Jarðskjálftinn í Kína var líka í Tíbet

Vinir Tíbets hittast sem endranær á laugardögum klukkan 13:00 fyrir utan kínverska sendiráðið. Með því viljum við sýna Tíbetum stuðning í verki og sýna CCP að við erum meðvituð um mannréttindabrot þeirra gagnvart tíbetsku þjóðinni. Allir eru velkomnir sem vilja sýna tíbetsku þjóðinni vinarhug og stuðning.

Hljótt hefur verið um þá staðreynd að jarðskjálftinn mikli sem reið yfir Kína og grandaði svo mörgum, reið einnig yfir Tíbet. Vegna þess að engir fjölmiðlar hafa aðgang að landinu, er ómögulegt að vita um afdrif þeirra sem búa á skjálftasvæðinu. Við finnum til hluttekningar með kínverskum almenning og höfum lesið fréttir þess efnis að foreldrar barna sem létust í húsarústum skóla sinna, séu barðir, handteknir og hótað af kínverskri lögreglu þegar þau mótmæla því hvernig að verki hefur verið staðið.
Þessi grimmd gagnvart sínum eigin þegnum vekur hjá okkur ótta um að ástandið á skjálftasvæðunum í Tíbet geti verið afar slæmt og krefjumst við þess að mannúðarsamtökum, læknum án landamæra og fjölmiðlum verði hleypt inn í Tíbet.

Við gagnrýnum íslensku ríkisstjórnina fyrir algert aðgerðaleysi og svo virðist sem atkvæði kínversku ríkisstjórnarinnar með Íslandi í öryggisráð S.Þ. sé mikilvægara en að standa vörð um mannréttindi í heiminum. Við héldum að öryggisráðið væri einmitt til að tryggja öryggi allra þegna heimsins, en slíkt virðist gleymast í vinsældarkosningunni. Málið virðist hafa snúist í andhverfu sína.

Undanfarið hafa kínversk yfirvöld handtekið fjölda munka og nunna, í þessari viku voru 18 munkar handteknir og gefið það að sök að hafa staðið fyrir sprengingum. Virðist sem kínversk yfirvöld ætli að beita sama blekkingarleiknum og vesturveldin til að ala á ótta almennings og beita aðferðum til að ala á tortryggni í garð Tíbeta án þess að færa fyrir því nein sönnunargögn.

Nánari upplýsingar um ástandið í Tíbet er að finna á vefnum, http://www.phayul.com/