Með stækkunargler á fortíðina

Hef undanfarið verið á kafi í fortíð mömmu. Eyddi helginni meira og minna í að skoða gamla mogga á netinu þar sem fjallað var um hana. Komst að ýmsu sem ég var ekki meðvituð um sem tengist ferli hennar. Segja má að hún hafi verið á hátindi ferils síns þegar pabbi tók upp á því að láta sig hverfa í Sogið 1987 og Valdi tók upp á því að skilja við hana í kjölfarið. Eftir það rak hvert áfallið á fjörur hennar og hún hvarf meira og minna úr heimi tónlistar. Sú Bergþóra sem var til á Íslandi var ekki sama Bergþóra og var til í Danmörku svo mikið er víst. Það er skringilegt að sjá einhvern hverfa svona algerlega úr sviðsljósinu sem hún lifandi væri dáinn.

Finnst annars sú þjónusta að hægt sé að nálgast gömul blöð á netinu alveg frábær og gagnast vel í svona rannsóknarvinnu. Vona að það verði hægt að nálgast fleiri dagblöð á netinu fljótlega. Þetta er alveg ljómandi vel sett upp og greinilega mikil vinna lögð í alla bakvinnu á þessu.

Annars þá er ég líka búin að laga bloggið hennar mömmu og gera það rosalega flott og hvet ég þá sem hafa áhuga á að fylgjast með útgáfu og tónleikum sem tengjast henni að skrá sig sem bloggvini á bergthora.blog.is. Ég mun á næstunni setja í tónhlöðuna þar óútgefin lög með henni og einnig lög sem við höfum verið að setja í stafrænt form af vínilplötum.

Mér tókst að hafa upp á gömul samstarfsfélaga mömmu sem var landsþekktur hér á landi í eina tíð og gaf út eina nokkuð furðulega plötu með mömmu sem bar nafnið "Það vorar". Mamma var búin að leita að honum í fjölda ára án árangurs en með tilkomu myspace tókst mér að grafa hann upp. Sumir hverjir sem lesa þetta muna ef til vill eftir honum, en þetta er enginn annar en Graham Smith sem var mér góður vinur. Ég eignaðist mínar fyrstu búddhistabækur frá honum en þær fékk ég ásamt alls konar öðru dóti fyrir að þrífa piparsveinaíbúð hans þegar hann flutti úr landi. Hann bjó hjá okkur um stund á Skólavörðustíg og var meira að segja hjá okkur um jólin. Það voru skemmtilegustu jól sem ég man eftir. Mikið spilað á hljóðfæri og mikið hlegið. Ég er svo ánægð að hafa fundið karlinn, hann er enn að spila og gaman væri ef maður hefði tök á að fá hann til landsins í tengslum við tónleikana á næsta ári til heiðurs mömmu.

Af mínum ástkæra Jóni Tryggva er það helst að frétta að þó augað sé enn svart þá er kominn í það fallegur himnablár hálfmáni og aldrei að vita nema að sjónin komi aftur, en það verður tíminn að leiða í ljós. Hann er núna á Kúbu með foreldrum sínum með eina hækju og leppinn góða. Þar er bara sól og blíða og ég er að berjast við að öfunda hann ekki.

Á þessari stundu eru tveir erlendir farandverkamenn að brjóta rúðurnar í eldhúsinu mínu og ég er hér í leyni inn í stofu að reyna að einbeita mér að því að slá inn síðustu textana við lög mömmu áður en ég held á fund vegna útgáfumála.

Athugasemdir

[Hrafnhildur Ýr Vilbertsdóttir, 26.11.2007 kl. 22:14]

Gangi þér vel með skrifin, mér finnst þetta þarft og gott framtak en get ýmindað mér að það taki á, ætla kaupa eintak um leið og það kemur út

[Birgitta Jónsdóttir, 26.11.2007 kl. 22:23]

Takk fyrir það Hrafnhildur, og já þetta tekur á, sit oft með tárin í augunum við tölvuna, en þetta þarf að gera og betra að gera það fyrr heldur en seinna. Ælta mér að ljúka öllum minninga tengdum verkefnum á næsta ári svo ég hætti að hljóma sem ég sé með mömmu á heilanum:) Það er mikil gjöf að fá að stússa í þessu. Ég reyndar veitti sjálfri mér tilkallið vegna ýmissa þátta. Ekkert er eins græðandi eins og að öðlast meðvitund um tilfinningar sínar og hugsanir og ég hef lært svo óendanlega mikið um sjálfa mig með því að skoða mömmu á þennan máta.

[Laufey Ólafsdóttir, 27.11.2007 kl. 02:01]

Frábært framtak Birgitta og verður örugglega svo sérstakt af því það kemur frá þér. Ég er reyndar ekki búin að skoða síðuna en ætla strax að kíkja. Ég er oft að gera svo margt í einu að ég gleymi sumu. Var t.d. byrjuð á að kommenta á þennan pistil hjá þér í morgun en hef greinilega ekki ýtt á "senda". Man ekki hvað ég ætlaði að segja. Væri samt alveg til í að vera á Kúbu núna! Batakveðjur til JT.

Gangi þér vel

[Birgitta Jónsdóttir, 27.11.2007 kl. 09:17]

Takk Laufey mín. Þú ert gull af mani:) Kannast við þetta að vera að gera margt í einu og steingleyma og gleyma og muna en koma þó miklu í verk... Ég þyrfti í alvöru svona klón af mér. Eða að stelast á framandi slóðir eins og Kúbu og gleyma tölvufressinu á Íslandi.

[Ásthildur Cesil Þórðardóttir, 30.11.2007 kl. 12:49]

Gott gengi og gættu þín á farandverkamönnum  en ennþá meira á farandsölumönnum, og allra mest á farandprédikurum, því þeir eru sennilega Vottar Jehóva. 

Mikið er annars gott að Jóni Tryggva líður vel, og vonandi kemur sjónin alveg til baka.

[Erna Friðriksdóttir, 30.11.2007 kl. 16:01]

Gangi þér vel Birgitta og eins manninum þínum að ná fullum bata. Ég man að systir mín átti svona vínilplötu með mömmu þinni , verst að ég man ekki hvað platan hét ,en ég átti eitt uppáhaldslag á henni og ég hlustaði á það aftur og aftur sem unglingur, Baraáttu kveðjur til ykkar

[Kristín Snorradóttir, 30.11.2007 kl. 21:22]

Langaði bara að óska þér velgengni og þakka þér stuðningin og falleg orð á minni síðu.