðin heldur einbeita okkur að stóru málunum, aðalmálunum í hruninu mikla. Mikilvægasta aðalmálið skiptist í 3 þætti, alla jafnmikilvæga: Einn þátturinn felst í því að finna sökudólgana og helst að koma þeim undir mannahendur. Alla vega verður að henda þeim út úr bönkum og fjármálafyrirtækjum þar sem þeir hafa haldið uppteknum hætti þessar átta vikur sem liðnar eru síðan hrunið byrjaði. Annar þáttur felst í því að koma ríkisstjórninni frá með öllum tiltækum ráðum þar sem hún er óstarfhæf og mönnuð eintómum svikurum og óvinum almennings. Þriðji þátturinn og ekki minnst mikilvægur er að henda stjórn Seðlabankans út eins og hún leggur sig ásamt fjármálaeftirlitinu. Þessir þrír þættir eru mikilvægastir og allir jafnmikilvægir og nauðsynlegt að hrinda þeim í framkvæmd strax og þótt fyrr hefði verið. Allt annað kemur á eftir þessum þáttum, þar með talið alls konar smáatriði sem dunda má við síðar.

[Jakobína Ingunn Ólafsdóttir, 28.11.2008 kl. 14:42]

Það er dálítið merkilegt að nú á tímum tala stuðningsmenn ríkisstjórnar og þá sérstaklega sjálfstæðisflokks eins og kverúlantar. Þeir sem sitja í stjórnarráðinu hafa ítrekað brotið lög og lögfræðingar telja að neyðarlög standist ekki stjórnarskrá og eru því, út frá sömu rökum, aðgerðir í skjóli þeirra brot á stjórnarskrá.

[Sturla (IP-tala skráð) 28.11.2008 kl. 16:06]

Jakobína: Hvaða lög hafa þeir sem sitja í stjórnarráðinu ítrekað brotið?

Corvus Corax: Er ég að skilja þig rétt að þú vilt nornabrennurnar fyrst og svo einhvern tíman seinna meir fáumst við við kreppuna?

[Guðjón Atlason (IP-tala skráð) 28.11.2008 kl. 19:43]

Ef þú vilt endilega kalla það nornabrennur Sturla.. Já! Engin spurning því þessir glæpahundar sem áttu að stjórna og stýra frömdu glæpsamleg vanrækslu og lugu að almenningi. Gjarnan nornabrennur, þau eiga ekki annað skilið. Svo er víst lausn að ganga í EU og taka upp evru. Þessir helv.... fiskkvótakóngar sem hafa hirt af okkur allan fiskinnn geta étið sk...

Og hana nú....

[Sturla (IP-tala skráð) 29.11.2008 kl. 00:04]

Gaui: Veist þú hverjir gallarnir við inngöngu í Evrópusambandið eru?