Skrílinn úr Seðlabankanum

Það sést vel á myndbandsupptöku mbl.is að þessi maður var ekki í vörn heldur réðst hann á fólkið. Þessi maður ætti að taka poka sinn á mánudaginn. Ekki beint að haga sér eins og virðulegur opinber starfsmaður úr Seðlabankanum. Frétti líka að Ólafur sé með tattú á upphandlegg sínum þar sem stendur "White Pride Only". Hver er eiginlega með honum? Veit það einhver?

En svona er nú Ísland í dag skrílin finnast flest í okkar opinberu stofnunum. Af hverju má þessi maður lumbra á telpu og dreng sem honum finnst afturhaldskommatittir án nokkurra eftirmála? Mér finnst að allir sem frömdu líkamlegt ofbeldi þennan dag, mótmælendur, lögga og aðrir opinberir starfsmenn eigi að sæta ábyrgð.

 

Frásögn mannsins sem Ólafur ætlar að lumbra á:

12

Svona ykkur að segja var þetta alveg ótrúleg innkoma þessarar manna. Þeir gengu þarna um og hrintu og bæði konum (eins og sést á myndbandinu) og örðum um koll sem á vegi þeirra urðu. Annar reyndi að sparka í liggjandi mann sem var verið að hlúa að og hafði orðið fyrir piparúða. Þá spurði ég hann hvort það væri allt í lagi með kollinn á honum og þá hrinti hann mér ég snéri mér undan og horði í augun á honum og sagði "Gjörðu svo vel og gefðu mér á kjafinn ef þér líður betur með það" þá reiddi hann til höggsins (og þar hefur myndavélin náð atvikinu og sést það á stillimyndinni á undan fréttinni). Hann hins vegar hætti við að kýla mig og hrinti þess í stað konunni sem næst var. Svona gengu þeir í gegnum ca. 500 manna hóp mótmælenda og hrintu og ýttu þeim sem fyrir urðu - og í raun er ótrúlegt að þessir hrottar hafi farið í gegnum hópinn án þess að nokkur svo mikið sem ýtti til baka (og það segir e.t.v. hversu mikið mótmælendurinir voru tilbúnir að beita ofbeldi þarna fyrir framan Hótel Borg).

Þór Jóhannesson, 2.1.2009 kl. 21:23

 

Taldi sér ógnað

Að vera eða vera ekki með hettu?

Miklar umræður hafa spunnist um það hvort að fólki sé stætt á því að láta sjá sig á almannafæri með hettur. Það þykir samkvæmt fjölmörgum sem tjáð hafa sig um það, fádæma dónaskapur að mæta með hettu eða klút fyrir vitum sér ef maður mætir í mótmæli. 

Hér er myndasyrpa af hettumönnum Íslands og ég spyr af hverju eru þeir með hettur? Er það kannski af sömu forsendum og sumir mótmælendur kjósa að hylja andlit sitt? Það þýðir lítið fyrir mig að hylja andlit mitt en ég mun mæta í næstu mótmæli með trefil og sundgleraugu - bara svona til öryggis - vil helst ekki fá piparúða aftur í mitt smetti. 

Ég hef kynnst henni Evu í gegnum mitt andóf undanfarið árið og finnst þar fara sómakona með hjartað á réttum stað. Ég mun strika út komment ef þau eru níð á þessa góðu konu eða son hennar sem mér finnst alveg frábærlega gaman að spjalla við. Ég skora á fólk að mæta á námskeið í borgaralegri óhlýðni, lesa um borgaralega óhlýðni, hægt að finna margar góðar greinar um það á netinu.

Það hefði nú verið miklu mun flottara hjá þeim sem fóru í skjóli nætur og brutu rúður af slíku offorsi að þeir hinir sömu kæmu nú fram undir nafni og útskýrðu verknað sinn. Kannski gætu þeir sent frá sér yfirlýsingu eða eigum við kannski að fremja borgaralega handtöku á þeim - hélt að það væri í verkahring lögreglunnar en mér skilst á því sem ég hef lesið að þeir hafi engan áhuga á því. 

Ráðist gegn Nornabúðinni

Er okkur viðbjargandi?

Ég veit ekki hvort að fólk hafi tekið eftir því að í fjórða sæti yfir mann ársins höfðu hlustendur Rásar 2 valið Jón Ásgeir Jóhannsson og tíunda sætið vermdi Jóhannes faðir hans.

Það sem er líka merkilegt er sú orðræða sem spinnst með miklum offorsi varðandi mótmæli. Það er greinilegt að bestu mótmælin eru þau að gera ekki neitt. Ef einhver manneskja ætlaði að reyna skapa vettvang fyrir þessa þjóð svo allir yrðu sáttir þá yrði sennilega að hafa 320.000 tegundir af mótmælum því enginn virðist geta komið sér saman um aðferð eða áherslur. 

Þegar mótmælt er fyrir utan seðlabankann, hrópar fólk: af hverju ekki fyrir utan Baug. Þegar mótmælt er í bönkunum, hrópar fólk: af hverju er ekki mótmælt fyrir utan Ráðherrabústaðinn og svona gengur hringavitleysan áfram dag eftir dag á meðan verið er að fremja hryðjuverk á okkur sjálfum af því fólki sem einhverjum datt í hug að kjósa til að stjórna hérna. 

Ég er alveg á því að fólk sem tjáir sig um hvernig hlutirnir ættu betur að fara, já þið sem alltaf gagnrýnið en gerið ekki neitt, þið ættum að framkvæma það sem ykkur finnst betri leið til að mótmæla. 

Ég held annars að okkur sé ekki viðbjargandi. Ég held að það muni ekkert breytast hérna. Ég held að við séum siðferðislega gjaldþrota en getum ekki horfst í augu við það og munum halda áfram að ana áfram í skammtímalausnum og vinapoti uns yfir líkur. 

Við mótmælum aldrei neinu fyrr en það er orðið of seint. Skömmumst frekar út í fólk sem hylur andlit sitt en ég er alveg viss um að engum finnst neitt athugavert við að Víkingasveitin hylji andlit sín.

Mótmælendur hafa þurft að sitja undir hótunum um líkamsmeiðingar og annað ofbeldi. Ég get alveg skilið að fólk hylji andlit sín. Þetta fólk hefur aldrei sagst vera að mótmæla fyrir einn eða neinn nema sig sjálf. Samt hefst alltaf kórsöngurinn: "Þetta fólk er ekki að mótmæla fyrir mig!" 

Sumir koma fram og fara miklum um það af hverju fólk kæri ekki bara lögguna fyrir að ganga of langt. Ég spyr á móti, hve oft hefur lögreglan fengið á sig dóm um vítaverða hegðun í starfi? Þó til séu myndbönd af henni að missa sig þá er það ekki nóg. 

Ég verð svo að gagnrýna aðeins hann Steingrím J., hvað var hann að gera í þætti sem er styrktur af RIO Tinto - mesta umhverfisósóma í áliðnaðinum í heimi. Fyrirtæki sem hefur yfir sér fjöldamargar kærur og hefur verið kært víða um heim fyrir að fara ekki að lögum. Ég hefði nú bara afþakkað að taka þátt í Kryddsíldinni ef ég hefði verið í hans sporum. 

En satt best að segja þá skiptir þetta allt svo sem engu máli - á þessu ári verður allt gleymt - við fáum bara kosningar eftir þeirra forskrift ef það passar þeirra stefnu - aka samfylkingarinnar. 

Ef við fáum ekki kosningar þá fer fólk bara að fjargviðrast yfir einhverri heimatilbúinni gúrku um dauð bjarndýr eða hvort að hugsanlega mögulega það sé ekki bara gott að hafa svona fólk eins og Jón Ásgeir og Björgúlf Thor til að hjálpa okkur aftur á flot. Kannski ættum við að taka þetta alla leið og fá þá bara til að reka landið eins og fyrirtækin sín. Kannski er það einmitt þannig nú þegar....

Bestu kveðjur frá Stóru-Sikiley þar sem ekkert er kallað sínum réttu nöfnum. 

96 rúður brotnar í skólanum

Meira um Kryddsíldarmótmælin

Það er enn nokkuð mikið um helberar lygar og hagræðingar sannleikans varðandi mótmælin í gær. Ég vil setja gott fordæmi sem fjölmiðlamenn sér í lagi þeir hjá 365 mættu taka sér til fyrirmyndar. Eftir að hafa horft á og hlustað á efni sem tekið var upp á staðnum er augljóst að ég hef ekki séð alla atburðarrásina og vil því leiðrétta það sem ég hafði ekki rétt eftir í fyrri færslu sjónarvotts um Kryddsíldarmótmælin. Þá vil ég líka benda á rangfærslur í fréttaflutningi af þessum atburðum og hvet blaðamannastéttina til að temja sér vandarði vinnubrögð. Finnst eitthvað meiriháttar bogið við það að gera ráð fyrir að um helmingur allra frétta sé hreinlega ekki réttur og oft átt við fréttirnar útfrá hagsmunum þeirra er reka stöðvarnar.

Það sem er kannski alvarlegast er hve tímalínan er skökk í fréttaflutningnum. Það kemur aldrei fram að fólk var piparúðað fyrst og eftir það fór það út í að setja flugelda á kaplana. Nánari útlistun um þetta neðar á blogginu mínu. Ef þú finnur hvöt hjá þér að kommenta, viltu þá vera svo snjall/snjöll að lesa yfir alla færsluna. Ef þú nennir því ekki - ekki ætlast til að ég nenni að svara.

1. Ég var ekki sjónarvottur fyrr en einhver opnaði hliðið inn í portið. Þá voru nokkrir, bæði fólk og fréttamenn búnir að fara yfir hliðið. Ég var því ekki vitni að því þegar fólk fór fyrst inn. Það leið hinsvegar ekki mjög langur tími - ca 2 mínútur samkvæmt upptökum á myndbandi þangað til að fólk streymdi inn um hliðið, ég þar á meðal. Kannski hefur tæknimaður Stöðvar 2 verið kýldur þá - en ég sá ekkert slíkt ofbeldi þegar ég stóð þarna inni. Samkvæmt myndbandsupptöku þá var ég búin að vera þarna inni í um 2. mínútur þegar lögreglan var kominn í hurðargættina og var þá fólk hætt að reyna að komast inn nokkru fyrr. Fólk settist fljótlega niður. Ég harma allt ofbeldi og myndi aldrei mæla slíku bót. Ég hef tekið eftir að margir óttast að það verði meira ofbeldi tengt við mótmæli og ég vona að til slíks muni ekki koma.

2. Ég sá á ljósmyndum að fólk togaði í kaplana sem lágu í gegnum anddyrið eftir að mér var hent út - það hinsvegar réttlætir ekki beitingu piparúða. Ég hef enn ekki séð neinar haldgóðar heimildir sem styðja þær fullyrðingar Sigmundar Arnar að tækjabúnaður hafi verið eyðilagður fyrir skrilljónir eins og hann heldur fram. Enda var búið að breyta fréttinni á þann hátt að talað var um að þeir hefðu orðið af auglýsingatekjum upp á einhverjar upphæðir. Ég á bágt með að trúa því að snúrur og kaplar kosti skrilljónir.

Gaman væri að fá betri útlistun á því hjá  Ara sem talar um að þarna hafi fólk verið með hnífa - sem enginn beitti á neinn en það sást að einhver var að reyna að opna glugga með hníf. Þessum hníf var ekki beitt að fólki. Þarna var verið að gefa í skyn í fréttatímanum að fólk væri að mæta á mótmæli til að drepa annað fólk. Þetta finnst mér ljótar og beinlínis stórhættulegar dylgjur. Einmitt svona fréttaflutningur getur laðað að fólk sem er tilbúið í slíkt. Lögreglan talar um að hún sjái eftir að hafa ekki gengið enn harðar fram. Vá, til hvers? Hverju hefði það skilað og hvað meinaði maðurinn? Ef þeir hefði talað við fólk eins og fólk en ekki fyrirfram gefið að þetta væri óþolandi skríll þá hefðu þeir aldrei þurft að ganga fram af slíkri hörku. Það kemur hvergi fram að fólk sem mótmælti er lemstrað eftir hörku lögreglunnar. 

3. Mér fannst fólk gagna full langt með flugeldana. Ég var sjálf skíthrædd við það þegar var verið að kveikja á þessu inni í portinu og þeim sem stafaði mest hætta af þeim vorum við sem vorum að mótmæla. Mjög hættulegt að vera með slíkt í mótmælum og sem betur fer þá er flugeldasölu lokið og vonandi verður ekki meira notað af slíku á mótmælum. 

4. Áhugavert hve fólk er tilbúið að draga furðulega dramatískar ályktanir af öllu. Ég túlkaði graffið á heimili Björgúlfs Thors sem táknrænt um að þeirra tími væri búinn sem strengjabrúðustjórar og sjálfshygglunarmenn, ekki sem morðhótun. 

5. Ég sá mjög góða skilgreiningu á því hvað það er að vera atvinnumótmælandi í nýrri kvikmynd sem heitir Pólitískt bíó 1 - þar skilgreinir Haukur Már það að vera atvinnumótmælandi það sem að vera fagaðili þegar kemur að mótmælum. Að þekkja skilgreiningu á beinum aðgerðum og starfa í anda þeirra. Ég er í ágætum samskiptum við Geir Jón, vegna allskonar mótmæla sem ég hef staðið fyrir.  En hann er prýðis maður og ég er sannfærð um að ef hann hefði verið á staðnum að atburðarrásin hefði verið öðruvísi. Það var enginn þarna sem talaði við mótmælendur eins og hann gerir. Ég hef aldrei fengið pening fyrir að mótmæla. Ef ég hefði fengið eitthvað fyrir öll þau skipti sem ég hef reynt að vekja athygli á óréttlæti og bágri stöðu annarra á opinberum vettvangi væri ég án efa öllu betur sett fjárhagslega en ég er:) 

5. Fólk hefur misjafnar skoðanir á því hvar og hvenær á að mótmæla. Ég hvet fólk til að gera þá eitthvað í því. Ég endurtek enn og aftur: ég er ekki að mótmæla fyrir ykkur, ég er ekki talsmaður eins né neins nema sjálfrar mín og ég hef aldrei sagst vera að gera eða segja neitt í nafni þjóðarinnar. Það eru helst þeir sem gera ekki neitt sem halda því fram að mótmæli séu ekki í þeirra nafni og skiptir þá litlu hvernig mótmælin eru - það eru aldrei allir sáttir við hvernig þau eru.

6. Ég bið fólk um að hætta að rífast og fara frekar að reyna að finna hvað við getum verið sameinuð um. Ég reyndar stórlega efast um að það sé til eitt eða neitt sem þessi þjóð geti verið sammála um. Til þess hefur verið allt of lengi alið á sundrung og siðspillingu. En ég lofa ykkur því að það verða engar breytingar hérlendis ef við höldum áfram að brjóta hvert annað niður í stað þess að finna sameiginlega fleti sem við getum unnið að til að losa okkur við óværuna í samfélaginu.

7. Ég er að vinna í því á fullu á bak við tjöldin að finna lausnir - ég er ekki bara að mótmæla. Ég vil ekki vera að varpa fram hálfköruðum hugmyndum en ég vona að úr þessu komi tillaga að neyðarstjórn sem og listi yfir erlenda aðila sem hægt væri að biðja um aðstoð. Ég vil líka taka það fram að út um borg og bý er fólk að funda, vinna og koma saman hugmyndum að nýju Íslandi. Það er hellingur að gerast sem snýr að lausnum. Spurningin mín til þeirra sem gagnrýna okkur sem  þó stöndum í ströngu við að sýna að okkur er nóg boðið, hvað eruð þið að gera? Eruð þið kannski sátt við ástandið eins og það er? Ef ekki, takið þá niður vandlætissvipinn og finnið vettvang og fólk sem ykkur hugnast að vinna með að nýju Íslandi. Við þráum að komast út úr þessari spillingu og þessu gjaldþroti siðferðis. Eitt sem hægt er að gera fyrir þá sem vita ekkert hvað þeir geta gert: að bjóða fram krafta sína sem sjálfboðaliðar - það er hefð fyrir slíku á elliheimilum og hjá hjálparsamtökum. Gaman væri ef einhver sem þekkir vel til gæti komið með lista yfir slíkt. 

8. Ég vil þakka öllum þeim sem hafa komamentað á bloggið mitt (líka tröllunum) undanfarinn sólarhring. Þetta er svo mikið að ég mun ekki hafa tök á að svara öllum. Ég vona að þessi færsla bæti það upp. Ég hef fengið að kynnast fullt af huguðu fólki í gegnum bloggið mitt og mótmælin undanfarið og er þakklát fyrir að sjá að það er til fólk sem vill ekki bara í orði heldur líka í verki annað samfélag. Það er til fólk með þroskaða samfélagsvitund hérlendis og það gefur mér ákveðna von. 

Ég setti þetta myndband saman með því efni sem ég tók upp á kryddsíldarmótmælum og hef í tvígang sent það á youtube en það er ekki að birtast þar, þrátt fyrir að meira en sólarhringur er liðinn. Veit ekki af hverju. Mun reyna aftur í dag. Lögin eru eftir mömmu: Bergþóru Árnadóttur.