Vanhæft fólk

Sagt er að ríkisstjórnir séu spegill þjóðarsálar. Hvað finnst ykkur, er þetta vanhæfa fólk spegillinn ykkar? Enginn tekur á sig ábyrgð - við eigum að taka alla ábyrgðina segja þau með því að láta blóðmjólka okkur enn frekar. 

Róm er að brenna kæra þjóð og það er búið að taka bitið úr sverðum okkar - rétt eins og hjá nývíkingum er berjast af mikilli færni sýndarbardaga. Erum við að gera hið sama, er allt málskrúðið okkar bitlaus sverð. Það er ekkert annað hægt að gera en að brýna sverðin og leggja til atlögu án miskunnar. Sverð okkar eru raddir okkar, sverð okkar eru fjöldi okkar, sverð okkar eru samhæfðar aðgerðir okkar. Það er ekki nóg að brotabrot mæti á laugardögum, það er ekki nóg að blogga, það er ekki nóg að mæta á borgarafundi. Við þurfum að gera eitthvað samhæft og stórt á hverjum degi. Við þurfum að horfast í augu við lygalaupana. Mætum fyrir utan þinghúsið í dag og horfumst í augu við þingheim og krefjumst þess að þau láti hæfara fólki það verk í hendur að reisa landið við. 

Í dag fá spilafíklarnir í yfirstjórn landsins milljónir að láni til að spila krónupóker með sem við eigum að borga, hvort heldur að krónan muni sökkva eða fljóta.

Ég bið ykkur kæra fólk sem þykist hafa vald til að stjórna að fara. Þið eruð svo upptekin af því að hvítþvo ykkur að þið eruð ekki stjórntæk.

6 fundir með seðlabankastjórn

Athugasemdir

[Árni Freyr (IP-tala skráð) 19.11.2008 kl. 10:26]

Ég vil í fyrsta skipti fá ALVÖRU rök fyrir því hvað það er sem t.d. ríkisstjórnin er að gera rangt og þá nákvæmlega hvað hún á að gera. Ég veit það ekki fyrir víst en ég þykist vita að þú sért ekki sérfræðingur frekar en hinar háværu raddirnar sem benda puttanum á augabragði í þægilegustu átt. Ég geri mér grein fyrir því að margir hafa það virkilega slæmt og hafa fulla ástæðu til að vera sárir eða áhyggjufullir en það gefur þeim ekki rétt til að dreyfa neikvæðni sinni á alla í kringum sig. Allt í einu er annar hver maður á Íslandi orðinn sjálfskipaður fjármála- eða hagfræðingur. Ábyrgðina tel ég að mjög margir beri og þ.á.m. ríkisstjórnin, fjármálaeftirlitið, seðlabankinn, "útrásarvíkingarnir", fjölmiðlar og allir þeir sem tóku með virkum hætti, þátt í góðærinu. Hversu margir eru þá undanskildir? Mér finnst því mjög ósanngjarnt að demba allri þessari ábyrgð á örfáa aðila, sérstaklega ef gagnrýnandinn var sjálfur t.d. búinn að spenna bogann langt umfram það sem eðlilegt gæti talist. Ekki kokgleypa alla neikvæðni sem í ykkur er hent, biðjið allavega um rök fyrst!

[Birgitta Jónsdóttir, 19.11.2008 kl. 10:47]

Ég vil taka það fram að ég hef ekki spennt neinn boga of hátt eða lágt - ég er sem betur fer svo fátæk að ég hef engu tapað persónulega. Hef reyndar misst vinnu og á að draga fram lífið á 116 þúsund á mánuði og allt hækkar og hækkar og ég á enga varasjóði enda telst ég til þeirra ómerkilega hóps sem kallaður er einstætt foreldri.

Ég held Árni Freyr að ef þú hefur fylgst með fréttaflutningi og notar almenna skynsemi að þá ætti þér að verða auðvelt að finna rök fyrir því að ríkisstjórnin, seðlabankastjórnin, fjármálaeftirlitið sem og auðmenn landsins spenntu bogann svo hátt að við almenningur landsins skuldum sem nemur tólfföldum fjárlögum þjóðarbúsins. Engin önnur þjóð hefur náð að spenna bogann jafn hátt. Enn eitt heimsmetið okkar. Þar eð þetta fólk fékk nú greitt miklu mun meira en hinn almenni borgari og var að megninu til kosið til ábyrgðar þá væntanlega ber þetta fólk ábyrgð á þessu mega klúðri. 

Þetta fólk var varað við, það segist hafa varað hvort annað við en enginn gerði neitt til að hindra gríðarlega áhættu og skuldasöfnun. Ef þetta er ekki næg rök Árni Freyr þá er þér ekki viðbjargandi. 

Eitt í viðbót: náin tengsl eru á milli fjármálaheimsins hérlendis sem og þeirra er stjórna í ríkisstjórn. Í öðrum ríkjum væri það fólk búið að stíga til hliðar en enginn hefur axlað ábyrgð og því er almenningur reiður. 

[Árni (IP-tala skráð) 19.11.2008 kl. 12:49]

Mér er greinilega ekki viðbjargadi því "horfðu á fréttir" finnst mér ekki nægilegur rökstuðningur, þú verður að fyrirgefa. Þjóðin er já mjög skuldug en ríkissjóður  var nánast skuldlaus fyrir áfallið. Geir Haarde tók ekki íbúða- og bílalán á nafni almennings og því tel ég það einfeldni að kenna einungis yfirvöldum um skuldir þjóðarinnar. Ég er engan veginn að afsala þeim ábyrgðinni eins og ég tók fram í fyrri athugasemd minni en það spilar mun meira inní en "vanhæfni" því hvað myndi það segja um Íslendinga sem þjóð? Þó svo að almenningur hafi talið þessa einstaklinga þá hæfustu til þess að stýra er ekki þar með sagt að við höfum kosið þá til að bera alla ábyrgð á því sem fer úrskeiðis.
Að lokum skil ég ekki alveg af hverju þú lítur á einstæð foreldri sem ómerkilegan hóp því ekki get ég verið sammála því.
Það eru allir jafn mikilvægir í þjóðfélaginu og því mikilvægt að allir sameinist því að finna bestu lausnina í stað þess að tjá einungis óánægju sína. Fólk er almennt sárt og hrætt um framtíðina og því er það fljótt að gleypa skýringar frá öðrum í sömu stöðu, hvort sem mikið vit er í þeim skýringum eður ei. ...bara mín skoðun.

[Hinrik Þór Svavarsson, 19.11.2008 kl. 14:50]

eigum við að prófa að lesa þetta Árni ..

http://www.vald.org/

vandamálið er það að margir eru á þeirri skoðun að það kerfi sem var(er) við lýði þ.e. skuldakerfið sé ekki gott fyrir hinn almenna borgara og að það sé möguleiki að hanna kerfi sem byggir á raunverulegum auðlindum en ekki pappírsskuldum..

Það eru vissulega margar hugmyndir í gangi og jafnvel hægt að rökstyðja að þær séu of margar .. Evrópusamband, evra einhliða,dollar einhliða, norska krónan einhliða, tenging við hina og þessa mynt og margt fleira misróttækt, .. leiðin sem hins vegar virðist hafa verið ákveðin er að ýta skuldaskaflinum ofan á höfuðstólinn hjá mér og í raun setja mig í skuldafangelsi næstu árin þú kannast kannski við þetta ef þú ert með bílalán... spurningin er bara ertu tilbúinn að færa þær fórnir fyrir áframhaldandi okurvaxtakerfi eða eigum við að hugsa dæmið upp á nýtt. Til þess þarf nú gáfaðra fólk en mig.. ég er nú frekar fylgjandi því að pressað sé á fólk að taka ábyrgð til að við getum haldið áfram heldur en að gagnrýna gagnrýnendurna með spurningum um ekki neitt.

Eins og er sagt við Alkann þú lagar þig ekki með afréttara heldur með að taka ábyrgð!!!

[Jenný Anna Baldursdóttir, 19.11.2008 kl. 15:40]

Ég er sammála þér Birgitta og þessi staðreynd að við höfum spillt stjórnkerfi og þaulsetna pólitíkusa með vinatengingar í allar áttir.

En..

Við munum breyta þessu.

Með hægðinni hefst það.

Úthaldið er gott og alltaf stækkar mótmælahópurinn.