Hann sem ekki má nefna

Sumir segja að Davíð eigi bágt, aðrir segja að maður eigi ekki að tala um hann og er nafn hans orðið nánast eins og nafn Voldemort - betra er ekki að nefna það. Ég vorkenni ekki Davíð, ég vorkenni ekki neinum sem er ábyrgur af þeim landráðum sem hér hafa verið framin. Ég hef engar lausnir fyrir þessa þjóð, því samkvæmt öllu er hreinlega ekki til hæft fólk innan landsteina til að stýra landinu og þess vegna engin ástæða til að mynda hér neyðarstjórn. Allir landsmenn algerlega vanhæfir til að taka við og stoppa spillinguna. Þá er annað hvort að trúa hræðsluáróðrinum eða gera eitthvað. 

Ég verð að viðurkenna að ég er alveg að gefast upp á þessu rugli og langar bara helst að gleyma þessu öllu - fara að dæmi múmínálfa og leggjast í hýði yfir svartasta skammdegið. Ég þoli ekki alla þessa refaskák sem er landlæg hér - getur fólk ekki bara verið ærlegt og hætt þessu eilífa leikriti? Mikið værum við betur sett ef fólk gæti komið sér saman um að vinna að þeim málefnum sem það er sammála um. Allir eru sammála þeirri staðreynd að spillinguna þarf að hreinsa út úr samfélaginu. Ef við erum öll svona óheiðarleg að engum er treystandi að stýra þjóðarskútunni nema þeim sem sigldu henni í kaf, er þá ekki lag að við færum í vægðarlausa heiðarleika naflaskoðun og skoðuðum í leiðinni siðferðisvitund okkar.

Það er augljóslega eitthvað að hjá okkur sem þjóð að leyfa svona víðtækri spillingu að grassera. Við höfum alltaf skotið sendiboðana umsvifalaust sem hafa reynt að benda á siðspillinguna hérlendis og héldum því fram á alþjóðavettvangi að enginn þjóð væri siðvandari en við og montuðum okkur af því að vera minnst spillta þjóð í heimi. Nú er komið að skuldaskilum. Hvað ætlum við að gera. Þetta mun ekki reddast í þetta sinn. Hver í ósköpunum á að redda þessu nema við sjálf? Varla förum við að láta fólk eins og hann sem ekki má nefna taka við stjórn landsins? Það nýjasta nýtt er að spillingaröflin munu rannsaka sig sjálf og hvað getum við gert? Látið þetta yfir okkur ganga? Sennilega mun fólk ekki gera nokkurn skapaðan hlut fyrr en fokið er í ÖLL skjól. Það er hryggilegt að vita og geta ekki gert neitt til að sporna við því. Þjóðin verður að vakna áður en það er orðið of seint en mikill er dróminn sem yfir henni marar.

Ég skrifaði eftirfarandi ljóð fyrir Írak stríðið en merkilegt nokk þá gæti það allt eins átt við okkur í dag.

Hin daglegu stríð hverdagsleikans

Í mótspyrnu þess sem
glatað hefur öllu
er kraftur sem fáir skilja

Harðstjórarnir fleiri en einn
handsal
blóðugar hendur
einræðisríkja hins frjálsa heims

Fánar brenndir
með iðandi táknum
blátt svo blátt
bláar hendur
hvítt svo hvítt
rautt svo rautt
blóðug kvika
skotmörkin
ekki lengur fjarlæg

Þar sem eitt sinn var heimili
þar sem eitt sinn fjölskylda hjúfraði
sig saman í gleði og sorg
er ei meir
Konur og menn sem eiga enginn tár
eftir í vonlausum augum
Kvöl þeirra
nær til mín
í kraftmiklum táknum

Í þeirri auðn sem áður var
fæðist von
takmarkalaus innri ólga
Það er hafin bylting í hjarta mínu
hún einkennist af alúðlegum litlum
breytingum í hinu daglega lífi
Mín hverdagslegu stríð
hjákátlega innantóm

 

 

Davíð: „Þá mun ég snúa aftur"

Athugasemdir

[Katrín Snæhólm Baldursdóttir, 4.12.2008 kl. 11:16]

Magnað ljóð og á óhugnanlega vel við okkur hér uppi á íslandi núna og það ástand sem hér ríkir..eða mun ríkja. Ég verð öðru hverju svo magnþrota..aðallega yfir því hversu lengi fólkið okkar er að vakna en svo á milli rifna ég upp og berst. En bara þar til það er ljóst að ekkert muni raunverulega breytast.

Þá ætla ég eitthvert annað...bara nógu langt frá minningu um glataða þjóð. Það er einhvern veginn auðveldara að þurfa ekki að horfa upp á geðveikina daglega og þegar ég er erlendis þá get ég látið sem mér komi ástandið þar ekki við og hvílt mig á áhyggjum heimsins um stund.  Það er líklega ekkert mjög ábyrgt..en mitt viðkæma hjarta bara þarf stundum fjarlægð frá raunveruleikanum.

Eigðu góðan dag Birgitta mín.

[Sigrún Jónsdóttir, 4.12.2008 kl. 11:56]

[Heiða B. Heiðars, 4.12.2008 kl. 14:54]

Oh hvað ég skil þig! Þetta er eitthvað svo stórt og hleður utan um sig á hverjum einasta degi! Stundum virðist bara einfaldara að breiða upp fyrir haus og taka afneitunarpakkann með hinum sem eru í því.

En fj.... hafi það að ég láti fara svona með landið MITT

Ég á miklu meira í því en þessir menn sem geta varla flokkast sem annað en landráðamenn

Út með pakkið!

[Jakobína Ingunn Ólafsdóttir, 4.12.2008 kl. 16:01]

Ég tek undir hvert orð sem þú segir Birgitta. Ormagryfjan sem hefur opnast við fætur okkar er ógeðfelld. Pattstaða er í stjórnmálum og einstaklingar á borð við okkur fyllast vanmætti þegar þeir horfa upp á ógeðfelldar leikfléttur valdhafa sem svífast einskis við að næra sjálfa sig.

[Flosi Kristjánsson, 4.12.2008 kl. 17:37]

"Ég vorkenni ekki Davíð, ég vorkenni ekki neinum sem er ábyrgur af þeim landráðum sem hér hafa verið framin"

Gætirðu ekki tekið saman smá lista yfir þær athafnir seðlabankastjóra sem falla undir landráð og sett hér á síðuna? Svona eins og Jón Baldvin gerði: í fyrsta lagi, í öðru lagi og svo framvegis?

[Eva Hauksdóttir (IP-tala skráð) 4.12.2008 kl. 22:09]

Birgitta mín, ég er ekkert hissa á því að þú sért að brenna út. Þú hefur staðið í þessari vonlausu baráttu fyrir Tíbet með litlum stuðningi mjög lengi, auk þess að taka virkan þátt í andófi gegn nánast öllum þeim gloríum íslenskra valdníðinga sem stríða gegn réttlætiskennd þinni.

En nú er landslagið að breytast. Það er loksins að verða raunhæfur möguleiki að safna liði sem er reiðubúið til beinna aðgerða. 

Ég legg til að þú takir þér pásu frá öllu andófi, hvílir þig og safnir kröftum, því ræðuhöld og skiltaburður munu ekki skila neinu hvort sem er. Í febrúar verða nógu margir orðnir reiðir til að hægt sé að ná fram samstöðu um aðgerðir sem skila árangri -og þá mun Ísland þurfa á þér að halda. 

Í alvöru talað, láttu aðra um að standa úti í kuldanum og klappa fyrir ræðumönnum á næstunni. Þú þarft að hlaða batteríin.

[Svanur Gísli Þorkelsson, 5.12.2008 kl. 01:51]

Með tilliti til orða Evu og lokaerindinu í ljóðinu þínu Birgitta, þekki ég engar beinni aðgerðir en byltingu hjartans.

[Birgitta Jónsdóttir, 5.12.2008 kl. 06:36]

Takk innilega fyrir tjásurnar... ég ætla að taka þig á orðinu Eva mín, ég ætla að einbeita mér að Tíbet aftur - finn svo mikla sundrung meðal allra- kann ekki að vernda mig gegn allri neikvæðninni. Ég á mér bara einn draum - að fólk læri að vinna saman að því sem það er sammála um á óeigingjarnan hátt. 

Flosi... þú hefur sama aðgang að fjölmiðlum og fólki og ég og ættir að geta gert þetta sjálfur. Ég er komin í bloggfrí.