Fáránleg regla sem þarf að afnema eigi síðar en strax

Nú er það þannig að það er nánast ómögulegt að finna vinnu fyrir þúsundir manna - það er hreinlega ekki nein vinna í boði fyrir u.þ.b. 18.000 þúsund manneskjur - (þó svo einhverjir svindli á kerfinu þá eru það með sanni langt í frá allir). Hvað á fólk að gera sem á ekki neitt orlof til að nota? Ég á ekki von á því að þeir sem hafa verið atvinnulausir síðan í haust eigi mikinn pening til að fara í frí. Hverskonar afbökun á réttindum atvinnulausra er þetta eiginlega.

Þegar ég sat nefndarfund í fjárlaganefnd þá var það greinilegt að starfsmenn í félags- og tryggingamálaráðuneytinu höfðu lítinn áhuga á að finna lausnir handa þessum stóra hluta þjóðarinnar sem er atvinnulausir - það sem þau vildu fá fjármagn í fyrst og fremst var að hafa uppi á svindlurum. Það er gegnið fram af miklu offorsi og veit ég um eina konu sem fékk hótunarbréf um að bæturnar yrðu teknar af henni vegna þess að hún hafði fengið greiddar 10.000 krónur í orlof og átti fyrir vikið að vera einn af þessum meintu svikurum. Hversu margar ætli þurfi að búa við slíka ógn út af hörku í framferði vinnumiðlunar?

Ég skora stjórnvöld á að sína mennsku og hætta að láta stóra þjóðfélagshópa engjast sundur og saman af áhyggjum út af óvissu sem auðvelt væri að laga. 

Það er ekki hægt að bjóða fólki upp á það að allir óháð því hvort þeir eigi orlof inni eða ekki þurfi að vera án greiðsla úr atvinnutryggingasjóði í heilan mánuð. Engu skiptir þó fólk vilji vera virkt í atvinnuleit - því er skikkað í frí án þess að hafa nokkuð um það að segja. Það þarf að laga þessa ambögu eigi síðar en strax. Það er alveg ljóst að þessi reglugerð var sett á í góðærinu og það eru einfaldlega engar forsendur í dag til að halda þessu til streitu.

Atvinnulausir eiga ekki rétt á bótum í orlofi

Athugasemdir

[Magnus Jonsson (IP-tala skráð) 2.7.2009 kl. 08:10]

Heldurðu að það væri verið að elta einhverja 10þ kalla ef þetta væru ríkisstarfsmenn ???

Engu máli virðist skipta hvað menn fá í greiðslur ef þeir hafa starfað fyrir hið opinbera. sbr margföld laun hjá ríki.( þingfararkaup, nefndarsetur, stjórnarsetur, staðaruppbót olf.ofl og jafnvel biðlaun ofan á þetta allt saman))

Ógeðfellt þetta kerfi og maður sefur alveg þó nokkrir smiðir séu að drýgja tekjur sínar með smá svindli, á meðan stórfellt svindl á svindl ofan er stundað af ríkisstarfsmönnum..

[Magnús Sigurðsson, 2.7.2009 kl. 08:55]

Þetta atvinnuleysistryggingakerfi er svo niðurnjörvað af hugarfari ríkisstafsmanna að það gerir sjálfstæðum atvinnurekendum (stórum hlut íslenskra iðnaðarmanna) ókleyft að þiggja bætur. 

Í fyrsta lagi er gert ráð fyrir að þeir svindli, í öðru lagi verða þeir að vera búnir að borga öll launatengd gjöld ef til atvinnuleysisbóta á að koma. 

En flestir er þannig gerðir að þeir halda í vonina og skrá sig ekki fyrr en hún er engin.  En þá er kannski liðinn mánuður í vangoldnu launum og þar með hefur launatengdum gjöldum ekki verið skilað.

[Sigrún Jónsdóttir, 2.7.2009 kl. 09:53]

Það hefur alltaf ríkt tortryggni gegn atvinnulausum á Íslandi og löngu komin tími á að það breytist!

[Offari, 2.7.2009 kl. 11:16]

Því miður hefur alltaf verið misnotkun á atvinnuleysisbótum. Svört vinna með atvinnuleysisbótum hefur gefið mörgum mun meiri tekjur en heiðarleg vinna. Þeir sem misnota kerfið eru að skemma fyrir öðrum. Þótt bankahrunið sé versta dæmið um slík skemmdarverk tel ég að öll nauðgun á kerfinu sé það sem kom þjóð okkar í þrot og nauðgunina þarf að stöðva.

[María (IP-tala skráð) 2.7.2009 kl. 12:06]

Takk fyrir að vekja athygli á þessu máli Birgitta. Mig langar að benda á að það getur tekið allt að 6 vikur að afgreiða umsókn um atvinnuleysisbætur, samkvæmt upplýsingum frá Vinnumálastofnun. Og enginn virðist geta gefið umsækjendum upplýsingar um hversu háa upphæð þeir eiga rétt á að fá í bætur, sé viðkomandi í þeirri stöðu að starfshlutfall hafi minnkað. Fólk getur átt á hættu að bíða í algjörri óvissu vikum saman. 

[Brjánn Guðjónsson, 2.7.2009 kl. 13:29]

þetta virðist vera heilkenni hér á landi, þessi tortryggni, að gera ráð fyrir að allir reyni að svindla á kerfinu. það er t.d. ástæðan fyrir eftirágreiðslukerfi LÍN.

margur heldur mig sig, segi ég bara.

[Hrönn Sigurðardóttir, 2.7.2009 kl. 16:01]

Þetta er skelfilegt ástand! Hvað eiga þeir fjölmörgu sem hafa þessar bætur einar að lifa af að gera þegar þeir eru skikkaðir í sumarfrí? Á hverju á að lifa?

Annað fáránlegt í sambandi við atvinnuleysisbætur er að hinir svokölluðu rauðu dagar í mánuði - þ.e. frídagar sem eru opinberir frídagar, jól, páskar, sautjándi júní osfrv. fást ekki greiddir. Atvinnulausir þurfa líklega ekki að halda uppá þessa daga frekar en aðra!

[Sólveig Þóra Jónsdóttir, 2.7.2009 kl. 19:35]

Ég er ekki alveg að skilja þessa frétt. Fá atvinnulausir þá ekki bætur 12 mánuði ársins?

[Jakob Þór Haraldsson (IP-tala skráð) 2.7.2009 kl. 22:40]

KERFIÐ er vægast sagt ótrúlegt, fyrst var reynt í marga mánuði á svindla á mér með því að greiða mér í marga mánuði ekki fullar atvinnuleysisbætur, eftir 12 nei, kom leiðrétting þar sem ég fékk greitt það sem "ríkið reyndi að stela gróflega af mér" - engin afsökunarbeiðin ekkert - svo nú fékk ég engar atvinnuleysisbætur, og ástæðan var sögð að ég hefði fengið LAUN frá VR upp á kr. 6.405,- (það var séreignasparnaður) - halló - halló - hvað er eiginlega í gangi?  Ég hef hringt 3 daga í Vinnumiðlun og beðið í símanum í yfir 25 mín í hvert skipti - en ENGINN svarar símanum (582 4900) ég átti að fá leiðréttingu 2. júlí ekkert gerist.  Ég sendi netpóst - enginn svör fengið - þetta er KERFI sem á að vinna fyrir OKKUR en er síðan notað til að BERJA á manni - Ísland er orðið algjört FÁBJÁNA ríki, vægast sagt, þar sem GLÆPAMENN ganga lausir á meðan barið er á íslenska sauðnum...!

kv. Heilbrigð skynsemi

[Karl Löve, 2.7.2009 kl. 22:53]

Jakob minn, ég er í sömu stöðu og þú. Ekki reyna að hringja þangað það svarar aldrei. Sendu tölvupóst á [e-mail]  Samkvæmt nýjum lögum er allur séreignasparnaður sem við tökum út ekki þess valdandi að bætur lækki.

Ég fór niður á Engjateig í dag og beið þar í eina og hálfa klst. til að fá þetta lagfært. Ég fékk póst frá greiðslustofu í dag sem segir eftirfarandi, "Þú ert beðinn um að
gera grein fyrir þessari greiðslu með því að fara inná heimasíðu vinnumálastofnunar og fylla út áætlun um tekjur en hana er að finna undir
flipanum eyðublöð og vottorð.  Vinsamlegast fylltu út reytinn um tilfallandi tekjur en þar á þessi greiðsla að koma fram. "

Ég vona að þetta hjálpi. ER VERIÐ AÐ SEGJA HÉR AÐ VIÐ ATVINNULAUSIR VERÐUM AF EINUM MÁNUÐI Í SUMAR VEGNA EINHVERS "SUMARFRÍS"?????  Hvað eigum við að éta? GRAS?

[Karl Löve, 2.7.2009 kl. 22:54]

Þetta á að vera [e-mail]

[Karl Löve, 2.7.2009 kl. 22:56]

Ég vil biðja þig Birgitta að gera "svolítinn" hávaða og pottaglamur út af þessu rugli ef þú vildir vera svo væn. Stendur þig vel.

[Sólveig Þóra Jónsdóttir, 2.7.2009 kl. 23:44]

Þetta er furðulegt þetta með þá sem tóku út séreignarsparnað það var sagt að þetta ætti ekki að hafa áhrif á atvinnuleysisbætur né aðrar bætur. Samt er fjöldinn allur af fólki að lenda í vandamálum við að fá sínar greiðslur því það virðist ekkert samband vera á milli stofnana. Maðurinn minn lenti í þessu núna líka. Af því að hann átti einhverjar krónur í séreignarsparnaði sem hann tók út  í mars þá er hann ekki búinn að fá sínar atvinnuleysisbætur. Hann gerði í dag sem Karl Löve er að segja frá en samt veit hann ekki hvenær hann fær sínar bætur. Svo spyr ég þig aftur Birgitta því þú veist meira um þessi mál en ég : Fær fólk ekki atvinnuleysisbætur 12 mánuði ársins?

[Haukur Nikulásson, 2.7.2009 kl. 23:44]

Svo vill til að ég vinn hjá Vinnumálastofnun á Engjateigi. Ég tala ekki fyrir stofnunina og þess vegna verður það sem ég segi hér að vera tekið með slíkum fyrirvara.

Það er dapurt að sjá að bæði fréttin og athugasemdirnar eru byggðar á misskilningi. Það er einfalt mál að lögin um atvinnuleysistryggingasjóð heimila ekki að fólk sé á tvöföldum launum þ.e. bótum og greiddu orlofi á sama tíma. Það er misskilningur sem kemur hér fram að fólk sé skikkað í orlof nauðugur. Hver og einn atvinnuleitandi ákveður hvenær hann tekur það orlof sem hann hefur fengið greitt í samráði við stofnunina en verður lögum skv. að hafa það innan hefðbundins orlofstíma. Hvað svo sem líður fjárhagsstöðu einstaklinga þá eru bætur ekki greiddar á meðan fólk hefur full laun annars staðar. Greitt orlof við starfslok telst til launa haldi einhver eitthvað annað og þeim greiddu dögum verður að finna stað á orlofstíma.

Starfsfólk Vinnumálastofnunar leggur sig fram um að veita bestu mögulegu þjónustu á hverjum tíma. Á álagstímum er okkur öllum ljóst að það er mjög oft ekki nóg til að sinna 17.000 atvinnuleitendum.

Við, sem störfum við móttöku og ráðgjöf stöndum ekki upp frá vinnu nema til að fara í hálftíma matartíma á meðan afgreiða þarf atvinnuleitendur. Okkur er ljóst að þrátt fyrir mikið álag dynja stundum á okkur ákúrur sem eru EKKI vegna leti eða slæmrar stjórnunar.

Hjá Vinnumálastofnun starfar iðinn, samhentur og geðgóður hópur sem þarf að vinna oft undir miklu álagi þeirra sem verst eru staddir. Ánægjan í starfinu fylgir því að þjóna fólki eftir bestu getu innan þeirra laga og reglna sem gilda og það stendur ekki á nokkrum starfsmanni að veita bestu mögulegu ráðgjöf til að tryggja fólki réttindi sín. Hins vegar má ekki gleymast að réttindin eru einstaklingsbundin tryggingamál (ath. ekki velferðarmál) og þess vegna er réttur atvinnuleitenda misjafn. Ef fólk á ekki rétt til atvinnuleysisbóta taka félags- og velferðarsvið sveitarfélaga við og eftir minni bestu vitund er alveg sama þjónustulundin þar á borðum líka.

Þrátt fyrir að á okkur dynji stundum reiði og örvænting reynum við eftir mætti að sinna fólki af alúð. Það er okkur keppikefli að fólk fari frá okkur í sátt og okkur er mjög annt um orðsporið. Því verður hins vegar ekki neitað að fólk sem á takmarkaðan rétt lætur stundum finna fyrir sér í óánægju sinni og örvinglan og við höfum líka skilning á því.

Gagnrýni á fullan rétt á sér og við höfum sérstakan metnað í því að vinna þessi störf betur og leggjum okkur fram um að koma áleiðis til stjórnenda tillögum um úrbætur og erum fús að játa mistök þegar slíkt hendir, enda geta þessi réttindamál verið bæði flókin og snúin. Þegar málum seinkar er það oftast vegna þess að gögn vantar frá vinnuveitendum til að styðja réttindamál einstaklinganna.

Ég ætla ekki að draga neitt yfir það að það má eflaust finna mörg dæmi um það að ýmislegt mætti betur fara úr hendi Vinnumálastofnunar en viljann til góðra verka vantar ekki. Við sem störfum þarna höfum mörg hvert komið þangað úr atvinnuleysi sjálf og höfum þess vegna reynslu af þessum málum BEGGJA VEGNA BORÐSINS.

Þingmaðurinn á heiður skilinn fyrir að vekja athygli á málum sem má færa til betri vegar, í þessu tilviki er skotið svolítið glannalega vegna slælegrar fréttamennsku.

Ef þingmaðurinn vill kynna sér málin betur er ég viss um að forstjórinn, Gissur Pétursson, tæki henni af stakri ljúfmennsku.

Að endingu ítreka ég að ég tala ekki fyrir stofnunina þó ég vinni þarna um stundir. Þetta er bara prívatskoðun.

[Sólveig Þóra Jónsdóttir, 2.7.2009 kl. 23:54]

Má ég þá spyrja þig svona prívat Haukur, fær atvinnulaust fólk bara borgað 11 mánuði á ári?

[Haukur Nikulásson, 3.7.2009 kl. 00:03]

Sólveig. Fólk fær borgað 12 mánuði á ári. Eins og fram kemur að ofan þá þarf fólk að ákveða hvenær það telst taka greidda orlofsdaga ef þeir eru óteknir þegar vinnu lýkur skv. vottorði vinnuveitanda. Skv. minni bestu vitneskju veita lögin rétt til að vera allt að 3 ár á bótum samfellt, þó innan þeirra skilyrða að verða að taka vinnu ef hún býðst skv. reglum sem um það gilda.

Ég gæti eflaust lent í langri umræðu hér um réttindamál þannig að ég vil vísa á lög um atvinnuleysistryggingarsjóð og á vef Vinnumálastofnunar um frekari upplýsingar.

[Sólveig Þóra Jónsdóttir, 3.7.2009 kl. 00:05]

Er það rétt að atvinnulausir sem ekki eiga inni sumarfrí frá fyrrverandi atvinnurekendum sé skikkaðir í launalaust sumarfrí af Vinnumálastofnun svo ég geri betur grein fyrir spurningu minni. Þannig kemur þessi frétt fram og þannig skilja hana flestir. Er það rétt hjá Hrönn hér að ofan að svokallaðir rauðir dagar (hátíðardagar)séu ekki greiddir af Vinnumálastofnun?

[Sólveig Þóra Jónsdóttir, 3.7.2009 kl. 00:08]

Samkvæmt því þá er þessi frétt villandi. Ef atvinnulausir fá greidda 12 mánuði á ári þá eru þeir með sömu réttindi og hinir sem hafa vinnu.

[Haukur Nikulásson, 3.7.2009 kl. 00:09]

Nei Sólveig, ég hef alls ekki orðið var við það.

Rauðir dagar eru með virkum dögum af ástæðum sem ég þekki ekki. Það eru bara laugardagar og sunnudagar sem telja ekki.

[Sólveig Þóra Jónsdóttir, 3.7.2009 kl. 00:13]

Takk fyrir upplýsingarnar Haukur. Þarna sést hvað ein villandi frétt getur valdið misskilningi og óþarfa afkomuótta á meðal fólks.

[Haukur Nikulásson, 3.7.2009 kl. 00:15]

Sólveig, það má ekki misskilja að atvinnuleysistryggingasjóður er EKKI ígildi vinnuveitanda. Þú mátt t.d. ekki vera veik á bótum (þá áttu að fá sjúkradagpeninga frá verkalýðsfélaginu þínu) og þú mátt ekki vera erlendis á bótum. Þetta sýnist mér stundum algengur misskilningur hjá fólki.

[Karl Löve, 3.7.2009 kl. 00:17]

Haukur! Ég held ekki að nokkur hér sé amast út í starfsfólk VMST. Sjálfur finnst mér starfsfólkið á Engjateig standa sig mjög vel í öllu því álagi og geðsveiflum sem þar eru.

Ég er sjálfur atvinnulaus og gef því fólki fína einkunn. Það sem fólk hér og ég erum að setja út á eru reglugerðar frumskógurinn sem getur gert hvern mann vitlausan. Svo þegar fólk upplifir það að vinstri höndin virðist ekki vita hvað sú hægri er að gera og fær ekki þessar aumu bætur þá er ekki nema eðlilegt að fólk pirrist.

Ég þarf að taka á öllu mínu til að halda stillingu eftir því sem mánuðirnir líða og engin vinna fæst. Það er fátt ömurlegra en að sitja aðgerðarlaus og vera ekki þáttakandi í atvinnulífinu.

[Sólveig Þóra Jónsdóttir, 3.7.2009 kl. 00:20]

Ég geri mér fulla grein fyrir því Haukur enda fer fólk ekki á atvinnuleysisbætur nema í neyð ( eða það vona ég) . Ég er svo heppin að hafa ennþá vinnu. En það er eiginlega enginn öruggur í dag með sína vinnu.

[Haukur Nikulásson, 3.7.2009 kl. 00:21]

Ég er sammála þér Karl. Það hefur tekið mann góðan tíma að átta sig á þessum málum. Ekki dreg ég dul á það. Takk fyrir hrósið.

[Haukur Nikulásson, 3.7.2009 kl. 00:24]

Fyrirgefðu Karl, auðvitað átti ég að þekkja þig, gamli vinnufélagi! Bestu kveðjur!

[Einar Björn Bjarnason, 3.7.2009 kl. 00:30]

Það er fínt, að fá inn menn eins og hann Nikulás, til að leiðrétta misskilning, þegar hann kemur upp.

Ég hef annars, miklar áhyggjur af atvinnuleysinu,,,einkum, að það geti aukist verulega með haustinu.

Þar kemur til, að lausn bankakreppunnar, er stöðugt að dragast á langinn. Ég, ætla ekki endilega að kenna ríkisstjórninni eingöngu um það, þ.s. lausn þeirrar deilu við erlenda kröfuhafa er víðsfjarri að vera einföld,,,ekki síst vegna þess, að stöðugt og viðvarandi efnahagshrun, gerir allar verðáætlanir á lánapakkanum, sem er verið að prútta um verð á, úreltar eftir nokkurn tíma.

Samt sem áður, hefði ég heldur viljað, að hún hefði tekið lausn bankakreppunnar í hærri forgang, en lausn Icesave deilunnar. 

• viðvarandi bankakreppa, er stærsti einstaki skaðvaldurinn, er sem dauð hönd eða rekakkeri, á atvinnulífið og hag heimila. Fyrir sérhvern dag, sem hún heldur áram, minnkar lífsþróttur bæði heimila og atvinnulífs.
• töf á lausn Icesave, er ekki skaðleg með sama hætti, og hefði dráttur lausnar þess máls, ekki valdið heimilum né atvinnulífi neinum skaða, sambærilegum við þann skaða, sem sambærileg töf á lausn bankakreppunnar veldur.
• viðvarandi bankakreppa, getur raunverulega framkallað 'annað hrun' ef hún heldur áfram nægilega lengi. Enginn veit, hvar akkúrat mörkin liggja, þ.s. fjöldi fyrirtækja mun fara á hausinn.
• hugsanlegt, er að töf fram á haust, á lausn Icesave, hefði skilað skárri niðurstöðu.

Síðast en ekki síst, er viðurkenning þess, að skuldir þjóðarinnar sé ekki 1,5 þjóðartekjur, heldur 2,5.

Þetta hefur mig grunað lengi.

Við erum, sannarlega í brimskafli - en við erum ekki að sigla þjóðarskútunni lengra frá honum, þvert á móti eru boðarnir - sem brýtur á - stöðugt að færast nær.

Ef annað hrun kemur, þá er enginn vafi á, að atvinnulausum mun fjölga stórlega á ný. Þá, getur orðið, jafnvel erfitt fyrir ríkið, að tryggja nægilegt fé til að standa undir bótunum.

Kv.

[Karl Löve, 3.7.2009 kl. 00:37]

Einar minn, hann heitir Haukur Nikulásson. Ég geri ráð fyrir að þetta hafi verið fljótfærni.

[Einar Björn Bjarnason, 3.7.2009 kl. 00:42]

Þ.e. rétt.

Kv.

[Birgitta Jónsdóttir, 3.7.2009 kl. 08:08]

Þakka þessar ágætu leiðréttingar á fréttinni Haukur, það er með sanni ömurlegt þegar fréttir eru settar upp á villandi hátt og ég veit að það eru allir sem vinna hjá Vinnumiðlun að leggja mikið á sig og fjarri lagi að sú stofnun sé undir þetta mikla álag vel búin og mikið álag á öllum - en því má ekki gleyma að það er mikill fjöldi af fólki sem hefur þurft að upplifa óþolandi hluti út af því að þeir sem smíða kerfið sem starfað er eftir hafa hreinlega ekki fullan skilning á því hvernig það er að vera atvinnulaus - ég legg til að þeir sem hafa reynslu af mannauðsstjórnun  eða stjórnsýlsu sem eru á atvinnuleysisskrá verði fengnir til þess að gera úrbætur á starfsaðferðum og vinnuferlum er lúta að þeim sem eru á skrá. Það er mjög margt sem ég gæti gert athugasemdir við varðandi starfshætti margra stofnana hérlendis, það sem er ef til vill augljósasti hnökrinn er sú staðreynd að margar stofnanir starfa útfrá því að fólk sé að fara að misnota kerfið og því liggja allir undir grun og er það vægast sagt ömurlegt að upplifa ef maður þarf að nota sér slíkar stofnanir eins og margir eru að upplifa.

Ég hef heyrt margar sögur og sjálf upplifað óliðlegheit og man að ég fékk rembihnút í magann þegar ég var atvinnulaus og þurfti að fara niður á vinnumiðlun út af háttarlagi eins starfsmanns þar sem lagði sig fram við að sýna einstakan valdhroka og láta mann finna fyrir því að viðkomandi hafði líf manns í hendi sér. Ég veit ekki hvort að þessi starfsmaður sé enn við störf en viðkomandi starfsmaður átti að mínu mati ekkert erindi til starfa á slíkum stað miðað við framkomuna við þá er þurftu að vera upp á náð og miskun viðkomandi.

[Dexter Morgan, 3.7.2009 kl. 23:55]

Ég hef þurft að sækja mér bætur í 4 mán. Sem sagt; fengið fjórum sinnum greiddar bætur. Ég hef þurft að fara í hvert einasta skipti hingað niður á Vinnumálastofnun á Akureyri til að láta "leiðrétta" fyrir mig. Aldrei hefur verið beðist afsökunar. Það er eins og maður sé að slíta síðustu krónurnar úr veskjum þeirra sem þarna starfa. ALDREI hefur verið svarað í símanúmerinu 582-4900. Þetta starfsfólk sem vinnur við útreikninga á bótum á Skagaströnd er greinilega ekki að ráða við málið. Kannski fyrir ári síðan eða tveimur, þegar þetta voru 1000-1500 manns og þá oftast þeir sömu. En núna, NEI takk. Þessu veður að breyta, bæta tölvukerfið (því það er oftast afsökunin; "tölvukerfið ræður ekki við þetta" eða " það er svo mikið álag á tölvukerfinu"). Síðan þarf að fjölga fólki (nóg er af atvinnulausu fólki til að vinna núna), og ráða bara í þau störf manneskjulegt fólk, venjulegt fólk sem skilur þessa örvæntingu og neyð hjá fólki. Ekki eitthvað "kerfis-fólk" sem er alveg sama.

[Sævar Einarsson, 4.7.2009 kl. 10:32]

Mig langar til að skjóta því inn hér og er alveg óskillt þessari umræðu en það vakti furðu mína að það er ekki hægt að blogga við þessa frétt, ritskoðun hjá mbl.is ?