Tannrótarbólgan sem lagði mig að velli

Ég er búin að vera eins og drusla í heilan mánuð - alltaf eitthvað slöpp og hitasækin. Komst svo loks í gær að ástæðunni: tannrótarbólgusýkingarskrímsli hafði laumast í gegnum klakatönnina mína. 

Ég átti reyndar ekki að fá tíma fyrr en í september en kraftaverksfyrirspurn minni var svarað í gær og ég fékk að hitta eina af uppáhalds frænkum mínum sem mundaði bora og sprautur og hjakkaði á rótarskömminni eins og brjáluð væri svo ég myndi sleppa við að taka fúkkalyf. Ég var orðin svo aum að ég næstum farin að grenja þegar deyfingin komst loks inn fyrir bólgna taugaenda. En ég var vafinn inn í mjúkt bleikt teppi og fékk smá vorkunn frá mínum yndislega tannlækni.

Mætti svo heim með þrefalda deyfingu og íbúfen og stalst til að sofa ekki en liðast um eins og þokuslæða og vera óendanlega þakklát fyrir að hafa ekki sýkingaróværuna að lama úr mér alla löngun til að skrifa.

Ég er ein af þeim sem er alltaf óskaplega ánægð að hafa efni á því að fara til tannlæknis og finnst alveg ótrúlega furðulegt að tennur og munnmál séu ekki hluti af því sem fellur undir skatta þá sem ég borga í kerfið. Það er nánast eina læknaþjónustan sem ég nota eitthvað. Og ég upplifi með sanni að tannvernd er ekki síður hluti af almennri heilsuvernd en aðrir líkamshlutar. 

Borgarstarfsmenn

Það sem er lang alvarlegast í skugga valdníðslunnar er sú staðreynd að starfsumhverfi borgarstarfsmanna hefur verið nánast lamað. Sífellt verið að koma með nýjar áherslur sem hver deild þarf að laga sig að. Þetta er erfitt fyrir skóla, félagsþjónustu og aðrar stoðgreinar borgarinnar. Miðað við hve fast er haldið utan um budduna þegar kemur að málefnum barna, sjúklinga og eldri borgara þá finnst manni ólíðandi að borgin borgi 4 borgarstjórum laun á sama tíma. 

Ég vil fá að kjósa aftur en veit ekki hvort að það væri leggjandi á borgarstarfsmenn að fá yfir sig enn eina stjórnina á svona stuttum tíma.

Veit um fólk sem hefur þurft að sækja í sjóði borgarinnar fyrir rekstur á samfélagstengdum námskeiðum og í hvert skipti sem fundað er með borginni þarf að tala við ný andlit og byrja upp á nýtt að útskýra allan pakkann. Hvað ætli mikið af dýrmætum persónutíma hafi glatast við sundurþykkjuna og valdabröltið við Tjörnina. Það er táknrænt að Tjörnin sé morandi í saurgerlum því slíkt valdabrölt lýsir vel saurugri græðgi sem hefur ekkert með velferð borgarbúa að gera og hýsillinn tengdist flokknum sem ábyrgur er fyrir þessu bruðli með fé borgarbúa eins og það sé hans eigið.

Ef einhverjum er vorkunn þá eru það blessaðir borgarstarfsmennirnir. Þetta fer að verða eins og blaðamannabransanum, maður mætir í vinnuna og veit ekkert hver er í brúnni í lok dagsins. Þetta skapar óvissu og óþægindi og er til háborinnar skammar.

Varðandi umhverfismálin, þá er maður því miður orðinn þannig að maður fagnaði ekki þegar Birtuhálsvirkjun var slegin af borðinu og sagt að hún yrði aldrei að veruleika. Stóru yfirlýsingarnar sem komið hafa úr börkum stjórnmálamanna eru ekki einu sinni þess megnuð að sannfæra auðtrúa manneskju eins og mig.

Ef þetta er lýðræði, þá er það sem mig var farið að gruna fyrir margt löngu: löngu dautt! 

 

 

Hanna Birna borgarstjóri