Mómælaskýrsla og bréfið góða

Ekki komu margir í dag, en það er ekki höfuðmálið... við vorum samkvæmt talningu Kristians vinar míns nákvæmlega 35. En við náðum að vekja smá athygli á þessu og síðast en ekki síst rakst ég á nokkra mæta menn og konur fyrir utan þinghúsið sem ég veit að munu svara bréfinu góða. Steingrímur J. fræddi mig á að loks verður fjallað um ástandið í Tíbet í Utanríkisnefnd á miðvikudaginn en VG kallaði eftir fundi þar stuttu eftir að páskafríið langa hófst, vonandi verða einhverjar af okkar tillögum að umræðuefni. Ég hvatti líka ungliðahreyfingar stjórnmálaflokkana til aðgerða með á þverpólitískan hátt, vona að því verði. 

Ég vil enn og aftur hvetja fólk til að tjá sig um Tíbet í fjölmiðlum, maður þarf ekkert að vera einhver ofurpenni eða vita allt um Tíbet til að tjá sig um hvað manni finnst. En auðvitað er það tilvalið tækifæri og ætti að vera hvatning til að viða að sér meiri upplýsingum. Það var með sanni góðmennt á fundinum og enn og aftur var þarna fólk sem kannski aldrei hefur farið í mótmælastöður... en fannst það þurfa að gera eitthvað. Að mótmæla ætti ekki að vera eitthvað neikvætt... maður er að koma með mótvægisaðgerðir:)

Við afhentum eftirfarandi bréf þingverði og lofaði hann að koma því til Utanríkisráðherra ásamt Forsætisráðherra, ég ætla að jafnframt að senda það á gervallan þingheim og býð spennt eftir viðbrögðum...

Reykjavík 31. mars 2008

 

Ákall til íslensku ríkisstjórnarinnar  

Við sem höfum staðið fyrir því að vekja athygli á hve skelfilegt ástandið er í Tíbet, viljum gjarnan vekja athygli ykkar á því sem er að gerast þar. Tíbetar hafa með friðsamlegum hætti barist fyrir tilverurétti sínum síðan 1959, með afar takmörkuðum árangri. Ef eitthvað, þá hefur ástandið aldrei verið eins slæmt og það er nú. Tíbetar eru orðin minnihlutaþjóð í sínu eigin landi. Um milljón Tibeta hafa verið drepnir síðan Kína hertók Tíbet 1950. Fólki er refsað, pyntað, fangelsað eða hreinlega drepið fyrir að stunda trú sína, fyrir að tala tungumálið sitt, fyrir að virða sinn menningararf. Kínversk yfirvöld hafa virt að vettugi allar tilraunir Dalai Lama til að eiga í opinberum samræðum við þá til að finna lausn á þessum vandamálum, en hann hefur hvatt til sjálfræðis Tíbets, þ.e.a.s. að þeir hafi sína eigin ráðherra. Mjög mikilvægt er að þessi samtöl hefjist nú þegar en það mun væntanlega róa undiröldu hinnar miklu reiði Tíbeta sem hafa horft upp á þjóðmenningu sína visna upp í 50 ár á meðan heimurinn hefur horft í hina áttina. Nú er tíminn til að þrýsta á kínversk yfirvöld. Þið vitið hvað er að gersast í Tíbet. Því berið þið ábyrgð á að bregðast við þessu ákalli. Við trúum því að þið hljótið að setja mannréttindi á oddinn fremur en viðskiptahagsmuni. 

Í dag er alþjóðaaðgerðadagur til stuðnings baráttu Tíbeta fyrir mannréttindum í sínu heimalandi. Alþjóðaaðgerðadagurinn er haldinn til að vekja athygli á að nærri 1,5 miljón manna hafa skráð nöfn sín á lista Avaaz Tibet petition, sem kallar á hófsemi í aðgerðum, að mannréttindi séu virt og að kínversk yfirvöld hefji samræður við Dalai Lama.

Aðgerðir verða haldnar um heim allan og kínverskum yfirvöldum afhentur þessi listi á táknrænan máta. Okkar aðgerð í dag er að senda ykkur þessar spurningar og tillögur. 

Við óskum eftir greinagóðum svörum við eftirfarandi spurningum:
1. Er rétt að fórna mannréttindum fyrir viðskiptahagsmuni. Styðjið þið það?
2. Hvernig ætlar þú að beita þér fyrir því að aðstoða Tíbeta í baráttu þeirra fyrir  að mannréttindi þeirra verði virt? 

Hér eru nokkrar tillögur að því hvað íslensk stjórnvöld geta gert til að stuðla að lausn á vandamálum þeim er kosta svo marga Tíbeta lífið ár hvert.
1. Það hefur ríkt mikil þögn hérlendis meðal ráðamanna og enginn flokkur tekið skýra afstöðu með málstað Tíbeta. Við köllum eftir þverpólitískum stuðningi gagnvart baráttu þeirra og að íslenskir ráðamenn hvetji kínversk yfirvöld til að hefja samræður við Dalai Lama nú þegar.
2. Hægt er að þrýsta á kínversk stjórnvöld til að þau aflétti herlögum af Tíbet nú þegar og opni landið fyrir sjálfstæðum alþjóða- fjölmiðlum og mannréttindasamtökum. 
3. Íslenska ríkisstjórnin getur þrýst á S.Þ. um að senda rannsóknarnefnd til Tíbet nú þegar til að komast að hver hlutskipti mótmælenda eru: talið er að um 100 Tíbetar séu horfnir (drepnir), 1200 í fangelsum og 79 hafa verið drepnir vegna undanfarinna mótmæla. 
4. Þrýsta á kínversk yfirvöld að láta lausa pólitíska fanga eða þá sem eru fangelsaðir vegna trúar sinnar eða hafa beitt sér fyrir auknum mannréttindum í Kína og Tíbet. 

Fjölmargar þjóðir hafa á alþjóðavettvangi stutt við að mannréttindi Tíbeta séu virt. Við hvetjum íslenska ráðamenn að gera slíkt hið sama. Hér eru nokkur dæmi um hvað við getum gert til að styðja Tíbeta í þeirra baráttu fyrir mannréttindum.

Við getum farið að dæmi þjóðverja og stöðvað allar umræður við Kínverja um efnahagsþróun og viðskipti.  

Við getum farið að dæmi Karls Bretaprins, Václav Klaus Tékklandsforseta og Merkel Þýskalandskanslara og sniðgengið opnunarhátíð Ólympíuleikana eða farið að dæmi Forsætisráðherra Póllands Donalds Tusk og bókað viðtal við Dalai Lama í stað þess að fara á opnunarhátíðina. 

 

Þetta bréf verður sent á alla alþingismenn allra flokka, þar sem þeir eru hvattir til að svara þessum spurningum samviskusamlega og svör þeirra verða svo birt á netinu, birgitta.blog.is.

Með vinsemd 

Vinir Tíbets

 

 

Alþjóðlegur aðgerðadagur

Athugasemdir

[Jón Valur Jensson, 31.3.2008 kl. 21:19]

Birgitta, þú ert frábær. Leitt samt, að mun færri mættu nú en á laugardaginn, en það er þó dýrmætt, að einhverjir nýir bættust við í hópinn. Sjálfur var ég upptekinn við verkefni og gat alls ekki mætt, en reyndi þó að hvetja landann til þess með innleggi mínu í Útvarpi Sögu rétt fyrir hádegið.

Er fjöldanum bara sama? En verðskuldum við að vera sjálfstæð þjóð, ef við kunnum ekki betur að meta það sjálfstæði en svo, að við skellum skollaeyrum við neyðarópum hinnar undirokuðu tíbezku þjóðar? ... að við "horfum bara í hina áttina"? eins og þú segir.

Guð launi þér baráttuna og kærleikann sem þú leggur í hana, Birgitta.

Biðjum Tíbet frelsis.

En það verður fróðlegt að sjá, hver verða viðbrögð þessara þingmanna okkar.

PS. Þú mátt hafa stærra letur á sumum greina þinna eins og þessari. Kær kveðja. 

[Ásthildur Cesil Þórðardóttir, 31.3.2008 kl. 22:22]

Flott hjá þér, ég fylgist með þessu og dáist að baráttu samtaka vina Tíbets.

[Kristbjörg Þórisdóttir, 31.3.2008 kl. 22:36]

Sæl Birgitta,

ég var með ykkur í anda í dag. Ég kveikti á kerti fyrir Tíbet og er að lesa ferðasöguna mína þaðan til að rifja upp til að nota í efni í grein.

Frábært hjá ykkur og áfram höldum við svo vinir Tíbet og látum ekki deigan síga. P.s. ég birti bréfið á bloggsíðu minni og vona það sé í lagi.

Bestu kveðjur úr Danaveldi.

[Harpa Rut (IP-tala skráð) 31.3.2008 kl. 23:32]

Takk Birgitta fyrir að halda þessu málefni gangandi þú átt miklar þakkir skilið þó ég viti að þetta komi beint frá hjartanu. Já það hefði verið gaman að sjá fleiri í dag en þetta var samt mjög áhrifaríkt og minnir fólk á hvað er að gerast. Allavega er þetta mér svo innilega hugleikið og enn ferskt í minni þegar við vorum að ferðast þarna hve margt ljótt var í gangi í þessu annars stórkostlega landi hjá þessu yndislega fólki.

[Aðalheiður Þórisdóttir (IP-tala skráð) 1.4.2008 kl. 00:03]

Sæl Birgitta,

Dagurinn í dag var mér mjög sérstakur og mun án efa verða mér eftirminnilegur!  Ég er ríkari nú en ég var í morgun.  Ég kynntist þér, þú ert ákveðin, jákvæð og einlæg kona með ríka réttlætiskennd.  Ég fór í mína fyrstu mótmælagöngu og sé svo sannarlega ekki eftir því.  Ég fylgdi hjartanu, ég gerði það eina sem ég gat gert, mæta og sýna stuðning.  Hans hefði ekki orðið vart við eldhúsborðið!  Það er nefnilega ekki nóg að hugsa, það þarf að framkvæma.  Ég er viss um að fleiri munu bætast í hópinn og stíga upp úr eldhússtólunum eða frá tölvunum og mæta framvegis eins lengi og þörf verður á og sýna stuðning sinn við Tíbet!  Ég hef trú á að innan skamms verða umferðartafir þegar við göngum yfir gangbrautir bæjarins sökum fjölda Íslendinga sem opnað hafa augu sín gagnvart mannréttindabrotum sem Kínverjar beita Tíbeta.  Íslendingar munu fjölmenna og sýna einlægan stuðning við Tíbet!

Þar til næst, bestu kveðjur Alla

[Birgitta Jónsdóttir, 1.4.2008 kl. 06:43]

Takk Harpa og Aðalheiður fyrir að koma í dag. Dásamlegt að hafa ykkur með:) Ég finn alltaf fyrir ákveðnu æðruleysi eftir svona aðgerð. Það er nefnilega ekki sjálfgefið að hafa tjáningarfrelsi og svona greiðan aðgang að landsins ráðamönnum sem og fjölmiðlum. Það er mikil gjöf sem við eigum að rækta og nýta okkur. Mótmæli hafa verið máluð dökkum litum eins og það sé eitthvað skammarlegt við að nota sér sín lýðræðislegu verkfæri og fylgja hjarta sínu.

Ég veit að það munu fleiri taka þátt, þegar okkur vex fiskur um hrygg. Við ætlum að öllum líkindum að hittast á sunnudaginn til að stofna Vini Tíbets formlega, læt vita hér á blogginu þegar búið er að ákveða stað og stund...

Ég vil að það komi skýrt fram að ég hef ekkert á móti kínversku þjóðinni, tel eins og vinir mínir frá Tíbet að þjóðin sé fórnarlamb kerfis sem er ógnarlangur dreki sem spúir eldi og eyðingu á allt sem passar ekki inn í eitthvað sem með sanni mætti kalla afturhaldskommúnisma með fasísku ívafi. Þess vegna reyni ég að vanda mig að segja kínversk yfirvöld eða stjórnvöld fremur en kínverjar þegar ég gagnrýni það sem er í gangi...

Ég hef heldur ekkert á móti fólki í flokkum, hvort sem það er samfó eða xd, það sem fer fyrir brjóstið á mér er foringjadýrkun þar sem fólk gleypir við því sem þeirra forusta gerir án nokkurrar gagnrýni. Leiðandi fólk úr öllum flokkum er bara fólk og gerir mistök sem þarf að láta þau vita af ef manni finnst svo vera.... en ekki réttlæta mistökin... það er svolítið meðvirkt:)

Takk innilega allir sem komuð í gær... það er ótrúlega mikið sem við getum áorkað og stóri bónusinn er að við uppskerum sem við sáum:)

[Aðalheiður Þórisdóttir (IP-tala skráð) 1.4.2008 kl. 08:25]

Mjög góður punktur hjá þér Birgitta, það er ekki kínverska þjóðin sem ég er ósátt við.  Að sjálfsögðu eru það stjórnvöld þeirra.  Þó svo að ég hafi hugsað um kínversk stjórnvöld þá skrifaði ég það ekki og biðst hér með innilegrar afsökunar.  Þakka þér fyrir.