Fjölmiðla "blackout" á málefni Tíbets hérlendis

Free Tibet sjónvarpsstöðin

Frábær sjónvarpsstöð sem samtökin Students for a free Tibet halda úti í tengslum við Ólympíuleikana. Stöðin sendir bæði fréttaþátt live og svo er hægt að finna ógrynni af efni sem tengist frelsisbaráttu Tíbeta, hvort heldur það sé nú í dag eða fyrir 50 árum. Hér á Íslandi hafa engir fjölmiðlar lagt vinnu í að kynna sér ástandið eða grafa dýpra en stopul fréttaskeyti frá sínum erlendu fréttaveitum. Ég hef fylgst með athygli því sem komið hefur fram í alþjóðafjölmiðlum en ekki er hægt að segja það sama um þá sem eiga að miðla fréttum til almennings hérlendis. Hef ekki séð neina frétt um þá blaðamenn sem voru handteknir fyrir að vilja fjalla um friðsamleg mótmæli í Peking undanfarna daga. Þessir blaðamenn munu þurfa að vera í fangelsi í 10 daga í Kína fyrir það EITT að vera í vinnunni sinni. Hvar er fjölmiðlafrelsið og af hverju finnst íslenskum kollegum það ekki fréttnæmt að verið er að troða á frelsi til að flytja fréttir. Af hverju er nánast engar fréttir um eitthvað annað en Íslendinga að syngja karókí eða éta pizzur innilokuðum í Ólympíuþorpi sem note bene var byggt á rústum heimila fjölda fólks sem vildi ekki láta rústa sínum heimilum. Af hverju gerir enginn athugasemdir við þá staðreynd að hin svokölluðu sérstöku svæði til mótmæla þar sem fólk þurfti að sækja um leyfi til að mótmæla, er ekkert annað en gildrur svo hægt sé að draga út í dagsljósið þá sem vilja mótmæla og refsa þeim áður en viðkomandi gera það, samanber tvær gamlar konur yfir sjötugu sem dæmdar hafa verið í vinnuþrælkun í heilt ár fyrir að biðja um leyfi til að mótmæla því að hús þeirra voru jöfnuð við jörðu fyrir ólympíuleikana???

Það er búin að vera algert fjölmiðla blackout á Kerti fyrir Tíbet og Raddir fyrir Tíbet styrktarsamkomuna annað kvöld í Salnum. Hvað veldur? Þarna verða topp listamenn, verið að styrkja gott málefni og efla tengsl Íslands og Tíbets. Hefði aldrei trúað því að við myndum alls staðar koma að lokuðum dyrum en það er því miður staðreyndin. Því mun fullt af fólki aldrei fá að vita af þessari frábæru hátíð sem öll er unnin í sjálfboðaliðastarfi og til að styrkja flóttamannamiðstöð í Dharamsala en stór hluti þeirra sem þurfa að fá að dvelja þar eru börn sem koma ein yfir hæstu fjallaskörð í heimi.

Ég er yfirleitt frekar æðrulaus en núna er ég orðin frekar gröm yfir sinnuleysi fjölmiðla hérlendis þegar kemur að málefnum Tíbets. Það má segja að maður sé að fá að upplifa það sem Tíbetar hafa þurft að þola í 60 ár frá umheiminum... endalausa veggi og sinnuleysi. Hvet þá sem ekki þekkja til Tíbets að afla sér frétta og verða við kalli þeirra eftir hjálp frá heimbyggðinni, það er verið að fremja þjóðar- og menningar morð þarna fyrir allra augum. 

 

 

Athugasemdir

[Gunnar Hrafn Jónsson (IP-tala skráð) 23.8.2008 kl. 14:24]

Það myndi koma mér töluvert á óvart ef fjölmiðlar mættu ekki annað kvöld, þó það fari auðvitað eftir vöktum og hvað annað er að gerast. Var kertafleytingin ekki alveg örugglega cover-uð af sjónvarpinu samt?

Því er hins vegar yfirleitt ekki vel tekið þegar fjölmiðlar eru beðnir um að auglýsa viðburði eða safnanir eða slíkt, sama hversu óumdeilanlega frábært málefnið kann að vera. Það þarf alltaf að vera einhver frétt á bakvið málið, sem mér þykir nú reyndar vera nokkuð borðleggjandi í þessu tilfelli. Áhugaverð samkoma og ólympíuleikarnir í algleymi og allt það.

Spurning hvað stóð í fréttatilkynningunni um samkomuna á morgun og á hverja hún var send? Stundum enda svona hlutir í bunkum eftir dögum, þannig að einhver gæti skyndilega séð þetta í fyrramálið.

Með kveðju,

--- Gunnar Hrafn 

[Birgitta Jónsdóttir, 23.8.2008 kl. 14:43]

Það kom nákvæmlega enginn fjölmiðill á Kerti fyrir Tíbet þann 7. ágúst.

Ég hefði talið að þetta væri nokkuð borðleggjandi. En ég vona svo sannarlega að þessi þögn hætti, en það var reynt að komast að í Kastljósi og með góðum fyrirvara, það var reynt að komast að allsstaðar en við lítinn árangur...

Kerti fyrir Tíbet verður haldið í kvöld aftur og ég hef ekki séð neitt um það neinsstaðar í neinum fjölmiðlum... hvað þá að einhver hefði haft samband út af því. Það sem er jafnframt áhugavert við þetta er að það er alls ekki sama fólkið að hafa samband við fjölmiðla út af þessum tveimur viðburðum og því hefði maður haldið að einhver árangur kæmi af þessum tilraunum....

[Gunnar Hrafn Jónsson (IP-tala skráð) 23.8.2008 kl. 15:26]

Já, skrítið, þetta með kertin er svo myndrænt og svona. Það er náttúrulega allt vitlaust að gera hjá öllum út af menningarnóttinni í kvöld en maður hefði haldið að þetta hefði vakið meiri athygli síðast.

[Harpa Rut Harðardóttir (IP-tala skráð) 24.8.2008 kl. 18:02]

Ég verð nú að játa það að mér finnst þetta sorglegt og er vægt til orða tekið.  Ég sendi nú sjálf örfáar staðreyndir um Tibet og fyrirspurn til flestra sjónvarps og fréttablaða hérlendis um hvers vegna við fengjum nærri enga umfjöllun um ástandið þar. Ég spurði líka hvers vegna maður þyrfti sjálfur að sækja fréttir og upplýsingar til erlendra fjölmiðla og hvers vegna það væru allt of oft rangfærslur í þeim fréttum sem hingað koma. Svarið var........ ekkert! Ég veit um fleiri sem hafa sent hliðstæðar fyrirspurnir og heldur ekki fengið neitt svar. Manni er bara spurn.......... eru viðskipti virkilega svona mikið mikilvægari hjá landanum en mannréttindi eða? Vona að sem flestir sjái sér fært að gefa smávegis af sínum dýrmæta tíma í kvöld!!