Þakklæti og mótmælaskýrsla

Mikið er ég þakklát fyrir þá athygli sem málefni Tíbet hefur fengið. Fannst reyndar pínu skringilegt að eyða svona miklum tíma í að sýna áróðursmyndbönd frá Kína í fréttatíma sjónvarpsins. En það er ekki hægt að fá allt sem maður vill, alltaf. 

Mótmælin voru frábær. Fólk frá öllum, stéttum, flokkum og trúarlegum bakgrunni dreif að. Ég taldi um 65 manneskjur en fólk kom og fór. Ætli við höfum ekki verið allt í allt í kringum 75 þarna í dag. Eitthvað ætlaði lögreglan að vera með stæla til að byrja með. Við áttum ekki að fá að standa á gangstéttinni fyrir framan sendiráðið. En við fundum málamiðlun að lokum. Fengum að standa hálfan metra frá sendiráðströppunum:) Ég gleymdi reyndar að telja hve margir lögreglumenn og konur stóðu yfir okkur en það hefur sennilega verið í kringum 8 þegar mest var. Á meðan var verið að murka lífið úr einhverju úthverfafólki í Breiðholti. En við vorum í það minnsta alveg örugg fyrir kínverskum harðstjórum með þennan fríða flokk löggæslumanna og kvenna hjá okkur...

Tíbetinn Tsewang hélt ræðu þar sem hann fór yfir ýmiss atriði er varða Tíbet og Kína og var það fróðlegt að hlusta á.  Við héldum á okkur hita með að hrópa nokkur slagorð og Jón Valur hélt smá tölu sem að vanda var fróðlegt. Snorri stýrði fundinum af röggsemi og alveg frábært hvað hann og fleiri hafa verið dugleg að fara fyrir utan sendiráðið á hverjum degi, með kerti, fána, söngla slagorð, eiga í misskemmtilegum samskiptum við lagana verði. Ég flutti svo yfirlýsingu sem ég sauð saman stuttu fyrir fund útfrá ræðunni hans Tsewang og nýjustu fréttum um stöðu mála. 

Yngri sonur minn veiktist reyndar af flensupest í nótt og var ég því ekki með eins mikinn tíma til að gera allt sem ég vildi gera fyrir fundinn. Mér tókst þó að setja saman gagnlegar upplýsingar fyrir þá sem komu á mótmælin til að taka með sér heim svo hægt væri að afla sér meiri upplýsinga, skrifa bréf og annað slíkt sem mikilvægt er í þessari baráttu.  

Ég var að keyra vin minn á stofnun til að halda erindi og hitti þar aðra félaga, þær fóru eitthvað að tala um flott dæmi í Fréttablaðinu í dag en ég kom alveg af fjöllum. Var samt spennt að sjá hvað þetta væri fyrst þau sögðu að þetta væri svona frábært:) Kom svo heim og sá hvað þetta var sem þau voru að vitna í og viti menn. Ég er bara maður vikunnar... og ég verð nú eiginlega hálffeimin við þá fallegu hluti sem þar voru sagðir um mig. En mikið þykir mér vænt um að fá að sjá að annað fólk sjái mig á þennan máta. Gefur mér kraft og orku til að halda áfram í þessari baráttu sem og öðru sem er mér hjartans mál.

Ég er Fréttablaðinu þakklát fyrir að gera svona fallegan hlut um mig og öllum þeim sem tjáðu sig um mig. Ef þetta hjálpar til að varpa athygli á málefni Tíbet þá er þetta mikil blessun. Mér finnst nefnilega þetta vera svo gífurlega mikilvægt mál og svo krítískur tími fyrir þessa þjóð sem hefur gefið mér svo mikið síðan ég var krakki og ég las fyrstu bækurnar mínar um munkana í Tíbet. Ef einhver manneskja hefur verið mér mikil fyrirmynd í lífinu þá er það hann Dalai Lama. Hann hefur alltaf náð því að vinna sig í gegnum allar þessar hörmungar með bros á vör. Það að vera uppljómaður er ekki eitthvað sem maður fær bara, maður þarf að vinna fyrir því með miklum sjálfsaga og miklu og stöðugu þakklæti.

Takk og takk og takk allir sem hafa hjálpað til við mótmæli, allir sem hafa ljáð mér falleg orð, hér sem og annarsstaðar. Mér finnst ég svo óendanlega rík að eiga svona vini og kunningja.

Verið er að skipuleggja önnur mótmæli við kínverska sendiráðið næstkomandi laugardag... nánar um það síðar. 

Ályktun mótmælenda vegna ástandsins í Tíbet

eftir mótmælafund við kínverska sendiráðið laugardaginn 22. mars

 

Við höfum þungar áhyggjur af stöðu Tíbeta í Tíbet og andvaraleysis íslenskra stjórnvalda í þeim efnum.

 

Við skorum því á ríkisstjórn Íslands að mynda sér skoðun og koma henni á framfæri opinberlega. Þá skorum við jafnframt á ríkisstjórnina að svara eftirfarandi spurningum: Styður ríkisstjórn Íslands mannréttindabrot kínverskra stjórnvalda í Tíbet?

Ef hún gerir það ekki, er ríkisstjórnin tilbúin að fordæma og hvetja til þess að mannréttindi verði virt í Tíbet á opinberum vettvangi, sem og í alþjóðasamfélaginu.

 

Þögn íslenskra yfirvalda, forsætisráðherra, utanríkisráðherra sem og forseta Íslands verður að linna. Við viljum vita hug ykkar nú þegar, því mannréttindabrotin í Tíbet verða æ svæsnari. Í morgunn lýstu kínversk stjórnvöld því yfir að 100 þjóðir styðji aðgerðir þeirra. Erum við á þessum lista?

 

Við förum þess á leit að ríkisstjórn Íslands taki af skarið og bjóði sig fram til að miðla málum á milli Tíbet og Kína til að finna varanlega lausn á vandamálum þeim er hrjá Tíbet.

 

Við krefjumst þess jafnframt að rannsóknarnefnd á vegum S.Þ. verði tafarlaust hleypt inn í Tíbet til að komast að hlutskipti þeirra sem hafa verið handteknir og drepnir í tengslum við mótmælin í Tíbet undanfarið.

 

Mótmæli fyrir utan kínverska sendiráðið klukkan 13 í dag

Minni á mótmæli fyrir utan kínverska sendiráðið klukkan eitt í dag. Fann eftirfarandi inn á vef Tibetan Women´s association í morgunn,

"We call upon all the World Leaders of governments, religions, businesses, and all organizations not to condemn us with your silence. Please support us, as we feel helpless. Without your support we are handicapped. Please ask the Chinese ministry to stop this mass massacre of Tibetans who are dumped into pits, sliced into pieces and bathed in blood.

People of the world!! Please save Tibet from getting raped in the broad daylight. China has slammed its door on us; the Tibetans. Therefore it’s only you who can reach our voice through you to China."

Hlýðum kalli þeirra, látum í okkur heyra, krefum íslensk stjórnvöld um yfirlýsingu hvort heldur hún er með eða á móti mannréttindabrotum Kína gagnvart Tíbetum. Þessi þögn er óafsakanleg og siðlaus. 

Hótað hörðum refsingum