Yfirlýsing út af lögregluofbeldi

frá vini mínum Einari Rafni sem sést hér á þessari fréttamynd og harkalegar aðfarir lögreglunnar.

Ég hef sagt það oft og segi enn, er ekki kominn tími til að störf lögreglunnar séu rannsökuð af öðrum en þeim sjálfum... þetta bara gengur ekki lengur. Og ef einhver sér sig knúinn til að tala um hann sem iðjuleysingja eða atvinnumótmælenda vil ég benda á að hann hefur ásamt öðrum vinum mínum rekið kaffi Hljómalind og skapað atvinnutækifæri fyrir fullt af eyjaskeggjum. Ég fékk þessa frétt lánaða af eggin.is með þeirra leyfi.

Á leið minni heim í dag sá ég hóp af fólki í göngu. Ég vissi að til stóð að halda einhverskonar mótmælagöngu í dag, auglýsta sem rave party og ákvað að ganga í hópinn. Þá kom í ljós að lögreglan hafði stoppað gönguna á Snorrabraut. Göngumenn létu það greinilega ekki á sig fá en þarna voru trúðar með trúðalæti og mikið af fólki að fylgjast með, borðar með slagorðum gegn alþjóðlegum stórfyrirtækjum voru á lofti og fólk að dansa og skemmta sér. Lögreglan fylgdist prúð með og virtist vera í góðu skapi, hún hleypti bílum í gegn og að lokum var Snorrabraut lokað við Flókagötu. En einhverra hluta vegna leyfði hún göngunni ekki að halda áfram, og ljúka sér af, heldur stöðvaði hana á miðri Snorrabraut í rúma 2 klukkutíma.

Loksins virtist lögreglan fá skipun frá yfirmönnum sínum að ráðast til atlögu en hún réðst að bílnum sem tónlistin kom frá, braut rúðuna, opnaði og dróg þann sem þar var út, hann sýndi enga mótspyrnu. Fólkið á staðnum flykktist að og í kring en án alls ofbeldis og var flestum ýtt frá. Tveimur einstaklingum var sýnd sérstök aðgæsla (sá ekki afhverju) en það voru um 8 lögreglumenn sem snéru þá niður á gangstéttinni.

Ég stóð á gangastéttinni í um 2 metra frá staðnum þar sem verið var að halda þessum göngumönnum niðri með því að sitja ofaná þeim og snúa upp á hendur og fætur, þau sýndu ekki mótspyrnu að mér sjáanlegu. Fólkið á staðnum söng ýmis slagorð eins og að lögreglan væri að beita ofbeldi. Ég stóð þarna hrópaði stundum með en beitti annars engri ógnandi hegðun né var á nokkurn hátt dónalegur gagnvart lögreglunni, enda hélt ég að hún ætti að vera sú sem viðheldur friði, ekki sú sem kemur af stað ófriði. Mér skjátlaðist.

Skyndilega kemur lögreglumaður upp að mér og biður mig hastarlega að færa mig, ég bakka aðeins en greinilega ekki nógu mikið því hann ýtir mér aftur á bak, snýr upp hendina og skellir hausnum á mér upp við bílshurð. Því næst hendir hann mér upp að grindverki og öskrar “þú átt að hlýða því sem ég segi”. Þar á eftir snýr hann upp á hendina á mér og skellir andlitinu á mér niður á gangstéttina.

Ég tel mig hafa sýnt yfirvegun og rólyndi allan tímann, en ef eitthvað ætti að túlka sem dónaskap þá gæti það verið þegar að ég spurði: „hversvegna?” þegar mér var ýtt og sagt að hlýða. Því næst labbar hann aftur að handtökunni og skilur mig eftir í götunni.

Ég fæ ekki séð að ég hafi nokkuð ólöglegt aðhafst. Enginn réttlætanlegur ásetningur var hjá manninum og hvað er þá hægt að kalla þetta nema lögregluofbeldi!

Viljum við landsmenn að lögreglan komist upp með slíkan verknað. Hvað ef að verið væri að mótmæla háu bensínverði, of mikilli þennslu, barnaklámi, kvennamisrétti eða spillingu? Hvað má lögreglan ganga langt í að bæla niður aðgerðir hópa sem eru að berjast fyrir hugsjónum sínum?

Fjórir handteknir í mótmælum Saving Iceland

Athugasemdir

[Grímur Kjartansson, 15.7.2007 kl. 14:33]

Saving Iceland  er mjög sundurleitur hópur og einsog svo oft þá eru alltaf einhverjir sem finnst ekkert fútt nema takist að ögra einhverja til átaka og þeim einstaklingum  fannst ekki nóg  „stuð“  við Perluna.
Áróður  þessara samtaka um að þau séu einhverjir englar sem hafi orðið fyrir lögregluofbeldi og séu fórnarlamb eru bara ekki að virka þegar hægt er að fylgjast með því á mynd hvernig atburðirnir þróuðust. 
Það hefði ekkert mál verið að sækja um og fá leyfi fyrir mótmælagöngu en það hefði þó sennilega verið fámennasta mómælaganga í sögu lýðveldisins af myndunum að dæma.

[Nosy (IP-tala skráð) 15.7.2007 kl. 15:48]

Mikið ógeðslega er ég orðinn leiður á þessu væli í ýmsum mótmælendum. Þeir fara í mótmælagöngu án þess að fá nauðsynleg leyfi og stöðva bílaumferð (sem er einnig ólöglegt). Mótmælendurnir neituðu að hlýða fyrirmælum lögreglu þannig að hún varð að beita einhverju valdi við að framfylgja lögum þessa lands, en þá fara þessi vælukjóar að æpa lögregluofbeldi. Hvernig væri bara að mótmælendur læri að fara að lögum, hætti að þrjóskast við fyrirmælum lögreglu og allir geta verið ánægðir. 

Eitthvað af þessu liði er frá USA og ég hefði gaman af því að sjá ameríska lögregluþjóna taka á mótmælendum sem brjóta lög þar. Ætli íslenska lögreglan þætti ekki ansi mjúkhent í samanburðinum.

[kaptein ÍSLAND, 15.7.2007 kl. 16:44]

jamm löggann er breytt eftir að þessi nýji lögreglustjóri er kominn til valda þar ,allgrjór klikk haus 

[Birgitta Jónsdóttir, 15.7.2007 kl. 17:17]

í USA skjóta þeir bara mótmælendur... við ættum kannski að fara að dæmi þeirra herra nafnlaus.., lágmark að setja nafn sitt undir skítkast... ég mun fjarlægja öll nafnlaus komment... þannig að ef einhver ætlar að vera með svona ómálefnaleg komment þá get þeir sparað sér tímann við það því það verður tekið út... Arngrímur, auðvitað er ég ekki hlutlaus... enda aldrei haldið neinu slíku fram. Ég vann mikla vinnu með lögfræðingi hér í borg erindi um að fara fram á opinbera rannsókn á háttsemi og yfirgangi lögrelgunnar sumarið 2005 þar sem ég varð vitni af miklu tilefnislausu ofbeldi og öðrum brotum á almennum lögum sem eiga að standa vörð um málfrelsi og persónufrelsi.... en staðan er svona: þessu var vísað frá og því hefur ofbeldi lögreglu gagnvart mótmælendum farið sífellt versnandi. Mér finnst absúrd að segja hluti eins og allir tali um að hafa verið beittir harðræði að ósekju. Það er því miður þannig og ég hef oft orðið vitni að því að lögregla og öryggisverðir eru ekki starfi sínu vaxnir. Þeir missa sig og fara langt yfir þau mörk sem eðlileg gætu talist. Auðvitað er fullt af frábæru fólki að vinna í þessum starfsstéttum en sumir eru bara fautar, fantar og bullies... Ég hef aldrei sagt að allir mótmælendur séu einhverjir englar... þarna er fjölbreytt flóra fólks og sumir haga sér misjafnlega skemmtilega en flest er þetta algjör gæðablóð sem mér er heiður að þekkja.

[Birgitta Jónsdóttir, 15.7.2007 kl. 17:27]

Ólafur ég er þér hjartanlega sammála... lögregluofbeldi er engin nýlunda hérlendis og maður hefur heyrt miður fagrar sögur frá ýmsum hliðum samfélagsins... skora á yfirvöld að gera eitthvað í þessu áður en eitthvað hræðilegt mun gerast.

[Birgitta Jónsdóttir, 15.7.2007 kl. 18:16]

ég ætla að fjarlægja þetta komment frá þér Örvar Þór Kristjánsson, það er bara þér ekki til sóma að tala svona um fólk og ég ætla að spara þér þá niðurlægingu að hafa þetta til sýnis... ég held svei mér þá að ég ætli bara að leyfa þér að verða fyrstum til að verða blokkeraður út úr kommentakerfi mínu, því ég nenni ekki að munnhöggvast við fólk sem er svona ómálefnalegt og fullt af fordómum.

[Hans Haraldsson (IP-tala skráð) 15.7.2007 kl. 18:37]

Þið þurfið að fá leyfi áður en þið haldið göngu niður umferðargötu. Þið deilið þessari umferðargötu með öðrum.

Eins ber að fara að fyrirmælum lögreglu. Þú getur kært fyrirmælin en þér ber samt að fylgja þeim þegar þau eru gefin. Þegar lögreglumenn eru að fást við mannfjölda þá eru þeir miklu færri. Þeir geta ekki rökrætt við hvern einasta mann.

Eins veit ég að það er oft reynt að fjarlægja órósaeggi úr fjöldanum eins hratt og mögulegt er svo þeir smiti ekki út frá sér.

Ég veit ekkert um það hvort að lögreglan beitti óþarfa hörku við þessa menn (en lögreglumaðurinn sem átti við þig var bara að vinna vinnuna sína rétt) og er algjörlega fylgjandi sjálfstæðu eftirliti með störfum lögreglunar.

Mér sýnist þessi athugasemd Örvars Þórs vera málefnaleg þótt að hann velji frekar ósmekkleg dæmi. Íslenska þjóðin veit af stóriðjustefnunni og "neyslusamfélaginu". Stór hluti af henni styður stóriðjustefnuna og mikill meirihluti "neyslusamfélagið". Að miklu leiti hefur hugsjónum ykkar verið hafnað lýðræðislega. Þið hafið að sjálfsögðu rétt til að halda áfram að vekja athygli á þeim en þið hafið ekkert tilefni til að brjóta lögin. Þið eruð ekki námsmennirnir á Torgi hins Himneska Friðar.

[Birgitta Jónsdóttir, 15.7.2007 kl. 19:53]

Þú hefur greinilega ekki lesið færsluna Hans því að þar kemur hvergi fram að ég hafi tekið þátt í að skipuleggja þetta eða Einar Rafn sem tók þátt í göngunni löngu eftir að hún hófst. Samkvæmt samtali mínu við Einar Rafn þá var ofbeldið sem hann sætti algerlega tilefnislaust og lögregluþjónninn sem missti sig þarna neitaði að gefa upp númer sitt. Það er með öllu ólöglegt. Meira að segja lögreglan í USA hylur aldrei merki sín en það virðist verða æ algengara hér. Burt séð frá því hvort að gangan hafi verið ólögleg eður ei þá finnst mér ofbeldið sem lögreglan beitti með öllu tilgagnslaust og get ekki skilið af hverju þeir urðu svona aggressívir. Þá er það ekki rétt hjá þér að búið sé að upplýsa þjóðina nægilega mikið um stóriðju. Það er bara svo fjarri lagi. Þú getur bara lesið það sem Örvar skrifar á hans bloggi, því ég er þér ekki sammála. Ég er orðin langþreytt á því að fólk þurfi alltaf að vera nota orð eins og skítugir hippar og aumingjar og fífl og henda þessu liði úr landi. Ef fólk þarf endalega að afhjúpa umburðarleysi sitt og fordóma þá getur það gert það annarsstaðar en hjá mér.

[Hans Haraldsson (IP-tala skráð) 15.7.2007 kl. 21:11]

Ég biðst afsökunar, einhvernvegin fór ég að því að missa af byrjuninni á færslunni.

Restin stendur samt nokkurn vegin eins og hún er, breyti bara annarri persónu i þriðju.

Það þarf leyfi til að halda fjöldagöngur á umferðagötum.

Fyrirmælum lögreglu ber að hlýða. Lögreglan setur ekki lögin heldur framfylgir þeim, það er ekki þeirra hlutverk að rökræða réttmæti lagana við fólk.

Hafi lögreglumaðurinn hulið númer sitt er það ólöglegt. Lögreglumaðurinn á fréttamyndinni er a.m.k ekki með hulið númer (þú getur vistað hana inn á tölvuna og stækkað hana, upplausnin er ekki nægilega mikil til þess að lesa númerið en það er greinilega svört og gul áletrun þar sem númerið á að vera).

Ég býst svo sem ekki við því að þér finnist þjóðin nægilega "upplýst" um stóriðju á meðan að þið fáið ekki meirihlutafylgi. Ég vil hinsvegar meina að ég sé ágætlega að mér um áhrif og afleiðingar stóriðju og er þó mjög fylgjandi henni. Ég minni þig á það að við búum í lýðræðisríki og við hin erum líka með atkvæðisrétt.

Mér þykir það ekki mjög aggresívt af hálfu lögreglu að bjóða aðra gönguleið og tjónka svo við göngumenn í tvo klukkutíma áður en gangan var leyst upp.

[Birgitta Jónsdóttir, 15.7.2007 kl. 21:32]

Ég er ekki sammála þér Hans en að sjálfsögðu máttu hafa þínar skoðanir á þessu máli. Langar samt að árétta að myndin sem fylgir fréttinni á moggabloggi er ekki af sama lögregluþjóni og þeim sem seinna í göngunni veittist að Einari. Augljóst að þessi er með númer. Hinn hreinlega neitaði að sýna númerið sitt þrátt fyrir að vera ítrekað beðinn um það. Þá var það algengt á austurlandi í fyrra að þeir hyldu merki sín... þá hef ég öruggar heimildir fyrir því að þeir veittust að fleira fólki þarna á Snorrabraut sem hafði yfirhöfuð ekkert með gönguna að gera ... eitthvað fór úrskeiðis og eftir að hafa upplifað það aftur og aftur að lögreglan ljúgi í fjölmiðla og getað sannað það þá tek ég hæfilegt mark á þessum annars ágæta manni sem var í viðtali á rúv

Nenni ekki að fara út í pólitík og kosningar... er enn að jafna mig eftir kosningarnar... er samt alltaf að rekast á fólk sem virðist vita afar takmarkað um stjóriðjustefnu stjórnvalda og þau áhrif sem þau hafa á landið, umhverfið og fólkið ....

Langar að ganni að leggja fyrir þig tvær vissir þú spurningar og sjá hve vel upplýstur þú ert:)

Fyrir hvað er ál langmest framleitt fyrir: flokkarnir eru þrír?

Hver af eftirfarandi orku gefur frá sér mest gróðurhúsaáhrif samkvæmt nýjustu rannsóknum: Kol, olía eða lón?

[Hans Haraldsson (IP-tala skráð) 15.7.2007 kl. 23:46]

Þetta með flokkana er svolítið erfitt því að ég veit ekki hvernig þú skiptir í þá. Umbúðir eru væntanlega mjög ofarlega á blaði og svo ýmiskonar vélbúnaður (t.d flugvélar). Vopn eru örugglega þarna einhverstaðar (ekki endilega í topp þremur) en það fer ekkert í taugarnar á mér.

Það verður til mikill koltvísýringur þegar lón myndast. Sé hinsvegar litið til losunar per orkueiningu (t.d kílóvattstundir) þá eru olía og kol miklu stærri mengunarvaldar. Ef að þessar "nýjustu rannsóknir" þínar segja eitthvað annað þá þarfnast það rökstuðnings. Setjir þú fram slíka fullyrðingu þykir mér hún ekki trúverðug nema vísað sé til heimilda og þá á ég ekki við fullyrðingu á vefsíðu náttúruverndarsinna heldur rannsóknarskýrslu í heild sinni eða, í það minnsta, fréttar í óháðum fjölmiðli.